ថ្មីៗនេះ ក្រុមហ៊ុនផលិតរថយន្ត Honda បានទម្លាយនូវព័ត៌មានលម្អិតនៃរថយន្តអេឡិចត្រូនិច Honda E របស់ខ្លួន ដែលមានរូបរាងតូច និងគួរអោយស្រឡាញ់មែនទែន ប៉ុន្តែព័ត៌មានលម្អិតរបស់រថយន្តនេះ គឺដឹងតិចមែនទែន។ រថយន្តនេះ មានភ្ជាប់ជាមួយនឹងកាមេរ៉ានៅចំហៀងជំនួសអោយកញ្ចក់ និងមានភ្ជាប់ជាមួយនឹងតាប្លូឈើដ៏ប្រណិត ប៉ុន្តែក្រុមហ៊ុននេះ នៅមិនទាន់ទម្លាយព័ត៌មានអ្វីដែលច្រើនជាងនេះនោះទេ អំពីរថយន្តនេះរួមមានថាមពលថ្ម និងទម្ងន់នៃការផ្ទុកផងដែរ។
ក្រុមហ៊ុននេះ បាននិយាយថា កម្លាំងម៉ាស៊ីនរបស់រថយន្តនេះគឺចេញពីកង់ខាងក្រោយ និងមានភ្ជាប់ជាមួយនឹងកង់ទាំង 4 គ្រាប់ជាលក្ខណៈ Independent Suspension ដែលធ្វើអោយការបើកបរកាន់តែងាយស្រួល និងផាសុកភាពបំផុត។ សម្រាប់ថាមពលថ្មរបស់រថយន្តនេះ គឺស្ថិតនៅផ្នែកកណ្តាលនៃរថយន្តនេះតែម្តង ហើយវាស្ថិតនៅក្រោមផ្នែកខាងក្រោមនៃរថយន្តដែលមានន័យថា ទម្ងន់របស់រថយន្តនេះគឺមានលំនឹង និងកម្លាំងបើកលឿនល្អក្នុងការប្រើប្រាស់។ រថយន្តនេះមាន កម្លាំងថាមពលថ្ម 35.5 kWh Lithium-ion ដែលស្ថិតនៅលើរថយន្តនេះអាចធ្វើការបញ្ចូលតាមរយៈ Type 2 AC connection ឬ CCS2 DC rapid charger បានផងដែរ។ ការបញ្ចូលថាមពលថ្មនៅលើរថយន្តនេះ គឺពិតជាលឿន ត្រឹមតែ 30 នាទីអាចពេញបានដល់ទៅ 80% ។
រថយន្តនេះ អាចធ្វើដំណើរបានចម្ងាយ 124 ម៉ាយ៍ ដែលវាល្មមគ្រប់គ្រាន់សម្រាប់ការធ្វើដំណើរកម្សាន្តរបស់អ្នកដូចជាទៅកាន់ទីក្រុងជាដើម ប៉ុន្តែវានៅមិនទាន់បានឆ្ងាយសម្រាប់ដំណើរកម្សាន្តឆ្ងាយៗនោះទេ។ ប៉ុន្តែប្រសិនបើអ្នកចង់ស្វែងរកនូវរថយន្តតូចសម្រាប់ធ្វើដំណើរនៅក្នុងទីក្រុងនោះ អ្នកអាចរើសយករថយន្ត Honda E នេះបាន។ រថយន្ត Honda E នេះនឹងដាក់លក់នៅចុងឆ្នាំនេះ ហើយការកម្មង់ទិញមុនទៅលើរថយន្តនេះ គឺបើកដំណើរការហើយ ប៉ុន្តែគួរអោយស្តាយ គឺមានតែនៅក្នុងតំបន់អ៊ឺរ៉ុបតែប៉ុណ្ណោះ៕