បើទោះបីជាក្រុមហ៊ុន Huawei ត្រូវបានគេរាយការណ៍ថា បាននឹងកំពុងតែធ្វើការនៅលើ OS សម្រាប់ស្មាតហ្វូនរបស់ខ្លួនក៏ដោយ ថ្មីៗនេះ ក្រុមហ៊ុននេះ ត្រូវបានគេដឹងថា ក៏បានស្វែងរកនូវកន្លែងផ្សេងទៀតផងដែរ សម្រាប់ធ្វើការផ្លាស់ប្តូរទៅលើប្រព័ន្ធប្រតិបត្តិការ Android។ ក្រុមហ៊ុននេះ ក៏ប្រហែលជាប្រើប្រាស់នូវប្រព័ន្ធប្រតិបត្តិការ Sailfish OS ដែលបង្កើតនៅក្នុងប្រទេសរុស្សីផងដែរ នេះបើតាមការបញ្ជាក់របស់សារព័ត៌មាន The Bell ថ្មីៗនេះ។
នាយកប្រតិបត្តិលោក Guo Ping របស់ក្រុមហ៊ុន Huawei បានធ្វើការពិភាក្សាអំពីភាពដែលអាចទៅរួចក្នុងការប្រើប្រាស់នូវប្រព័ន្ធប្រតិបត្តិការ Sailfish OS នៅលើឧបករណ៍របស់ក្រុមហ៊ុន Huawei ជាមួយនឹងលោក Konstantin Noskov ដែលជារដ្ឋមន្ត្រីផ្នែកអភិវឌ្ឍបច្ចេកវិទ្យាឌីជីថល ទំនាក់ទំនង និងផ្សព្វផ្សាយរបស់ប្រទេសរុស្សី។ ផ្អែកទៅលើការសន្ទនានេះ ក្រុមហ៊ុន Huawei ធ្វើការតេស្ត៍រួចទៅហើយនៅលើឧបករណ៍ជាច្រើនដែលធ្វើការតម្លើងមករួចជាស្រេចនូវប្រព័ន្ធប្រតិបត្តិការ Aurora OS ។ លោក Ping បានរាយការណ៍អំពីកិច្ចពិភាក្សានេះ ដែលអាចទៅរួចក្នុងការផ្លាស់ប្តូរនូវផលិតកម្មរបស់ខ្លួនទៅកាន់ប្រទេសរុស្សីនោះ។ ផលិតកម្មរួមគ្នានេះគឺមាននៅលើបន្ទះឈីប និងឧបករណ៍ជាច្រើនទៀត។
ក្រុមហ៊ុន Huawei និងអ្នកផ្គត់ផ្គង់សេវាកម្មឌីជីថលរបស់រុស្សីគឺ Rostelcom បានបដិសេធ មិនធ្វើអធិប្បាយទៅលើកិច្ចពិភាក្សានេះនោះទេ ប៉ុន្តែក្រុមហ៊ុននេះ បាននិយាយថា វាគឺបើកទូលាយក្នុងការធ្វើការជាមួយនឹងអ្នកអភិវឌ្ឍកម្មវិធីជាច្រើនទៅលើដំណោះស្រាយទូរស័ព្ទនេះ។ ការចងសម្ព័ន្ធមេត្រីនៃក្រុមហ៊ុនបច្ចេកវិទ្យាទាំងពីរនេះគឺលោក Grigory Berezkin ដែលជាអ្នកជំនួញរុស្សីរបស់ក្រុមហ៊ុន Rostelcom ដែលធ្វើការគ្រប់គ្រងទៅលើអ្នកអភិវឌ្ឍកម្មវិធីនៅពីក្រោយប្រព័ន្ធប្រតិបត្តិការ Aurora OS នេះ។
សូមបញ្ជាក់ថា ប្រព័ន្ធប្រតិបត្តិការ Sailfish OS គឺផ្អែកទៅលើ Linux ដែលអភិឌ្ឍដោយក្រុមការងារដែលនៅពីក្រោយការផលិតប្រព័ន្ធប្រតិបត្តិការ MeeGo OS របស់ក្រុមហ៊ុន Nokia ។ Sailfish OS ធ្វើការតម្លើងស្រាប់នៅលើឧបករណ៍ចំនួន 4 នោះគឺ Sony Xperia X, XA2, XA2 Plus និង XA2 Ultra ។ អ្វីដែលធ្វើអោយប្រព័ន្ធប្រតិបត្តិការ Sailfish OS នេះ មានភាពទាក់ទាញសម្រាប់អ្នកប្រើប្រាស់នោះគឺដោយសារតែវាជាប្រភេទ Open-Source ។ អ្នកណាក៏អាចទទួលបាននូវ Source Code ហើយអាចធ្វើការបង្កើតនូវកម្មវិធី Software ដែលពួកគេពេញចិត្តបានផងដែរ។ លក្ខណៈពិសេសរបស់ប្រព័ន្ធប្រតិបត្តិការ Sailfish OS នេះ គឺផ្តោតទៅលើឯកជនភាព។ Jolla បានធ្វើការប្រមូលតែព័ត៌មាន ដែលត្រូវការសម្រាប់ដំណើរការតែប៉ុណ្ណោះនៅលើសេវាកម្មរបស់វា ហើយវាមិនលក់ទិន្នន័យរបស់អ្នកទៅកាន់ភាគីទី 3 ដោយគ្មានការអនុញ្ញាតនោះទេ។ Jolla មិនធ្វើការប្រមូលនូវទិន្នន័យដែលអ្នកមិនព្រមនោះទេ។ នេះគឺជាផ្នែកមួយដ៏ឆ្លាតវៃនៃក្រុមហ៊ុន Huawei នៅក្នុងការជ្រើសរើសនូវប្រព័ន្ធប្រតិបត្តិការ Sailfish OS នេះ៕
