កាលពីថ្ងៃទី 13 ខែមិថុនានេះ ក្រុមហ៊ុនបច្ចេកវិទ្យាយក្ស Samsung Electronics បានបញ្ជាក់ថា ខ្លួននឹងប្រកាសបង្ហាញនូវអេក្រង់ថ្មីមួយទៀតសម្រាប់អ្នកប្រើប្រាស់ជាប្រភេទ Modular MicroLED Display ដែលមានទំហំធំបំផុតរហូតដល់ទៅ 292 អ៊ីង នៅក្នុងទីផ្សារជាច្រើនរបស់ពិភពលោកនៅខែក្រោយនេះ។
ក្រុមហ៊ុននេះ បានបង្ហាញនូវទូរទស្សន៍ The Wall Luxury នេះនៅក្នុងព្រឹត្តិការណ៍ InfoComm 2019 ដែលជាការដាក់បង្ហាញឧស្សាហកម្មសោតទស្សន៍ដែលធ្វើឡើងនៅក្នុងរដ្ឋ Florida ផងដែរ។ អេក្រង់នេះ មានទំហំចាប់ផ្តើមពី 73 inches ដែលមានកម្រិតភាពច្បាស់ 2K រហូតទៅដល់ទំហំ 292 inches ដែលមានកម្រិតភាពច្បាស់ 8K ហើយនេះគឺជាអេក្រង់ដែលមានកម្រិតស្តង់ដារភាពច្បាស់ខ្ពស់បំផុត។
កម្រិតអេក្រង់ MicroLED Displays នេះ គឺមានភ្ជាប់ជាមួយនឹងភ្លើង Microscopic LEDs ដែលបង្កើតជាភិចសែលមួយៗភ្លឺច្បាស់ក្នុងការទស្សនាបំផុត។ ក្រុមហ៊ុន Samsung បាននិយាយថា បច្ចេកវិទ្យា MicroLED TV ថ្មីនេះផ្តល់នូវគុណសម្បត្តិជាច្រើននៅលើកញ្ចក់ OLED នេះ និងអនុញ្ញាតអោយអ្នកប្រើប្រាស់ជាច្រើនអាចធ្វើការកំណត់ទៅលើទំហំ និងរូបរាងនៃទូរទស្សន៍នេះបានផងដែរ។ ជាមួយនឹងកម្រាស់តិចជាង 30mm នោះ វាពិតជាស្តើង ការឌីស្សាញជាមួយនឹងគែមស្ទើរតែគ្មាន និងការប្រើប្រាស់នូវស៊ុម Frame ដែលអនុញ្ញាតអោយអេក្រង់នេះស៊ីគ្នាជាមួយនឹងបរិបទដែលនៅជុំវិញវាបានថែមទៀតផង។
អ្នកប្រើប្រាស់ជាច្រើននឹងរីករាយជាមួយនឹងទូរទស្សន៍អេក្រង់ធំនេះ ហើយជាពិសេសអ្នកអាចបើកវាចោលបាននៅពេលដែលអ្នកមិនទស្សនានោះទូរទស្សន៍នេះ នឹងចូលទៅកាន់ Ambient Mode ដែលធ្វើការបង្ហាញនូវរូបភាពសិល្បៈជាច្រើនភ្ជាប់ជាមួយនឹងស៊ុមឌីជីថលយ៉ាងស្រស់ស្អាតថែមទៀត។ ខណៈពេលដែលទូរទស្សន៍នេះក៏មានភ្ជាប់ជាមួយនឹងប្រព័ន្ធសំឡេង Sound Systems ដ៏ប្រណិតដោយ Harman Luxury Audio ឬ Steinway Lyngdorf ដែលត្រូវគេប្រើប្រាស់ជាកញ្ចប់ Home Cinema Package ដែលពិតជាផ្តល់នូវគុណភាពសំឡេងពិរោះគ្មានពីរនោះទេ។ សម្រាប់តម្លៃរបស់ទូរទស្សន៍នេះគឺផ្អែកទៅលើទំហំអេក្រង់ និងប្រភេទប្រព័ន្ធសំឡេងដ៏ពិរោះរបស់វា នេះបើតាមការបញ្ជាក់របស់ក្រុមហ៊ុន៕
