កាលពីថ្ងៃទី 11 ខែកក្កដានេះ ក្រុមហ៊ុន Hanwha Systems ដែលជាជាអង្គភាពការពារជាតិ និងជាក្រុមហ៊ុនប្រមូលផ្តុំគីមីរបស់ក្រុមហ៊ុន Hanwha Group បាននិយាយថា ខ្លួននឹងវិនិយោគទឹកប្រាក់ចំនួន 25 លានដុល្លារនៅក្នុងក្រុមហ៊ុនយានយន្តរត់លើអាកាសរបស់សហរដ្ឋអាមេរិកដើម្បីពង្រីកអាជីវកម្មរបស់ខ្លួន។ ក្រុមហ៊ុននេះ បានបញ្ជាក់ឱ្យដឹងក្នុងសេចក្តីថ្លែងការណ៍មួយថា ការវិនិយោគនៅក្នុងយានយន្តរត់លើអាកាស K4 Aeronautics គឺជាផ្នែកមួយនៃចលនារបស់ខ្លួន ដើម្បីឆ្លើយតបទៅនឹងតម្រូវការដ៏មានសក្តានុពលសម្រាប់យានយន្តរត់លើអាកាស PAVs នាពេលអនាគត។
ក្រុមហ៊ុនដែលមានមូលដ្ឋាននៅរដ្ឋកាលីហ្វ័រនីញ៉ានេះ គឺមានប៉ាតង់ និងបច្ចេកវិទ្យាជាច្រើន ដែលមានសារៈសំខាន់ចាំបាច់ក្នុងការផលិតនូវ PAV ដែលប្រសិទ្ធិភាពខ្ពស់ និងសម្លេងរំខានទាបដែលអាចប្រើជាតាក់ស៊ីនៅលើអាកាសបាន។ ទីផ្សារនៃ PAV ត្រូវបានគេរំពឹងថា នឹងឈានដល់ 1,5 ពាន់ពាន់លានដុល្លារអាមេរិកនៅត្រឹមឆ្នាំ 2040 ខណៈក្រុមហ៊ុន Airbus ក្រុមហ៊ុន Boeing និងក្រុមហ៊ុនជាច្រើនទៀត បានចាប់ផ្តើមប្រកួតប្រជែង ដើម្បីអភិវឌ្ឍយានយន្តរត់លើអាកាស PAV ក្នុងគ្រាមានតម្រូវការចម្រុះសម្រាប់រថយន្តដឹកជញ្ជូន នេះបើតាមទិន្នន័យរបស់ក្រុមហ៊ុន Morgan Stanley ។
សូមជំរាបថា ធនាគារវិនិយោគសកល បានរំពឹងថា ក្រុមហ៊ុនអាមេរិកជាច្រើន ដូចជាក្រុមហ៊ុន Uber Technologies នឹងផ្តល់សេវាតាក់ស៊ីរត់នៅលើអាកាសនៅដើមឆ្នាំ 2025 សម្រាប់អតិថិជនទូទៅផងដែរ។ ក្រុមហ៊ុន Hanwha បានថ្លែងថា ការវិនិយោគនេះ មិនទាន់ត្រូវបានអនុម័តដោយអាជ្ញាធរអាមេរិកទេ៕