នៅពេលដែលនិយាយអំពីក្រុមហ៊ុន Apple គ្មាននរណាម្នាក់ដឹងអំពីខ្សែចង្វាក់ផ្គត់ផ្គង់របស់ក្រុមហ៊ុនមួយនេះច្បាស់ជាងអ្នកវិភាគ Ming-Chi Kuo ដែលមកពីក្រុមហ៊ុន TF Securities នោះទេ ហើយរបាយការណ៍វិភាគចុងក្រោយគាត់បានបង្ហាញពីចំនុចគួរឱ្យចាប់អារម្មណ៍មួយដែលថា “iPhone ជំនាន់ក្រោយនឹងមានស្នាមឆកក្បាលអេក្រង់តូចជាងពេលបច្ចុប្បន្ន ប៉ុន្តែការផ្លាស់ប្តូរពង្រួមស្នាមឆកនេះនឹងមិនកើតឡើងនៅឆ្នាំនេះទេប៉ុន្តែវានឹងកើតមានសម្រាប់ iPhone ឆ្នាំក្រោយ (iPhone 2020)”។ ទូរស័ព្ទ iPhone X ដែលចេញកាលពីឆ្នាំ 2017 គឺជាតួរអង្គក្នុងការបង្កើតនូវនិន្នាការស្មាតហ្វូនអេក្រង់មានឆក (Notch) ដំបូងគេក្នុងលោក ក្រោយមកស្នាមឆកអេក្រង់នេះពិតជាទទួលបានការពេញនិយមខ្លាំងរហូតធ្វើអោយក្រុមហ៊ុនផលិតស្មាតហ្វូនស្ទើរមួយពិភពលោកបានចម្លងតាម ប៉ុន្តែឆ្នាំ 2019 នេះនិន្នាការស្មាតហ្វូនអេក្រង់ឆកហាក់លែងសូវពេញនិយមដូចមុនព្រោះថាក្រុមហ៊ុនផលិតស្មាតហ្វូនទាំងឡាយបានរិះរកវិធីសាស្រ្តក្នុងការឆ្នៃក្បាលឆកអេក្រង់អោយនៅកាន់តែតូច ឬក៏លុបបំបាត់វាចោលទាំងស្រុងតែម្តងដោយជំនួសមកវិញនូវកញ្ចក់អេក្រង់បង្ហាញពេញផ្ទៃស្ទើរគ្មានគែមអេក្រង់ថែមទៀតផង។
ចំពោះក្រុមហ៊ុន Apple ទោះជាយ៉ាងណាស្នាមឆកនៅផ្នែកខាងលើអេក្រង់នេះមិនមែនជាសិល្បះនៃការរចនាលម្អនោះទេ ប៉ុន្តែវាមានសារះសំខាន់ក្នុងការបង្កប់នូវប្រព័ន្ធកាមេរ៉ា TrueDepth ដែលជាម៉ូឌែលស្មុគស្មាញក្នុងការសំគាល់ទម្រង់ផ្ទៃមុខបែប 3D របស់អ្នកប្រើប្រាស់អោយមានភាពស៊ីជម្រៅ និងផ្តល់នូវសុវត្ថិភាពខ្ពស់បំផុតក្នុងការដោះសោទូរស័ព្ទ ការទូទាត់លើការចំនាយផ្សេងៗ តាមរយះ App Pay និងការចូលទៅប្រើប្រាស់សេវាកម្មផ្សេងៗបានឆាប់រហ័សផងដែរ។ ហើយដោយសារតែម៉ូឌុលកាមេរ៉ានេះមានទំហំធំ ដូច្នេះការលាក់វាគឺជាការងារលំបាកបំផុតសម្រាប់ Apple។ ប៉ុន្តែ Apple នឹងរកវិធីសាស្ត្រថ្មីមួយក្នុងការកាត់បន្ថយកន្លែងដាក់បង្កប់ម៉ូឌុលសែនស័ 3D TrueDepth របស់ខ្លួន ដូច្នេះ iPhone 2020 នឹងត្រូវកាត់បន្ថយទំហំឆកអេក្រង់អោយរួមតូចជាង iPhone បច្ចុប្បន្ន ឬ iPhone 2019។
របាយការណ៍ដដែលបន្តថា “ក្រុមហ៊ុន Apple ក៏កំពុងធ្វើការឆ្ពោះទៅរកគោលដៅធំជាងមុនផងដែរក្នុងការរកវិធីសាស្រ្តថ្មីដែលឈានទៅលុបចោលនូវស្នាមឆកអេក្រង់ iPhone ទាំងស្រុងថែមទៀតផង ហើយវិធីសាស្ត្រថ្មីដើម្បីធ្វើដូចនោះបានគឺត្រូវបង្កប់ម៉ូឌុលសែនស័រទាំងអស់នៅក្រោមអេក្រង់អោយវាដំណើរការតាមរយះអេក្រង់ ប៉ុន្តែវានឹងត្រូវបានលាក់នៅពេលទស្សនាវីដេអូ ឬទស្សនីយភាពផ្សេងៗ។ ក្នុងរបាយការណ៍ក៏បាននិយាយផងដែលថា “Apple នឹងធ្វើការបន្ថែមស្រទាប់កែវលែនកាមេរ៉ាក្រោយនៅលើកាមេរ៉ាគោលឡើងដល់ 7 ស្រទាប់ដែលបង្កើន មួយស្រទាប់បន្ថែមពីលើ 6 ស្រទាប់ដែលបានប្រើនាពេលបច្ចុប្បន្ន។ បន្ថែមពីលើរបាយការណ៍វិភាគរបស់លោក Kuo ស្ថាប័ន Credit Suisse ក៏បានព្យាករណ៍ផងដែរថា “ពួកយើងនឹងបានឃើញ iPhone ដែលចេញឆ្នាំក្រោយមានឆកអេក្រង់តូចជាងមុន ដោយសំអាងទៅលើការត្រួតពិនិត្យពីចង្វាក់ក្រុមហ៊ុនដែលផ្គត់ផ្គង់អេក្រង់អោយ Apple ដោយក្រុមហ៊ុនទាំងនោះកំពុងធ្វើការផលិតអេក្រង់ដែលមានគែមបែបកោងហៅថា “Edge to Edge” ជាមួយកាត់បន្ថយស្នាមឆកផងដែរ”។ ស្ថាប័នដដែលបានបញ្ជាក់ទៀតថា Apple ក៏នឹងបញ្ចេញ iPhone ដែលប្រើប្រាស់បច្ចេកវិទ្យាស្កែនក្រយ៉ៅម្រាមដៃក្រោមអេក្រង់ (Optical fingerprint reader) ដូចទៅនឹងទូរស័ព្ទ OnePlus 7 Pro និង Huawei P30 Pro ផងដែរ។
ហើយនៅថ្ងៃអនាគត iPhone នឹងប្រើច្របាច់បញ្ចូលគ្នាទាំងបច្ចេកវិទ្យា Face ID System AND និង Optical Fingerprint reader ថែមទៀតផង។ គួរអោយដឹងផងដែរថាកាលពីដើមខែកក្ដដានេះមានលេចលឺព័ត៌មានចចាមអារ៉ាមមួយបាននិយាយថា “Apple គ្រោងចេញលក់ iPhone ស៊េរីថ្មីមួយដែលបំពាក់នូវបច្ចេកវិទ្យាស្កែនក្រយ៉ៅម្រាមដៃក្រោមអេក្រង់ “Under-the-screen fingerprint scanner” សម្រាប់តែទីផ្សារប្រទេសចិន ព្រោះថាសមាសភាគនេះមានតម្លៃធូរថ្លៃជាង Face ID ដូច្នេះវានឹងនាំមកនៅតម្លៃដ៏ធូរថ្លៃបំផុតមួយសម្រាប់ប្រជាជនចិនក្នុងការជាវ iPhone យកទៅប្រើប្រាស់៕
