ក្រុមហ៊ុន Apple ទើបតែបានធ្វើការប្រកាសចេញកាសស្តាប់ស៊េរីថ្មីម៉ាក Beats Solo 3 Special Edition ដែលហៅថា “The Club Collection” ជាមួយជម្រើស 4 ពណ៌គឺក្រហម ស លឿង និងទឹកសមុទ្រ ហើយពណ៌នីមួយៗត្រូវបានលាយបញ្ចូលគ្នាចំនួន 3 ពណ៌ដែលធ្វើអោយកាន់តែមានភាពស្រស់ស្អាត និងបង្ហាញចេញនូវភាពទំនើបស៊ីវិល័យក្នុងការប្រើប្រាស់សម្រាប់មនុស្សសម័យទំនើប។
កាសស្តាប់ Beats Solo 3 Special Edition នេះខុសពីកាល Beats Solo 3 ធម្មតាដោយសារតែវាមានថ្មកាន់ប្រើប្រាស់ស្តាប់កម្សាន្តបានដល់ទៅ 40 ម៉ោងឯណោះ នេះក៏ដោយសារតែវាបានប្រើប្រាស់បំពាក់នូវឈីប Apple’s W1 ហើយរឹតតែពិសេសបំផុតនោះគឺឈីបនេះភ្ជាប់មកជាមួយនូវបច្ចេកវិទ្យាសាកបញ្ចូលថ្មល្បឿនលឿន “Apple's Fast Fuel technology” ថែមទៀតផង ដែលមានលទ្ធភាពសាករយះពេល 5 នាទីអាចកាន់ប្រើបានជិត 3 ម៉ោង។ កាសស្តាប់ស៊េរីថ្មី The Club Collection Beats Solo 3 Special Edition នេះមានចេញលក់ចាប់ពីថ្ងៃនេះទៅ ប៉ុន្តែសម្រាប់តែការលក់នៅលើបណ្តាញអនឡាញតែប៉ុណ្ណោះដោយមានតម្លៃចាប់ពី $200 ឡើងទៅ។
ចំពោះលោកអ្នកដែលចង់សាកល្បងប្រើប្រាស់ដំបូងជាមួយកាសស្តាប់ត្រចៀក Beats Solo 3 “The Club Collection”នេះនឹងអាចរកជាវបាននៅតាមបណ្តាហាងលក់រាយនៅថ្ងៃទី 12 ខែមិថុនានេះ។ សូមបញ្ជាក់ថា កាសស្តាប់ The Club Collection Beats Solo 3 Special Edition នេះ Apple បានចាប់ដៃសហការជាមួយកញ្ញា NAYVA ដែលជាតារាបង្ហាញម៉ូតដ៏ល្បីឈ្មោះ និងជាពិធីករក្នុងកម្មវិធី Beauty Show រួមនឹងតារាល្បីឈ្មោះលើបណ្តាញកម្សាន្ត Youtube ចំនួន 4 នាក់ផ្សេងដទៀតសម្រាប់ការផ្សព្វផ្សាយនៅក្នុងវីដេអូថ្មីរបស់ពួកគេ៕