ក្រុមហ៊ុនផលិតអេក្រង់របស់ប្រទេសកូរ៉េខាងត្បូង LG Display នឹងធ្វើការពន្លឿនក្នុងការផ្លាស់ប្តូរពីអេក្រង់ LCD ទៅជាអេក្រង់ OLED ជាមួយនឹងខ្សែសង្វាក់នៃការផលិតថ្មីនៅក្នុងប្រទេសចិន និងរំពឹងថា ខ្លួននឹងមានតម្រូវការកើនឡើងនៅក្នុងប្រទេសនេះ នេះបើមន្ត្រីជាន់ខ្ពស់ម្នាក់និយាយប្រាប់។ ក្រុមហ៊ុន LGD កំពុងតែសម្លឹងមើលក្នុងវិធីសាស្រ្តថ្មីៗ ជាច្រើនក្នុងការពង្រីកនូវអាជីវកម្ម OLED របស់ខ្លួននៅក្នុងទីផ្សារពិភពលោកដែលកំពុងតែមានការប្រកួតប្រជែងខ្លាំងជាមួយនឹងក្រុមហ៊ុនផលិតអេក្រង់ LCD របស់ចិននោះ។ ក្រុមហ៊ុន BOE របស់ចិនបានយកឈ្នះទៅលើក្រុមហ៊ុនបច្ចេកវិទ្យា LG Display ក្នុងការក្លាយជាក្រុមហ៊ុនផលិតអេក្រង់ LCD ធំបំផុតរបស់ពិភពលោកបើគិតទៅលើការនាំចេញរបស់ក្រុមហ៊ុននេះកាលពីឆ្នាំមុននេះ។
អនុប្រធានលោក Ko Kyu-young នៃអង្គភាពផ្សព្វផ្សាយទូទាំងពិភពលោករបស់ LGD បាននិយាយនៅក្នុងបទសម្ភាសន៍មួយជាមួយទីភ្នាក់ងារព័ត៌មាន Yonhap ថា "ទូរទស្សន៍ OLED គឺជាអ្នកផ្លាស់ប្តូរជំនួសទូរទស្សន៍ LCD ដែលមានការធ្លាក់ចុះនៅក្នុងតម្លៃទីផ្សារនោះ" ។ លោក Ko ចូលរួមក្នុងបេសកកម្មលើកកម្ពស់ទៅលើអេក្រង់ cutting-edge OLED displays របស់ក្រុមហ៊ុន LGD ក្នុងពិព័រណ៍បច្ចេកវិទ្យាព័ត៌មានវិទ្យានៅក្នុងប្រទេសចិនឆ្នាំ 2019 (China Information Technology Expo 2019) ដែលធ្វើឡើងនៅទីក្រុង Shenzhen ដោយសង្ឃឹមថានឹងពង្រីកមូលដ្ឋានរបស់ខ្លួននៅក្នុងទីផ្សាររីកលូតលាស់យ៉ាងលឿនបំផុតមួយ។
ក្នុងអំឡុងពេលនៃកម្មវិធីបច្ចេកវិទ្យាដែលមានការចូលរួមដោយអ្នកទស្សនាជាង 100.000 នាក់នោះ ក្រុមហ៊ុនផលិតអេក្រង់របស់កូរ៉េនេះ បានបង្ហាញនូវបន្ទះអេក្រង់ទំហំ 88-inch 8K Crystal Sound OLED panel ដែលអាចធ្វើឱ្យអេក្រង់នេះអាចក្លាយជា Speaker ផងដែរ។ ក្រុមហ៊ុន LGD ក៏គូសបញ្ជាក់ថា អេក្រង់ OLED Display នេះគឺមានភាពខុសប្លែកពីគូប្រជែងអេក្រង់ LCD ខណៈដែលពួកគេមានសមត្ថភាពឈានដល់វិសាលភាពនៃផលិតផលជាច្រើនដែលលើសពីទូរទស្សន៍ដោយសារតែលក្ខណៈពិសេសដែលអាចបត់បែនបានដូចបានឃើញនៅក្នុងទូរទស្សន៍ដែលអាចបត់បាន (Rollable TVs )ដែលភ្ជាប់ជាមួយនឹងបច្ចេកវិទ្យា OLED នោះ។ ការខិតខំប្រឹងប្រែងទីផ្សារក្រៅប្រទេសរបស់ខ្លួនគឺមានសារៈសំខាន់ជាពិសេសនៅឆ្នាំនេះនៅពេលដែលក្រុមហ៊ុននេះត្រូវគេកំណត់ឱ្យចាប់ផ្តើមដំណើរការរោងចក្រថ្មីមួយនៅក្វាងចូវ (Guangzhou) ក្នុងត្រីមាសទី 3 នេះ។
ក្រុមហ៊ុន LGD បាននិយាយថា ខ្លួននឹងផលិតបន្ទះ OLED ចំនួន 60,000 បន្ទះក្នុងមួយខែនៅក្នុងរោងចក្រ Guangzhou ក្នុងដំណាក់កាលដំបូងដែលនឹងបង្កើនទិន្នផលបន្ទះអេក្រង់ OLED សរុបប្រចាំខែដល់ 130,000 បន្ទះនៅឆ្នាំនេះនៅពេលដែលបូកបញ្ចូលខ្សែផលិតកម្មរបស់ខ្លួននៅរោងចក្ររបស់ខ្លួននៅប្រទេសកូរ៉េនៅ Paju ភាគខាងត្បូងនៃទីក្រុងសេអ៊ូល។
នាយកប្រតិបត្តិរបស់ក្រុមហ៊ុន LGD សម្តែងសេចក្តីសង្ឃឹមខ្ពស់សម្រាប់តម្រូវការទូរទស្សន៍ OLED TVs ដែលមានអេក្រង់ទំហំធំជាង 55 អ៊ីង និងខ្ពស់ជាងនេះនៅក្នុងប្រទេសចិនដែលជាទីផ្សារទូរទស្សន៍ធំជាងគេបំផុតនៅលើពិភពលោក ខណៈដែលចំនួនក្រុមហ៊ុនផលិតទូរទស្សន៍ចិនកំពុងតែងាកទៅរកបន្ទះអេក្រង់ OLED សម្រាប់ជំនួសឱ្យអេក្រង់ LCD របស់ខ្លួនដែលក្រុមហ៊ុនទាំងនោះមានដូចជា Skyworth, Konka, Changhong, TCL និង Hisense ។ លោក Ko និយាយថា "ប្រទេសចិននឹងដើរតួយ៉ាងសំខាន់ក្នុងការពង្រីកទីផ្សារទូរទស្សន៍ OLED TVs nហើយសូមអរគុណដល់ការកើនឡើងនូវការប្រើប្រាស់របស់វណ្ណៈកណ្តាលនៅក្នុងប្រទេសនេះ។ ខណៈដែលទ្វីបអឺរ៉ុបគឺជាទីផ្សារធំបំផុតរបស់ពិភពលោកសម្រាប់ទូរទស្សន៍ OLED TVs នោះ ប្រទេសចិននឹងចាប់យកតំបន់នេះក្នុងពេលឆាប់ៗខាងមុខនេះ៕”
