ស្មាតហ្វូនដែលមានអេក្រង់បត់បានកំពុងតែធ្វើអោយរំជើបរំជួលក្នុងទីផ្សារស្មាតហ្វូនមិនធម្មតានោះទេក្នុងឆ្នាំនេះ ហើយបច្ចុប្បន្ននេះមានស្មាតហ្វូនអេក្រង់បត់ចំនួនពីរម៉ូដែលចេញពីក្រុមហ៊ុនស្មាតហ្វូនធំៗចំនួនពីរបានបង្ហាញខ្លួនជាផ្លូវការណ៍រួចហើយគឺ Samsung Galaxy Fold និង Huawei Mate X ក៏ប៉ុន្តែស្មាតហ្វូនទាំងពីរម៉ូដែលនេះមិនទាន់ចេញដាក់លក់ជាផ្លូវការណ៍នៅឡើយទេ។ ហើយជាបន្តបន្ទាប់ក៏មានលេចលឺព័ត៌មានថ្មីៗដែលបាននិយាយពីក្រុមហ៊ុនផលិតស្មាតហ្វូនល្បីៗជាច្រើនទៀតដែលចាប់អារម្មណ៍ទៅលើការផលិតស្មាតហ្វូនអេក្រង់បត់ដូចគ្នានេះដែរក្នុងនោះមានដូចជា Apple, SONY, LG និងក្រុមហ៊ុនផលិតស្មាតហ្វូនក្នុងប្រទេសចិនមួយចំនួនទៀតផងដែរ។ ដោយឡែកពេលថ្មីៗនេះក្រុមហ៊ុន LG របស់កូរ៉េខាងត្បូងទើបតែទទួលបាននូវប៉ាតង់ថ្មីដើម្បីផលិតស្មាតហ្វូនអេក្រង់បត់បានក្នុងពេលអនាគតរបស់ខ្លួន។
គួររំលឹកដែរថាក្រុមហ៊ុន LG បានធ្វើការស្នើរសុំប៉ាតង់ក្នុងការផលិតស្មាតហ្វូនអេក្រង់បត់នេះយូរយារណាស់មកហើយ។ ហើយកាលពីដើមឆ្នាំ 2014 និងកំឡុងឆ្នាំ 2013 ក្រុមហ៊ុន LG ត្រូវបានគេមើលឃើញថាមានសកម្មភាពឈានមុខគេក្នុងការអភិវឌ្ឍន៍ទៅលើស្មាតហ្វូនអេក្រង់បត់នេះ ប៉ុន្តែមិនទាន់ទទួលបានលទ្ធផលផ្លែផ្កានៅឡើយទេមកទល់នឹងពេលនេះ។ ប៉ុន្តែចាប់តាំងពីពេលនោះមកឃើញបែកធ្លាយចេញនូវគំរូស្មាតហ្វូនអេក្រង់បត់ (Foldable Phone) និងស្មាតហ្វូនអេក្រង់លូនចេញ (Rollable Phone) របស់ LG បន្តបន្ទាប់។ ហើយក៏ជាពាក្យចចាមអារាមបាននិយាយថា LG នឹងសហការនៃភាពជាដៃគូជាមួយក្រុមហ៊ុនសំខាន់មួយចំនួនក្នុងប្រើប្រាស់សមាសភាគសម្រាប់ស្មាតហ្វូនបត់របស់ខ្លួនថែមទៀតផង។ ហើយអ្វីដែលគួរអោយចាប់អារម្មណ៍បំផុតនោះគឺថាក្រុមហ៊ុននឹងធ្វើការផ្គត់ផ្គង់នូវអេក្រង់បត់ Flexible OLED Display ទៅអោយក្រុមហ៊ុន Apple សម្រាប់ប្រើនៅលើ iPhone 2020ផងនៅឆ្នាំក្រោយនេះ។
កាលពីដើមឆ្នាំ 2019 នេះក្នុងព្រឹត្តិការណ៍ MWC ក្រុមហ៊ុនផលិតអេក្រង់ LG Display ដែលជាបុត្រសម្ព័ន្ធរបស់ LG បានបង្ហាញចេញពីគំរូបស្មាតធីវីដែលប្រើប្រាស់អេក្រង់លូនចេញរួចហើយដែរមានឈ្មោះថា “Rollable OLED TVs”។ ដូចនេះបង្ហាញកាន់តែយ៉ាងច្បាស់ថាស្មាតហ្វូនអេក្រង់បត់ និងស្មាតហ្វូនអេក្រង់លូនចេញរបស់ LG អាចនឹងបង្ហាញវត្តមាននាពេលអនាគតដ៏ខ្លីខាងមុខនេះ។ ប្រភពបានបង្ហើបថាគំរូស្មាតហ្វូនអេក្រង់បត់បរបស់ LG អាចនឹងត្រូវបង្ហាញក្នុងព្រឹត្តិការណ៍ IFA2019 ខែក្រោយនេះ ហើយគេរំពឹងថាវានឹងលេចចេញជារូបរាងពិតប្រាកដក្នុងពេលឆាប់ៗនេះ។ ងាកមកមើលពីឯកសារប៉ាតង់ថ្មីដែលបានបង្ហាញលម្អិតពីគំរូព្រាងស្មាតហ្វូអេក្រង់បត់ហៅថា “Z-FOLD TYPE FOLDABLE SMARTPHONE” ដែលត្រូវបានបង្ហាញនៅលើ WIPO (World Intellectual Property Office) database។
ទិន្នន័យ Database ដែលគួសគំរូព្រាងស្មាតហ្វូនបែបរូបភាព sketches បានបង្ហាញថាវាមានកន្លងកាត់ហៅថា “Hinge” ចំនួនពីរដោយមួយប្រើសម្រាប់ផ្ទៃអេក្រង់បត់ (Main Display” និងមួយទៀតប្រើលើបន្ទះអេក្រង់ដាច់ចេញមួយគន្លាក់ហៅថាអេក្រង់ខាងក្រៅ ឬអេក្រង់ទីពីរ “Second Display”។ គំរូស្មាតហ្វូនបត់នេះក៏បានបង្ហាញផងដែរពីរកាមេរ៉ាខាងក្រោមមានចំនួន 2 គ្រាប់, ប៊ូតុង Power និងប៊ូតុងឡើងចុះសំឡេងស្ថិតនៅលើគែមខាងស្តាំ ហើយរន្ធបំពងសំឡេងស្ថិតនៅលើគែមខាងក្រោម។ ហើយអ្វីដែលគួរអោយចាប់អារម្មណ៍នោះគឺថាវាមិនមានរន្ធដោត USB-Type-C នោះទេ ដូចនេះគឺសន្និដ្ឋានថាស្មាតហ្វូននេះគឺប្រើប្រាស់បច្ចេកវិទ្យាសាកថ្មតាមរយះ Wireless Charge តែប៉ុណ្ណោះ ហើយយើងក៏មិនឃើញមានកាមេរ៉ា Selfie និងបច្ចេកវិទ្យាស្កែនម្រាមដៃ (Fingerprint reader) ផងដែរ ដោយគេសង្ស័យថាទាំងកាមេរ៉ា Selfie និង Fingerprint reader អាចនឹងមានមួយបង្កប់ក្នុងអេក្រង់ផ្ទាល់តែម្តង។
គំរូព្រាងស្មាតហ្វូននៅលើប៉ាតង់ថ្មីនេះហាក់បានបញ្ជាក់យ៉ាងច្បាស់ថាស្មាតហ្វូនអេក្រង់បត់ម៉ូដែល “LG Z-FOLD” គឺវាពិតជានឹងលេចរូបរាងឡើងពិតប្រាកដក្នុងពេលអនាគតដ៏ខ្លីខាងមុខនេះ។ តាមមតិរបស់ខ្ញុំយល់ឃើញថាគំរូស្មាតហ្វូនអេក្រង់បត់ច្រើនគន្លាក់របស់ LG មួយនេះវាពិតជាមានភាពអស្ចារ្យបំផុត ហើយប្រសិនបើវាបង្ហាញវត្តមានពិតប្រាកដក្នុងពេលអនាគតដ៏ខ្លីខាងមុខនេះពិតមែននោះវារឹតតែអស្ចារ្យបំផុតក្នុងពិភពបច្ចេកវិទ្យាស្មាតហ្វូនអេក្រង់បត់ក្នុងពេលអនាគត៕
