ក្រុមហ៊ុន Apple បានប្រកាសថា ខ្លួនកំពុងតែបង្កើតនូវទីតាំងជាច្រើនកន្លែងសម្រាប់អតិថិជនរបស់ខ្លួននៅក្នុងសហរដ្ឋអាមេរិក ដែលអាចបញ្ជូននូវ iPhones របស់ពួកគេ ដើម្បីធ្វើការរុះរើម៉ាស៊ីន តាមរយៈមនុស្សយន្តកែច្នៃឡើងវិញរបស់ក្រុមហ៊ុននេះ ដែលមានឈ្មោះហៅថា Daisy នោះ។ Daisy នឹងធ្វើការទទួលខុសត្រូទៅលើការរុះរើ និងការកែច្នៃឡើងវិញសម្រាប់ iPhones ដែលប្រើប្រាស់រួចហើយ ដែលបញ្ចូនទៅកាន់ Best Buy stores នៅក្នុងសហរដ្ឋអាមេរិក និងតាមរយៈហាងចែកចាយ KPN retailers នៅក្នុងប្រទេសហូឡង់នោះ។
អតិថិជនជាច្រើន អាចធ្វើការបញ្ជូននូវស្មាតហ្វូនរបស់ពួកគេសម្រាប់ការកែច្នៃឡើងវិញបានផងដែរ នៅគ្រប់ Apple Store ឬតាមរយៈកម្មវិធី Apple Trade In program នៅលើគេហទំព័រផ្លូវការរបស់ក្រុមហ៊ុន Apple ផងដែរ។ អនុប្រធានផ្នែកបរិស្ថាន គោលនយោបាយ និងសង្គមលោក Lisa Jackson បាននិយាយនៅក្នុងសេចក្តីថ្លែងការណ៍មួយថា "ការកែច្នៃកម្រិតខ្ពស់ត្រូវតែជាផ្នែកមួយដ៏សំខាន់នៃខ្សែសង្វាក់ផ្គត់ផ្គង់អេឡិចត្រូនិចហើយក្រុមហ៊ុន Apple កំពុងត្រួសត្រាយផ្លូវថ្មីដើម្បីជួយជំរុញឧស្សាហកម្មរបស់យើងឱ្យឆ្ពោះទៅមុខ។ យើងធ្វើការយ៉ាងលំបាកដើម្បីរៀបចំផលិតផលដែលអតិថិជនរបស់យើងពឹងផ្អែកលើអស់រយៈពេលជាយូរមកហើយ។
នៅពេលវាមកដល់ពេលវេលាដើម្បីកែច្នៃឡើងវិញនោះ យើងសង្ឃឹមថាភាពងាយស្រួល និងអត្ថប្រយោជន៍នៃកម្មវិធីរបស់យើងនឹងលើកទឹកចិត្តដល់មនុស្សគ្រប់គ្នាឱ្យនាំយកឧបករណ៍ចាស់ៗរបស់ពួកគេមកទីនេះ។ " យោងតាមក្រុមហ៊ុន Apple ក្រុមហ៊ុននេះ ទទួលឧបករណ៍ជិត 1 លានគ្រឿងតាមរយៈកម្មវិធីរបស់ក្រុមហ៊ុន Apple នៅក្នុងឆ្នាំ 2018។ Daisy មានលទ្ធភាពរុះរើស្មាតហ្វូនចាស់ៗនេះបានចំនួន 1,2 លានគ្រឿងក្នុងមួយឆ្នាំ ៗក្នុងអត្រា 200 គ្រឿងក្នុងមួយម៉ោង។ នៅពេលដែលសម្ភារៈទាំងនេះត្រូវរកឃើញឡើងវិញនោះ ពួកវាត្រូវបានកែច្នៃឡើងវិញសម្រាប់ដំណើរការផលិតកម្មសារជាថ្មី។
បន្ថែមពីលើការខិតខំប្រឹងប្រែងរបស់ Daisy ក្រុមហ៊ុន Apple ក៏ប្រកាសបើកសម្ភោធន៍នូវបន្ទប់ពិសោធន៍ Material Recovery Lab ដែលមានគោលបំណង ដើម្បីស្វែងរកដំណើរការកែច្នៃឡើងវិញសម្រាប់ពេលអនាគតផងដែរ។ មជ្ឈមណ្ឌលនេះនឹងមានទីតាំងនៅ Austin រដ្ឋតិចសាស់ហើយនឹងស្វែងរកដំណោះស្រាយប្រកបដោយភាពច្នៃប្រឌិតដែលទាក់ទងនឹងផ្នែកមនុស្សយ្ត robotics និងផ្នែក machine learning ដើម្បីកែលម្អវិធីសាស្រ្តបែបបុរាណដូចជាគោលដៅថ្មីសម្រាប់ការផ្ដាច់ចេញ ការតម្រៀប និងការកំទេចចោលផងដែរ។ នៅឆ្នាំ 2018 ក្រុមហ៊ុនApple ធ្វើការកែច្នៃឡើងវិញទៅលើឧបករណ៍អេឡិចត្រូនិករបស់ខ្លួនចំនួន 7,8 លានគ្រឿង និងបង្វែរសំរាមដែលជាអេឡិចត្រូនិចបានជាង 48,000 តោន ពីកន្លែងចាក់សំរាមផងដែរសម្រាប់ការកែច្នៃនេះ៕
