នៅពេលនេះ ការកម្ចាត់ចោលនូវរន្ធ Notch នៅលើអេក្រង់នោះ បានក្លាយជាគោលដៅចុងក្រោយរបស់ក្រុមហ៊ុនផលិតស្មាតហ្វូនជាច្រើន។ ការរចនារូបរាងផុសឡើង រន្ធប្រហោងនៅលើអេក្រង់ និង Notch ដែលមានរូបរាងថ្មីកាន់តែតូចជាងមុននោះគឺជានិន្នាការ ដែលមានការពេញនិយមខ្លាំងជាងគេ ប៉ុន្តែសម្រាប់ដំណោះស្រាយទាំងនេះគឺមិនទាន់អស្ចារ្យនៅឡើយនោះទេ។ ពេលនេះ ក្រុមហ៊ុន Oppo ដែលឈានមុខគេទៅលើការអភិវឌ្ឍនៃរបកគំហើញថ្មីនោះក៏ប្រកាសបង្ហាញនៅលើសារមួយកាលពីសប្តាហ៍មុននេះថា ខ្លួនកំពុងតែធ្វើការនៅលើស្មាតហ្វូនដែលបំពាក់នូវកាមេរ៉ា Selfies នៅក្រោមអេក្រង់តែម្តង។
យើងរំពឹងថា បច្ចេកវិទ្យានេះ នឹងក្លាយជាការពិតនៅលើស្មាតហ្វូននោះ នៅថ្ងៃនេះ ក្រុមហ៊ុន Oppo ក៏ប្រកាសអំពីព្រឹត្តិការណ៍មួយរបស់ខ្លួនដែលនឹងធ្វើឡើងនៅថ្ងៃទី 26 ខែមិថុនានេះ នៅក្នុងព្រឹត្តិការណ៍ MWC 2019 Shanghai ។ រូបភាព Poster របស់ព្រឹត្តិការណ៍នេះ គឺបានបង្ហាញយ៉ាងច្បាស់ថា ស្មាតហ្វូនស៊េរីថ្មីនេះ នឹងប្រើប្រាស់នូវបច្ចេកវិទ្យាកាមេរ៉ាក្រោមអេក្រង់ ហើយវានឹងបង្ហាញខ្លួននៅក្នុងព្រឹត្តិការណ៍នេះ ជាក់ជាមិនខាន។ រូបភាពនេះអាចជាគំរូរបស់ស្មាតហ្វូននេះមិនមែនជារូបរាងពិតរបស់វាដែលនឹងបង្ហាញខ្លួននៅលើទីផ្សារនោះទេ។ ប៉ុន្តែនេះ គឺជារបកគំហើញនៃបច្ចេកវិទ្យាថ្មីនៃក្រុមហ៊ុន Oppo វាមិនយូរនោះទេដែលស្មាតហ្វូនថ្មីនេះនឹងបង្ហាញខ្លួននៅលើទីផ្សារនោះ។
យើងនៅមិនទាន់ច្បាស់នោះទេថា បច្ចេកវិទ្យាកាមេរ៉ាក្រោមអេក្រង់របស់ក្រុមហ៊ុន Oppo ដំណើរការបែបណានោះ ប៉ុន្តែតាមការបញ្ជាក់របស់លោក Brian Shen អនុប្រធានរបស់ក្រុមហ៊ុន Oppo បានបង្ហោះនៅលើ Weibo ថា សម្រាប់កម្រិតគុណភាពអុបទិកនៃកាមេរ៉ាក្រោមអេក្រង់នេះ ក៏មានផ្នែកខ្លះដែលបាត់បង់ផងដែរ ប៉ុន្តែបច្ចេកវិទ្យាថ្មីនេះត្រូវការពេលវេលាដើម្បីអោយវាកាន់តែល្អឥតខ្ចោះថែមទៀត។ នេះគឺជាការបង្ហាញថា បច្ចេកវិទ្យាថ្មីរបស់ Oppo នេះប្រហែលជាមិនទាន់រួចរាល់សម្រាប់ធ្វើការផលិតទ្រង់ទ្រាយធំនោះទេ។ យើងគ្រប់គ្នា គឺជាអ្នកគាំទ្រទៅលើស្មាតហ្វូនដែលមានអេក្រង់ពេញគែម និងការប្រើប្រាស់នូវបច្ចេកវិទ្យាថ្មីសម្រាប់កាមេរ៉ា Selfie នៅក្រោមអេក្រង់នេះ ខណៈពេលដែលបច្ចេកវិទ្យាស្កេនក្រយ៉ៅដៃក្រោមអេក្រង់គឺមានរួចហើយនៅលើទីផ្សារនោះ។
យើងនៅមិនទាន់មានសង្ឃឹមខ្ពស់នៅឡើយទេទៅលើបច្ចេកវិទ្យានេះ គឺត្រូវធ្វើការរង់ចាំរហូតទាល់តែស្មាតហ្វូននេះបង្ហាញវត្តមានជាមុនសិន។ ក្រៅពីក្រុមហ៊ុន Oppo នេះ ក្រុមហ៊ុន Xiaomi ក៏រកឃើញនូវដំណោះស្រាយទៅលើការបញ្ចប់នូវការប្រើប្រាស់ Notch នេះផងដែរ។ ក្រុមហ៊ុននេះ ក៏បង្ហាញនូវគំរូរបស់ស្មាតហ្វូន Mi 9 ដែលមានភ្ជាប់ជាមួយនឹងកាមេរ៉ាបង្កប់ខ្លួនថែមទៀតបើធៀបជាមួយនឹងស្មាតហ្វូនធម្មតានោះ។ ក្រុមហ៊ុននេះនៅមិនទាន់បញ្ជាក់អំពីកាលបរិច្ឆេទនៃការប្រកាសបង្ហាញស្មាតហ្វូននេះនៅឡើយទេ ប៉ុន្តែវានឹងបង្ហាញនូវរូបភាព Teaser ឆាប់ៗនេះមិនខាន៕