ថ្មីៗនេះ រដ្ឋាភិបាលរបស់កោះតៃវ៉ាន់ បានអនុម័តថវិកា ដែលមានទឹកប្រាក់ចំនួន 20,4 ពាន់លានដុល្លារតៃវ៉ាន់ស្មើនឹង 647,72 លានដុល្លារអាមេរិក ដើម្បីជួយសម្រួលដល់ការបង្កើតសេវាកម្មបន្ថែម និងសេវាកម្មជាច្រើនទៀតនៅលើបណ្ដាញនៃបច្ចេកវិទ្យា 5G ក្នុងរយៈពេល 4 ឆ្នាំខាងមុខនេះ នេះបើតាមការបញ្ជាក់ចេញពីបុគ្គលិកជាច្រើន។ កម្មវិធីនេះ គឺមានឈ្មោះថា Taiwan 5G Mobile Plan ដែលមានគោលបំណងដើម្បីបណ្តុះបណ្តាលមនុស្ស 4000 នាក់ ការបង្កើតក្រុមច្នៃប្រឌិតថ្មីចំនួន 10 ក្រុម និងបង្កើតជាប្រព័ន្ធអេកូដែលរួមមានអ្នកផ្គត់ផ្គង់ បន្ទះសៀគ្វី ម៉ូឌុល អង់តែន ឧបករណ៍ចុងក្រោយ បច្ចេកវិទ្យាកុំព្យូទ័រ Edge Computing និងដំណោះស្រាយទៅលើប្រព័ន្ធ System ដើម្បីបង្កើតតម្លៃផលិតកម្មរហូតដល់ 50 ពាន់លានដុល្លារតៃវ៉ាន់ក្នុងមួយឆ្នាំ នេះបើតាមសម្តីរបស់លោក Zse-hong Tsai លេខាធិការប្រតិបត្តិនៃការិយាល័យវិទ្យាសាស្រ្ត និងបច្ចេកវិទ្យារបស់គណៈរដ្ឋមន្រ្តី។
ប្រភពព័ត៌មានខាងលើបានបន្តថា រដ្ឋាភិបាលរបស់កោះតៃវ៉ាន់ បានត្រៀមខ្លួនរួចជាស្រេច ដើម្បីបញ្ចេញរលកហ្វ្រេកង់ជាលើកដំបូងដែលរួមមាន 1.800 MHz, 3.500 MHz និង 2.8 MHz សម្រាប់ការប្រើប្រាស់បណ្តាញនៃបច្ចេកវិទ្យា 5G ។ លោក Tsai បានបន្ថែមទៀតថា បច្ចុប្បន្នរដ្ឋាភិបាល បាននឹងកំពុងតែរៀបចំនីតិវិធីដេញថ្លៃសម្រាប់ការចេញផ្សាយកម្រិត Spectrums តាមដែលអាចធ្វើបានផងដែរ។ ទន្ទឹមនឹងនេះដែរ ក្រុមហ៊ុននៅក្នុងស្រុកមួយចំនួនដូចជា Quanta Computer, Advantech, Gigabyte Technology, Accton Technology, Sercomm, Alpha Networks, Gemtek, Wistron NeWeb និង HTC ក៏ដាក់ពាក្យដើម្បីធ្វើការពិសោធន៍ និងសាកល្បងសម្រាប់កម្មវិធី 5G Applications ដែលពាក់ព័ន្ធផងដែរ នេះបើតាមការបញ្ជាក់របស់លោក Tsai។
ជាមួយគ្នានេះ រដ្ឋាភិបាល ក៏លើកទឹកចិត្តដល់ការបង្កើតវេទិកាសហការគ្នានៃបច្ចេកវិទ្យា 5G Platforms នេះផងដែរ ដោយក្រុមហ៊ុន Chunghwa Telecom (CHT) និង Far EasTone Telecommunications (FET) កំពុងដឹកនាំក្រុមការងារថ្នាក់ជាតិចំនួន 2 ក្រុមទៅលើបច្ចេកវិទ្យា 5G នេះដើម្បីបង្កើនល្បឿននៃការផលិតផលិតផលជាច្រើន និងដំណោះស្រាយទៅលើបច្ចេកវិទ្យា 5G ។ លោក Tsai បានធ្វើការកត់សម្គាល់ថា ដោយមានការគាំទ្រពីរាជរដ្ឋាភិបាល ក្រុមហ៊ុនថ្មីមួយចំនួនបានបង្កើតដំណោះស្រាយសម្រាប់កម្មវិធី IoT និង 5G ដូចជា Touch Cloud សម្រាប់វិភាគរូបភាព AI, Kingkit Technology (Webduino) សម្រាប់វេទិកា AIoT cloud, Pampkin Studio សម្រាប់បច្ចេកវិទ្យា VR និងដំណោះស្រាយហ្គេម និង AgPro សម្រាប់ប្រព័ន្ធបាញ់ទឹកទំនើបសម្រាប់ឧស្សាហកម្មកសិកម្មផងដែរ៕
