យោងតាមទិន្នន័យចុងក្រោយបំផុតចេញពីក្រុមហ៊ុន IHS Markit បានបញ្ជាក់ថា ក្រុមហ៊ុន Samsung Display ទទួលបានចំណាត់ថ្នាក់គ្របដណ្តប់ជាក្រុមហ៊ុនចែកចាយអេក្រង់ស្មាតហ្វូនរបស់ពិភពលោកនៅក្នុងត្រីមាសទី 1 ឆ្នាំនេះ។ ក្រុមហ៊ុន នេះ បានក្លាយជាក្រុមហ៊ុនកំពូល ដោយសារតែក្រុមហ៊ុនផលិតស្មាតហ្វូនជាច្រើនធ្វើការផ្លាស់ប្តូរទៅកាន់អេក្រង់ OLED Panels សម្រាប់ស្មាតហ្វូនថ្នាក់ប្រណិតរបស់ពួកគេនោះ។ ក្រុមហ៊ុន Samsung ទទួលបាននូវការបញ្ជាការកម្មង់ទិញអេក្រង់ច្រើន។
ក្រុមហ៊ុនផ្គត់ផ្គង់អេក្រង់របស់ក្រុមហ៊ុនបច្ចេកវិទ្យា Samsung ត្រូវគេប៉ាន់ស្មានថានឹងធ្វើការលក់អេក្រង់របស់ស្មាតហ្វូនបានចំនួន 3.4 ពាន់លានដុល្លារអាមេរិកនៅក្នុងត្រីមាសទី 1 ដែលបញ្ចប់នៅក្នុងខែមីនាឆ្នាំ 2019 នេះ ដែលមានប្រហែលជា 40.2% សម្រាប់ទីផ្សារនៃអេក្រង់ស្មាតហ្វូននេះនៅក្នុងរយៈពេលនេះ។ ក្រុមហ៊ុន Samsung Display ក៏មានការផ្គត់ផ្គង់ទៅលើអេក្រង់ OLED Panels ប្រហែលជា 80% នៅលើទីផ្សារ។ ព័ត៌មាននេះ គឺពិតជាគួរអោយចាប់អារម្មណ៍ខ្លាំងមែនទែនដែលថាចំណែកទីផ្សារសម្រាប់ត្រីមាសទី 1 របស់ក្រុមហ៊ុន Samsung គឺមានប្រហែលជា 6.6% ដែលទាបជាងរយៈពេលដូចគ្នាកាលពីឆ្នាំមុននេះ។ ប៉ុន្តែទោះជាយ៉ាងណាក៏ដោយនោះ ក្រុមហ៊ុននេះ នៅតែអាចធ្វើការបង្កើនចំណែកទីផ្សារច្រើនជាង 40% សម្រាប់រយៈពេល 8 ខែជាប់ៗគ្នា។
រហូតមកទល់នឹងពេលនេះ គ្មានគូប្រកួតប្រជែងណាដែលមានចំណែកទីផ្សារខ្ពស់ដូចជាក្រុមហ៊ុនបច្ចេកវិទ្យានេះទេ។ ក្រុមហ៊ុន Japan Display ជាប់ចំណាត់ថ្នាក់លេខ 2 ជាមួយនឹងចំណែកទីផ្សារចំនួន 12.3% ខណៈពេលដែលក្រុមហ៊ុន BOE របស់ចិនដែលមានចំណែកទីផ្សារចំនួន 11.9%។ អ្វីដែលគួរអោយចាប់អារម្មណ៍នោះ ចំណែកទីផ្សាររបស់ក្រុមហ៊ុន BOE គឺមានច្រើនជាងទ្វេរដងបើធៀបជាមួយនឹងរយៈពេលដូចគ្នាទៅនឹងឆ្នាំមុននេះ។
សូមជំរាបថា កាលពីឆ្នាំមុននេះ ក្រុមហ៊ុន Samsung ត្រូវបានគេរាយការណ៍ថា បានធ្វើការបង្កើតនូវរោងចក្រក្នុងការផលិតអេក្រង់ Super OLED នៅក្នុងប្រទេសកូរ៉េខាងត្បូងផងដែរ ដែលមានសមត្ថភាពក្នុងការផលិតច្រើនជាង 30% លើរោងចក្រ A3 នៅក្នុងប្រទេសចិន។ ក្រុមហ៊ុន Samsung ក៏បានធ្វើការវិនិយោគទឹកប្រាក់រាប់ពាន់លានដុល្លារអាមេរិកទៅលើរោងចក្រថ្មីនេះថែមទៀតផង។ ទោះជាយ៉ាងណាក៏ដោយនោះ ក៏នូវមានការរាយការណ៍ផងដែរថា ក្រុមហ៊ុន Samsung បានសម្រេចចិត្តទុកចោលគំរោងនេះសិនលុះត្រាតែមានតម្រូវការខ្ពស់ខ្លាំងនៅលើទីផ្សារនេះ៕
