ថ្មីៗនេះ យោងតាមរបាយការណ៌របស់ Canalys ដែលជាក្រុមហ៊ុនដ៏ធំមួយមានជំនាញសិក្សាទីផ្សារ បានឲ្យដឹងថា ក្រុមហ៊ុនស្មាតហ្វូនរបស់ប្រទេសចិន គឺបានត្រួតត្រាទីផ្សារអាស៊ីអាគ្នេយ៍ក្នុងត្រីមាសទី 2 ឆ្នាំ 2019 កន្លងទៅនេះ ដោយទទួលបាន 19 លានគ្រឿង ដែលធៀបទៅនឹងការដឹកជញ្ជូនទូរស័ព្ទសរុបសម្រាប់ក្រុមហ៊ុនទាំងអស់មានចំនួន 30.7 លានគ្រឿង។ Samsung នៅតែរក្សាជំហរឈានមុខគេ ដោយបញ្ចេញបាន 7.7 លាន ប៉ុន្តែត្រូវបានតាមយ៉ាងកៀកកិតដោយ Oppo ជាមួយចំនួន 7.3លាន។ ស្មាតហ្វូន vivo គឺបាមនគ្រប់គ្រងបាន 4.1លាន ហើយក្រុមហ៊ុន Xiaomi ឈរនៅលំដាប់ទី 4 នៅចំនួន 3.7លាន។ Realme បានឈានដល់កំពូលទាំង 5 ជាលើកដំបូង ជាមួយចំនួន 1.6 លាន។
នៅក្នុងរបាយការណ៌បានបញ្ជាក់ទៀតថា ទីផ្សារអាស៊ីអាគ្នេយ៍ ត្រូវបានគ្របដណ្ដប់ដោយស្មាតហ្វូនថ្នាក់កណ្តាល និងថ្នាក់ទាបមានចំនួន 75% នៃស្មាតហ្វូនទាំងអស់ដែលមានតម្លៃចាប់ពី 200 ដុល្លារ ដែលធ្វើឱ្យក្រុមហ៊ុនផលិត ដូចជា Apple នៅឆ្ងាយពីរូបភាពនេះ។ ទីផ្សារមួយនេះ ក៏ត្រូវបានគេនិយាយថា មានកង្វះភាពស្មោះត្រង់របស់ម៉ាកសញ្ញា និងមានកេរ្តិ៍ឈ្មោះផងដែរ ។ បើក្រឡេកមកមើលទីផ្សាររួមវិញ គឺថា ក្រុមហ៊ុន Samsung នៅតែជាមេដឹកនាំឈានមុខគេគ្រប់ទីកន្លែង។ ស្មាតហ្វូន A Series និង M Series ម៉ូដែលថ្មីរបស់ Samsung ត្រូវបានគេមើលឃើញថា គឺចលករថ្មី ដែលបានជួយឱ្យសម្រេចបាននូវការនាំចេញកើនឡើង 5%។ ក្រុមហ៊ុននេះ បានជ្រើសរើសប្រទេសថៃ ធ្វើជាម្ចាស់ផ្ទះនៃការដាក់លក់ទូរស័ព្ទ Galaxy A របស់ខ្លួនជាសកល ដោយទទួលស្គាល់យ៉ាងច្បាស់ ពីសារសំខាន់នៃទីផ្សារអាស៊ីអាគ្នេយ៍៕
