ថ្មីៗនេះ ក្រុមហ៊ុន Lenovo បានបញ្ចាក់ថា ស្មាតហ្វូនស៊េរីថ្មីនាពេលខាងមុខរបស់ខ្លួនគឺ Lenovo Z6 Pro ដែលគេដឹងថា នឹងបង្ហាញខ្លួនជាផ្លូវការនៅថ្ងៃទី 23 ខែមេសាខាងមុខនេះហើយ។ មុនពេលដែលស្មាតហ្វូននេះ បង្ហាញខ្លួនជាផ្លូវការនោះ មានព័ត៌មានលម្អិតជាច្រើនរបស់ស្មាតហ្វូននេះត្រូវបានទម្លាយនៅលើអនឡាញផងដែរ។ ខណៈពេលនេះ ក្រុមហ៊ុនមួយនេះ ចែករំលែកនូវរូបភាពថ្មីមួយរបស់ស្មាតហ្វូននេះនៅលើប្លុក Weibo របស់ចិនដែលមានការទម្លាយអំពីលក្ខណៈសម្បត្តិជាច្រើននៃផ្នែក Hardware របស់ស្មាតហ្វូននេះផងដែរ។
ក្រុមហ៊ុនបានការបង្ហាញនូវស្មាតហ្វូនមួយដែលមានកាមេរ៉ា 4 គ្រាប់នៅផ្នែកខាងក្រោយហើយវាក៏មានភ្ជាប់ជាមួយនឹងមុខងារ AI ផងដែរ នៅក្នុងនោះ ក៏មានការលើកឡើងផងដែរថា ស្មាតហ្វូននេះ នឹងមានភ្ជាប់ជាមួយនឹងមុខងារ 8-axis optical image stabilization ។ ស្មាតហ្វូននេះនឹងប្រើប្រាស់នូវបន្ទះឈីប Qualcomm Snapdragon 855 octa-core ដែលត្រូវបានប្រើប្រាស់នៅលើស្មាតហ្វូនជាច្រើនដែលបង្ហាញខ្លួននៅក្នុងឆ្នាំនេះ។ នេះគឺស្មាតហ្វូនទីពីររបស់ ដែលនឹងប្រើប្រាស់ផងដែរជាមួយនឹងបន្ទះឈីប Qualcomm Snapdragon 855 SoC បន្ទាប់ពីការបង្ហាញវត្តមានរបស់ស្មាតហ្វូន Lenovo Z5 Pro GT ដែលមានរ៉េមទំហំ 12GB នោះ។
ក្រុមហ៊ុននេះ បានបន្ថែមទៀតថា ស្មាតហ្វូននេះនឹងមានភ្ជាប់ជាមួយនឹងបច្ចេកវិទ្យា PC-class liquid cooling technology ដែលធ្វើអោយម៉ាស៊ីនស្មាតហ្វូនរបស់អ្នកមានល្បឿនលឿនជានិច្ច។ សម្រាប់ថាមពលថ្មរបស់ស្មាតហ្វូននេះគឺមានទំហំ 4,000mAh ។ កាមេរ៉ាគោលខាងក្រោយរបស់ស្មាតហ្វូននេះគឺមានទំហំ 48-megapixels ហើយក្រុមហ៊ុនបច្ចេកវិទ្យានេះក៏បញ្ជាក់ថា ស្មាតហ្វូននេះអាចនឹងមានទំហំរូបភាពដល់ទៅ 100-megapixel ហើយនេះគឺជាស្មាតហ្វូនដំបូងបំផុតដែលប្រើប្រាស់នូវបន្ទះឈីប Snapdragon 855 SoC មានសមត្ថភាពអាចធ្វើបែបនេះបាន។
កាលពីសប្តាហ៍មុននេះ នាយកប្រតិបត្តិរបស់ក្រុមហ៊ុននេះ ក៏បានបង្ហោះនូវរូបភាព screenshot នៃ Network icons របស់ស្មាតហ្វូននេះនៅលើបណ្តាញសង្គម Weibo ដែលបញ្ជាក់ថា Z6 Pro នឹងទ្រទ្រង់នូវបណ្តាញ 5G connectivity ផងដែរ។ ថ្មីៗនេះ មានការបែកធ្លាយស្មាតហ្វូននេះ ដែលមានភ្ជាប់ជាមួយនឹង waterdrop notch display ហើយវាក៏មានអេក្រង់ទំហំដល់ទៅ 90% ថែមទៀត។ ស្មាតហ្វូននេះ ក៏មានប្រើប្រាស់នូវប្រព័ន្ធស្កេនក្រយ៉ៅដៃក្រោមអេក្រង់ផងដែរ។ Lenovo Z6 Pro របស់ Lenovo នឹងបង្ហាញខ្លួនជាផ្លូវការនៅថ្ងៃទី 23 ខែមេសាខាងមុខនេះ។ ទោះជាយ៉ាងណាក៏ដោយនោះ មុនពេលដែលមានការបង្ហាញវត្តមានរបស់ស្មាតហ្វូននេះ ស្មាតហ្វូននេះ អាចធ្វើការកក់ទិញមុនបានតាមរយៈគេហទំព័រផ្លូវការរបស់ក្រុមហ៊ុន និង JD.com នៅក្នុងប្រទេសចិន៕