ប្រសិនបើអ្នកក្រឡេកមើលទៅលើលទ្ធផលហិរញ្ញវត្ថុថ្មីៗនេះ្របស់ក្រុមហ៊ុន Canon, Nikon និងក្រុមហ៊ុនកាមេរ៉ាជាច្រើនទៀតនោះ បានបង្ហាញថា ឧស្សាហកម្មកាមេរ៉ាទាំងមូលកំពុងតែប្រឈមទៅនឹងវិបត្តិខ្លះៗហើយ។ ប៉ុន្តែមិនមែនគ្រប់គ្នាដែលស្ថិតនៅក្នុងវិស័យរូបភាពនេះ ជួបបញ្ហាដូចគ្នានោះទេ យោងតាមលទ្ធផលហិរញ្ញវត្ថុចុងក្រោយរបស់ក្រុមហ៊ុន Sony ទើបតែបង្ហាញនេះ គឺកំពុងតែមានដំណើរការល្អ។
ក្រុមហ៊ុន Sony ទើបតែបញ្ចេញនូវរបាយការណ៍ហិរញ្ញវត្ថុចុងក្រោយប្រចាំឆ្នាំរបស់ខ្លួន និងនៅក្នុងតួរលេខដែលគួរអោយចាប់អារម្មណ៍មែនទែន។ សម្រាប់លទ្ធផលហិរញ្ញវត្ថុ 2018 របស់ក្រុមហ៊ុន Sony (2018 FY) ដែលនិងបញ្ចប់នៅថ្ងៃទី 31 ខែឧសភា ឆ្នាំ 2019 គឺមានការបង្ហាញអំពីការកើនឡើងនៃការលក់ជាមួយនឹងទឹកប្រាក់ 14.6 ពាន់លានយ៉េនសម្រាប់អាជីវកម្ម Imaging Products and Solutions របស់ខ្លួនដែលមានតម្លៃសរុបចំនួន 670.5 ពាន់លានយ៉េន។ ទឹកប្រាក់នេះគឺមានកំណើន ២% បើធៀបជាមួយនឹងឆ្នាំមុននេះ។
ស្របពេលដែលកំណើនតួរលេខត្រមឹតែ 2% នេះ គឺប្រហែលជាមិនទាក់ទាញខ្លាំងនោះទេ ប៉ុន្តែបើក្រឡេកមើលអាជីវកម្មរបស់ក្រុមហ៊ុន Nikon វិញមានការធ្លាក់ចុះ 17.9% ខណៈពេលដែលក្រុមហ៊ុន Canon ត្រូវគេរាយការណ៍ថាមានការធ្លាក់ចុះចំនួន 11.3% បើធៀបទៅនឹងឆ្នាំមុននេះ។ ក្រុមហ៊ុន Sony បាននិយាយនៅក្នុងរបាយការណ៍នេះថា ការកើនឡើងនេះ គឺដោយសារតែមានការពង្រឹងទៅលើប្រភេត mirrorless single-lens cameras និង interchangeable lens និងការកាត់បន្ថយនូវកាមេរ៉ា Compact digital camera ដើម្បីបំពេញនូវតម្រូវការទីផ្សារនោះ។ ក្រុមហ៊ុន Sony និយាយទៀតថា ការកាត់បន្ថយទៅលើការចំណាយប្រតិបត្តិការប្រចាំឆ្នាំរបស់ខ្លួនជួយកាត់បន្ថយនូវតួរលេខប្រចាំឆ្នាំផងដែរ។
នៅក្នុងរយៈពេលមួយឆ្នាំ 2018 នេះ ក្រុមហ៊ុនស្ទើរតែទាំងអស់នៅក្នុងវិស័យកាមេរ៉ានេះ គឺមានការធ្លាក់ចុះប្រាក់ចំណេញរបស់ខ្លួនបើធៀបទៅនឹងឆ្នាំមុននេះ។ ខុសគេតែក្រុមហ៊ុន Sony បានស្វែងរកនូវវិធីសាស្រ្តថ្មីមួយ ដើម្បីរក្សាទុកនូវប្រាក់ចំណូលរបស់ខ្លួនអោយមានការកើនឡើងវិញនៅក្នុងឆ្នាំ 2018៕