ប្រទេសឥណ្ឌា៖ ថ្មីៗនេះ ក្រុមហ៊ុន Samsung ទើបតែបង្ហាញនូវស្មាតហ្វូនស៊េរីថ្មី Galaxy A-Series នៅក្នុងប្រទេសឥណ្ឌា ដែលខ្លួនរំពឹងថា នឹងក្លាយជាម៉ាកយីហោដែលធំជាងគេបំផុតនៅក្នុងប្រទេសនេះ ស្របពេលដែលស្មាតហ្វូននេះ អាចរកទិញបានហើយនៅក្នុងប្រទេសជាច្រើនរួចហើយផងដែរ។ ក្រុមហ៊ុន Samsung បានបង្ហាញសេចក្តីសង្ឃឹមថា ពួកគេនឹងរួមចំណែកនូវទឹកប្រាក់ចំណេញច្រើនជាង 4 ពាន់លានដុល្លារអាមេរិកនៅចុងឆ្នាំ 2019 នេះ នៅក្នុងប្រទេសឥណ្ឌា។ ក្រុមហ៊ុននេះ បានដំណើរការយ៉ាងល្អក្នុងការសម្រេចនូវគោលដៅនេះ ជាមួយនឹងលក់បានច្រើនជាង 2 លានគ្រឿងនៅក្នុងប្រទេសឥណ្ឌានេះ បន្ទាប់ស្មាតហ្វូន Galaxy A-Series បានបង្ហាញវត្តមាន។
លោក Ranjivjit Singh ដែលជាប្រធានផ្នែកទីផ្សារ និងអនុប្រធានជាន់ខ្ពស់របស់ក្រុមហ៊ុន Samsung នៅក្នុងប្រទេសឥណ្ឌានេះថ្មីៗនេះ បានទម្លាយថា ក្រុមហ៊ុននេះ បាននាំចេញស្មាតហ្វូនចំនួន 2 លានគ្រឿងនៃស្មាតហ្វូន Galaxy A-Series នេះគឺ A10, A30 និង A50 នៅក្នុងរយៈពេលនៃការដាក់លក់ត្រឹមតែ 40 ថ្ងៃប៉ុណ្ណោះ ដោយចាប់ផ្តើមពីថ្ងៃទី 1 ខែមីនាមក។ ប្រាក់ចំណូលនៃការលក់នេះ គឺមានការកើនឡើងដល់ទៅ 500 លានដុល្លារអាមេរិក ដែល លោក Singh ជឿជាក់ថា នេះគឺជាកំណត់ត្រាមួយសម្រាប់ប្រទេសនេះ។
ស្មាតហ្វូន A series នឹងមានវត្តមានកាន់តែច្រើនថែមទៀត ហើយនឹងបង្ហាញខ្លួនក្នុងពេលឆាប់ៗនេះផងដែររ ក្រុមហ៊ុន Samsung មានអារម្មណ៍ជឿជាក់ថា ស្មាសតហ្វូននេះ នឹងអាចសម្រេចលើសពីគោលដៅចំនួន 4 ពាន់លានដុល្លារអាមេរិកនោះ។ លោក Singh បាននិយាយថា “នៅពេលដែលស្មាតហ្វូន A-Series លេចបង្ហាញវត្តមាននៅលើទីផ្សារនោះ យើងជឿជាក់ថា គឺពិតជាសម្រេចលើសពីគោលដៅរបស់យើង។”
រហូតមកដល់ពេលនេះ Samsung បានប្រកាសដាក់លក់ស្មាតហ្វូន Galaxy A មានដូចជា Galaxy A10, Galaxy A30 និង Galaxy A50 នៅក្នុងប្រទេសឥណ្ឌាកាលពីខែមុននេះ។ ថ្មីៗនះ ក្រុមហ៊ុនក៏បន្ថែមនូវត្រកូលមួយទៀតគឺ Galaxy A20 និង Galaxy A70 ដែលគ្រោងនឹងបង្ហាញខ្លួននៅសប្តាហ៍ក្រោយនេះនៅក្នុងប្រទេសនេះ ជាមួយនឹងតម្លៃ Rs 25,000-Rs 30,000 (~$360-$430)។ សម្រាប់ស្មាតហ្វូន Galaxy A80 នឹងបង្ហាញខ្លួននៅក្នុងប្រទេសឥណ្ឌានៅខែឧសភាខាងមុខនេះ។ វានឹងមានតម្លៃប្រហែលជា Rs 45,000-Rs 50,000 (~$650-$720)។ កាលពីពេលមុននេះ ក្រុមហ៊ុន Samsung បាននិយាយថា ខ្លួននឹងបង្ហាញយ៉ាងហោចណាស់ស្មាតហ្វូន Galaxy A មួយនៅរៀងរាល់ខែរហូតដល់ខែមិថុនា ឆ្នាំនេះ។
ក្រុមហ៊ុន Samsung កំពុងតែស្ថិតនៅក្រោមសម្ពាធយ៉ាងខ្លាំងពីក្រុមហ៊ុនប្រកួតប្រជែងជាច្រើន នៅក្នុងប្រទេសចិន នៅក្នុងប្រទេសឥណ្ឌានេះ។ ក្រុមហ៊ុននេះ ក៏បាត់បង់នូវដំណែងកំពូលរបស់ខ្លួនទៅអោយក្រុមហ៊ុន Xiaomi កាលពីឆ្នាំមុននេះ។ សង្ឃឹមថា វត្តមានរបស់ស្មាតហ្វូន Galaxy A និង Galaxy M-Series ពិតជាធ្វើបានយ៉ាងល្អនៅលើទីផ្សារនោះ៕