គ្រប់គ្នាប្រាកដជាស្គាល់ហើយថា Manchester City គឺក្លឹបបាល់ទាត់របស់អង់គ្លេស ដែលមានកេរ្ត៍ឈ្មោះ ល្បីល្បាញបំផុតនៅលើពិភពបាល់ទាត់។ នៅពេលនេះ ក្លឹបមួយ បានធ្វើការបន្តកុងត្រាថ្មីក្នុងភាពជាដៃគូជាមួយនឹងក្រុមហ៊ុនផលិតស្មាតហ្វូន Tecno Mobile។ កិច្ចព្រមព្រៀងថ្មីនេះ ត្រូវបានដៃគូទាំងពីរបង្ហាញនៅក្នុងព្រឹត្តិការណ៍មួយដ៏អស្ចារ្យរបស់ Tecno នៅក្នុងទីក្រុង Delhi ប្រទេសឥណ្ឌា ហើយម៉ាកយីហោស្មាតហ្វូននេះ គឺស្ថិតក្នុងភាពជាដៃគូពិភពលោកជាមួយនឹងក្លឹបកំពូល Premier League នេះទៅលើផលិតផលថេប្លេត និងស្មាតហ្វូននេះ ដែលភាពជាដៃគូនេះ គឺបានចាប់ផ្តើមតាំងពីឆ្នាំ 2016 មកម្ល៉េះ។
ការសហការគ្នានេះ នឹងមើលឃើញការចែកចាយមាតិកាឌីជីថល ដែលដឹកនាំដោយអ្នកគាំទ្ររួមទាំងការប្រកួតប្រជែងទៅលើការថតរូបភាពបាល់ទាត់ និងការប្រកួតនៅថ្ងៃឈប់សម្រាកផងដែរ។ លោក Damian Willoughby អនុប្រធានជាន់ខ្ពស់នៃភាពជាដៃគូនៅក្លឹបបាល់ទាត់ City Football Group (CFG) បាននិយាយយ៉ាងដូច្នេះថា "ក្លឹប Manchester City មានមោទនភាពក្នុងការធ្វើជាដៃគូជាមួយស្ថាប័នដែលមានមហិច្ឆតា និងភាពច្នៃប្រឌិតខ្ពស់ជាច្រើន ដូច្នេះ យើងមានការរំភើបយ៉ាងខ្លាំងដែលបានប្រកាសពីការពង្រីកភាពជាដៃគូដ៏ជោគជ័យរបស់យើងជាមួយនឹងក្រុមហ៊ុនផលិតស្មាតហ្វូន Tecno Mobile”។
"ក្នុងអំឡុងពេលបីឆ្នាំកន្លងទៅនេះ យើងបានសហការគ្នាលើគំនិតផ្តួចផ្តើមដ៏រំភើបមួយចំនួនដែលបានភ្ជាប់ទំនាក់ទំនង និងការកម្សាន្តផ្តល់នូវភាពសប្បាយដល់អ្នកគាំទ្ររបស់យើងទូទាំងពិភពលោកជាពិសេសនៅក្នុងប្រទេសឥណ្ឌា និងគាំទ្រដល់ការរីកចម្រើនដ៏គួរអោយចាប់អារម្មណ៍នៃអាជីវកម្ម និងស្លាកសញ្ញារបស់ក្រុមហ៊ុន Tecno នេះ"។
លោក Stephen Ha ដែលជានាយកគ្រប់គ្រងក្រុមហ៊ុន Tecno Mobile ប្រចាំប្រទេសឥណ្ឌា ក៏បានមានប្រសាសន៍ដែរថា "ភាពជាដៃគូជាមួយក្លឹបបាល់ទាត់ Manchester City ដែលជាម្ចាស់ជើងឯកនៃក្របខ័ណ្ឌ Premier League 2108-2109 នេះ នឹងជួយបង្កើនថែមទៀតនូវការទទួលស្គាល់ម៉ាកយីហោ និងតម្លៃនៃឈ្មោះ របស់យើងជាក្រុមហ៊ុនទូរស័ព្ទចល័តនាំមុខគេនៅជុំវិញពិភពលោកផងដែរ" ។ នៅក្នុងការបន្តសារជាថ្មីទៅលើភាពជាដៃគូនេះ ម៉ាកយីហោស្មាតហ្វូននេះ បានចាប់ផ្តើមជាមួយនឹងការប្រកួតរត់ Tecno Race សម្រាប់ក្លឹប Manchester City។ ការប្រកួតបែបនិម្មិតសម្រាប់អ្នកប្រើប្រាស់ជាច្រើន នៅក្នុងប្រទេសឥណ្ឌា គឺការលើកទឹកចិត្តពួកគេឱ្យធ្វើយ៉ាងហោចណាស់ក៏ 1 ម៉ឺនជំហានក្នុងមួយថ្ងៃ ដើម្បីគ្របដណ្តប់ចម្ងាយទៅកាន់ទីក្រុង Manchester៕