ក្រុមហ៊ុន Samsung Display បាននិយាយនៅថ្ងៃទី 10 ខែមេសាម្សិលមមិញនេះថា ខ្លួននឹងបញ្ចេញនូវអេក្រង់ដែលអាចបត់បានសម្រាប់ស្មាតហ្វូន Galaxy Fold ដែលគ្រោងនឹងបង្ហាញខ្លួននៅខែក្រោយនេះ។ ក្រុមហ៊ុននេះ បាននិយាយថា ខ្លួនបានប្រារព្ធនូវការនាំចេញដោយជោគជ័យទៅលើអេក្រង់សម្រាប់ស្មាតហ្វូនដែលអាចបត់បាននេះ នៅឯរោងចក្ររបស់ខ្លួននៅក្នុងតំបន់ Asan ដែលមានចម្ងាយប្រហែលជា 100 គីឡូម៉ែត្រពីទីក្រុងសេអ៊ូល ប៉ុន្តែក្រុមហ៊ុន មិនផ្តល់នូវព័ត៌មានលម្អិតអំពីទំហំនៃការផលិតនេះទេ។
ក្រុមហ៊ុន Samsung មានគម្រោងក្នុងការប្រកាសបង្ហាញនូវស្មាតហ្វូន Galaxy Fold នេះនៅថ្ងៃទី 26 ខែមេសាសម្រាប់ទីផ្សារពិភពលោកនៅក្នុងតម្លៃ $1,980 ហើយខ្លួននឹងបញ្ចេញនូវម៉ូដែល 5G នៅក្នុងប្រទេសកូរ៉េខាងត្បូងនៅពាក់កណ្តាលខែឧសភាផងដែរ។ ស្មាតហ្វូន Galaxy Fold មានអេក្រង់ទំហំ 7.3-inch display ហើយនៅពេលដែលវាបត់នោះ វាមានអេក្រង់ខាងក្រៅទំហំ 4.6-inch។ Samsung បានបង្កើតនូវស្រទាប់ប៉ូលីម៉ែរថ្មី និងការបង្កើតនូវអេក្រង់ដែលមានកម្រាស់ស្តើងជាងមុនដល់ទៅ 50% ជាងអេក្រង់ស្មាតហ្វូនធម្មតា។ សម្រាប់អេក្រង់ថ្មីនេះធ្វើអោយស្មាតហ្វូន Galaxy Fold អាចបត់បាន រឹងមាំ និងប្រើប្រាស់ធន់បានយូរ នេះបើតាមការបញ្ជាក់របស់ក្រុមហ៊ុន Samsung ។
ក្រុមហ៊ុនផលិតស្មាតហ្វូននេះ បាននិយាយថា អេក្រង់ធំនេះ គឺរចនាឡើងក្នុងការផ្តល់នូវវិធីសាស្រ្តថ្មីនៅក្នុងការប្រើប្រាស់ជាមួយនឹងមុខងារ Multitask ការទស្សនាវីដេអូ ការលេងហ្គេម ឬការប្រើប្រាស់នូវកម្មវិធី ៣ នៅក្នុងពេលតែមួយថែមទៀត។ អេក្រង់របស់ក្រុមហ៊ុនបច្ចេកវិទ្យា Samsung គឺធ្វើការផលិតជាលក្ខណៈទ្រង់ទ្រាយធំជាប្រភេទ OLEDs ដែលអាចបត់បានសម្រាប់ស្មាតហ្វូនជាច្រើននោះជាលើកដំបូងបំផុតនៅក្នុងឆ្នាំ ២០១៣ ហើយក៏បញ្ចេញនូវអេក្រង់ដែលមាន គែមកោង និងអេក្រង់លាតពេញគែមផងដែរ។ ក្រុមហ៊ុនផលិតស្មាតហ្វូនរបស់ប្រទេសកូរ៉េនេះ ក៏ជាអ្នកផ្គត់ផ្គង់អេក្រង់ OLEDs សម្រាប់ Apple iPhones ផងដែរ៕