យោងតាមព័ត៌មានចេញពី Reuter បានផ្សាយកាលពីពេលថ្មីៗនេះ បានអោយដឹងថា ក្រុមហ៊ុនបច្ចេកវិទ្យាយក្ស Huawei បានប្រាប់ទៅកាន់ក្រុមហ៊ុន Verizon Communications Inc ថា ក្រុមហ៊ុនចែកចាយរបស់សហរដ្ឋអាមេរិកមួយនេះ គួរតែបង់ថ្លៃអាជ្ញាបណ្ណប៉ាតង់ច្រើនជាង 230 ទៅលើឧបករណ៍ទូរគមនាគមន៍របស់ក្រុមហ៊ុនខ្លួន ដែលទឹកប្រាក់សរុបនៃប៉ាតង់នេះ គឺមានទំហំប្រហែលជា 1 ពាន់លានដុល្លារអាមេរិក។
សារព័ត៌មាន Wall Street Journal ក៏បានរាយការណ៍ផងដែរថា ក្រុមហ៊ុន Verizon គួរតែធ្វើការបង់ប្រាក់នេះ ដើម្បីធ្វើការដោះស្រាយទៅលើបញ្ហានៃប៉ាតង់នេះ បើតាមការរាយការណ៍របស់នាយកប្រតិបត្តិផ្នែកអាជ្ញាប័ណ្ណរបស់ក្រុមហ៊ុន Huawei ដែលបានសរសេរកាលពីខែកុម្ភៈកន្លមកនេះ។ ប៉ាតង់នេះ គឺបានគ្របដណ្តប់ទៅលើឧបករណ៍បណ្តាញ Network ច្រើនជាង 20 នៃក្រុមហ៊ុនចែកចាយជាច្រើនរបស់ក្រុមហ៊ុន Huawei រួមមានក្រុមហ៊ុនបច្ចេកវិទ្យាជាច្រើនទៀតរបស់សហរដ្ឋអាមេរិក ប៉ុន្តែក្រុមហ៊ុនចែកចាយលក់ទាំងអស់នោះ ក៏មានក្រុមហ៊ុន Verizon ផងដែរ។ សម្រាប់ក្រុមហ៊ុនមួយចំនួនក្នុងចំណោមក្រុមហ៊ុនបច្ចេកវិទ្យាជាច្រើនទៀតនោះ ក៏ទាក់ទងទៅផ្ទាល់តែម្តងជាមួយនឹងក្រុមហ៊ុន Huawei ។
សារព័ត៌មាន Journal បានរាយការណ៍បន្ថែមថា ប៉ាតង់នេះ គឺមានចាប់ពីឧបករណ៍បណ្តាញស្នូល Core Network ហេដ្ឋារចនាសម្ព័ន្ធខ្សែអេឡិចត្រូនិចរហូតដល់បច្ចេកវិទ្យា IoT ។ តម្លៃទៅលើអាជ្ញាបណ្ណប៉ាតង់ច្រើនជាង 230 នេះគឺប្រហែលជាជាង 1 ពាន់លានដុល្លារអាមេរិក។ ក្រុមហ៊ុនប Huawei កំពុងតែប្រយុទ្ធប្រឆាំងទៅនឹងរដ្ឋាភិបាលរបស់សហរដ្ឋអាមេរិកច្រើនជាងមួយឆ្នាំហើយ ជាមួយនឹងការលើកឡើងពីអ្នកជំនាញសុវត្ថិភាពជាតិ ស្តីពីការព្រួយបារម្ភអំពី Backdoors នៅលើ Routers, Switches និងឧបករណ៍ជាច្រើនទៀតរបស់ក្រុមហ៊ុន Huawei ដែលអនុញ្ញាតអោយប្រទេសចិន ធ្វើចារកម្មទៅលើការទំនាក់ទំនងរបស់សហរដ្ឋអាមេរិក។ ក្រុមហ៊ុន Huawei បានធ្វើការបដិសេធថា ខ្លួនមិនធ្វើការជួយធ្វើចារកម្មរបស់សហរដ្ឋអាមេរិកនោះទេ។
ក្រុមហ៊ុនជាច្រើនរួមមាន ក្រុមហ៊ុន Verizon ក៏បានជូនដំណឹងទៅកាន់រដ្ឋាភិបាលរបស់សហរដ្ឋអាមេរិក ហើយជម្លោះនេះ ក៏មានការកើនឡើងរវាងចិន និងសហរដ្ឋអាមេរិកផងដែរ។ សម្រាប់ការទាមទារទៅលើតម្លៃទៅលើអាជ្ញាបណ្ណប៉ាតង់នេះ គឺជាការប្រយុទ្ធគ្នានៃភូមិសាស្រ្តនយោបាយចិន និងសហរដ្ឋអាមេរិកជាជាងការទាមទារទៅលើតម្លៃប៉ាតង់នេះ។ ក្រុងវ៉ាស៊ីនតោន ក៏កំពុងស្វែងរកការធ្វើបត្យាប័នប្រធានប្រតិបត្តិការហិរញ្ញវត្ថុរបស់ក្រុមហ៊ុន Huawei លោកស្រី Meng Wanzhou ពីប្រទេសកាណាដា បន្ទាប់ពីត្រូវបានចាប់ខ្លួននៅទីក្រុង Vancouver កាលពីខែធ្នូឆ្នាំមុននេះ តាមដីការបស់សហរដ្ឋអាមេរិក។ ចាប់តាំងពីពេលនោះ មកប្រទេសចិន បានដាក់សម្ពាធលើប្រទេសកាណាដា ដោយបញ្ឈប់ការនាំចូលប្រេងឆាពីប្រទេសកាណាដា ហើយនៅក្នុងខែឧសភានេះ ក៏ផ្អាកការអនុញ្ញាតឱ្យក្រុមហ៊ុនលក់សាច់ជ្រូកធំៗ ចំនួនពីរផងដែរ៕