សូមកុំមានការព្រួយបារម្ភអ្វី! ក្រុមហ៊ុន Huawei ពិតជាមានការយកចិត្តទុកដាក់អំពីអ្នកគ្រប់គ្នាខ្លាំងណាស់នៅក្នុងការប្រើប្រាស់ស្មាតហ្វូនរបស់ Huawei ។ កាលម្សិលមិញនេះ ក្រុមហ៊ុន Huawei បានធ្វើការឆ្លើយតបជាផ្លូវការបន្ទាប់ពីការហាមប្រាមរបស់ក្រុមហ៊ុន Google ដោយនិយាយថា ប្រព័ន្ធប្រតិបត្តិការ Android គឺជាប្រភេទ OS Open Source ហើយអ្នកប្រើប្រាស់របស់ខ្លួននៅជុំវិញពិភពលោកមិនចាំបាច់មានការព្រួយបារម្ភអំពីរឿងនេះនោះទេ។
ក្រុមហ៊ុននេះ ក៏បានបញ្ជាក់ជាផ្លូវការថា ខ្លួននឹងបន្តក្នុងការផ្គត់ផ្គង់ទៅលើការអាប់ដេតសុវត្ថិភាពសម្រាប់ស្មាតហ្វូន Huawei និង Honor ទាំងអស់របស់ខ្លួននៅជុំវិញពិភពលោក។ ក្រុមហ៊ុននេះ និយាយទៀតថា “Huawei គឺរួមចំណែកយ៉ាងសំខាន់សម្រាប់ការអភិវឌ្ឍ និងកំណើនទៅលើ Android នៅជុំវិញពិភពលោក។ នៅក្នុងនាមជាម្នាក់នៃដៃគូរបស់សហការរបស់ក្រុមហ៊ុនបច្ចេកវិទ្យា Android នោះ យើងបានធ្វើការយ៉ាងជិតស្និទ្ធិនៅលើ open-source platform របស់ពួកគេដើម្បីធ្វើការអភិវឌ្ឍទៅលើប្រព័ន្ធ Ecosystem ដែលពិតជាមានសារៈសំខាន់សម្រាប់អ្នកប្រើប្រាស់ និងឧស្សាហកម្មនេះ។
ក្រុមហ៊ុនបច្ចេកវិទ្យា Huawei នឹងនៅតែបន្តក្នុងការផ្គត់ផ្គង់នូវការអាប់ដេតទៅលើសុវត្ថិភាព និងសេវាកម្មក្រោយការលក់សម្រាប់ស្មាតហ្វូន និងថេប្លេតរបស់ Huawei និង Honor រួមជាមួយនឹងស្តុកដែលមាននៅជុំវិញពិភពលោកផងដែរ។ យើងនឹងបន្តក្នុងការបង្កើតនូវ software ecosystem ដែលមានសុវត្ថិភាព និងស្ថេរភាពដើម្បីផ្តល់នូវបទពិសោធន៍ល្អបំផុតសម្រាប់អ្នកប្រើប្រាស់នៅជុំវិញពិភពលោក។”
នេះគឺជាបទពិសោធន៍មួយដ៏ជូចត់បំផុតរបស់ក្រុមហ៊ុន Huawei ដែលពឹងផ្អែកទៅលើ Android សម្រាប់ការលក់ស្មាតហ្វូនរបស់ខ្លួននៅក្រៅទីផ្សាររបស់ចិននោះ។ ស្មាតហ្វូន Android ដំណើរការនូវប្រព័ន្ធប្រតិបត្តិការ Android OS ជាមួយនឹង Google Apps ។ ក្រុមហ៊ុនបច្ចេកវិទ្យា Huawei ក៏ប្រើប្រាស់នូវ Version មួយទៀតរបស់ Android ដោយគ្មាន Google Apps នោះទេ នៅក្នុងប្រទេសចិន៕