បើទោះបីជាពេលនេះ យើងកំពុងតែឈានជិតដល់ចុងឆ្នាំ 2019 ក៏ដោយ ក៏ក្រុមហ៊ុនផលិតស្មាតហ្វូនជាច្រើន នៅតែបញ្ចេញនូវស្មាតហ្វូនដែលមានអេក្រង់ធំៗជាច្រើនរបស់ខ្លួនផងដែរ ហើយនៅឆ្នាំនេះ យើងនឹងឃើញមានវត្តមានរបស់ស្មាតហ្វូនស៊េរីថ្មីរបស់ក្រុមហ៊ុន Xiaomi ផងដែរ។ បើយោងទៅតាមប្រភពជាច្រើន បានបញ្ជាក់ថា ស្មាតហ្វូន Redmi Note 8 អាចនឹងបង្ហាញខ្លួននៅមុនខែធ្នូខាងមុខនេះ។
នៅថ្ងៃនេះ រូបភាពមួយរបស់ស្មាតហ្វូននេះ គឺមានការទម្លាយអំពីការឌីស្សាញនូវផ្នែកខាងក្រោយរបស់ស្មាតហ្វូន Xiaomi Redmi Note 8 ខណៈពេលដែលវិញ្ញាបនបត្រ 3C ក៏មានការទម្លាយនូវមុខងាររបស់ស្មាតហ្វូននេះផងដែរ។ នៅក្នុងរូបភាពនេះ គឺមានការទម្លាយថា ស្មាតហ្វូននេះ នឹងមានកាមេរ៉ាខាងក្រោយ 4 គ្រាប់ ប៉ុន្តែនៅមិនទាន់មានព័ត៌មានលម្អិតអំពីកាមេរ៉ានេះនៅឡើយទេ។ មានការលើកឡើងថា សេនស័រទី 4 គឺមានលក្ខណៈខុសប្លែកពីស្មាតហ្វូន Xiaomi Redmi Note 7 ដែលមានការបន្ថែមមុខងារ ToF ដលនឹងជួយអោយការថតកាន់តែអស្ចារ្យថែមទៀត។
តាមប្រភពខាងលើ ស្មាតហ្វូននេះ មិនមានប្រព័ន្ធស្កេនក្រយ៉ៅដៃនៅខាងក្រោយនោះទេ អាចនឹងប្រើប្រាស់នូវសេនស័រក្រោមអេក្រង់ជាក់ជាមិនខាន។ ដូចអ្វីដែលអ្នកអាចមើលឃើញនៅក្នុងរូបភាពនេះ ស្មាតហ្វូន Xiaomi ស៊េរីថ្មីនេះ បានបង្ហាញខ្លួននៅលើបណ្តាញ Network ជាមួយនឹងលេខកូដ M1908C3IE និង M1908C3IC។ ស្មាតហ្វូនទាំងពីរនេះ ទទួលបាននូវវិញ្ញាបនបត្រ 3C ចេញពីប្រទេសចិនរួចហើយ។
មានការលើកឡើងថា ស្មាតហ្វូននេះគឺប្រើប្រាស់នូវការបញ្ចូលថាមពលថ្ម 5V/2V កម្រិត 10W និងស្មាតហ្វូនមួយទៀត អាចនឹងប្រើប្រាស់នូវ MDY-10-CE charger ដែលទ្រទ្រង់ទៅលើបច្ចេកវិទ្យាកម្រិត 18W fast charging។ ស្មាតហ្វូននេះ ត្រូវបានគេរំពឹងថា គឺជា Xiaomi Redmi Note 8។ ស្មាតហ្វូននេះ អាចនឹងជាស្មាតហ្វូនមួយដាច់ដោយឡែកមួយទៀត ប៉ុន្តែវានៅមិនទាន់មានការបញ្ជាក់អ្វីនៅឡើយទេក្នុងពេលនេះ។ ស្មាតហ្វូន Mi Mix 4ត្រូវបានគេដឹងថានឹងបង្ហាញខ្លួននៅក្នុងឆ្នាំនេះផងដែរ។
ស្មាតហ្វូន Xiaomi Redmi Note 8 អាចនឹងក្លាយជាស្មាតហ្វូនដំបូងបំផុតដែលប្រើប្រាស់នូវបន្ទះឈីប MediaTek Helio G90T។ នេះគឺជាបន្ទះឈីបដែលប្រើប្រាស់សម្រាប់ការលេងហ្គេម។ នៅក្នុងខណៈពេលនេះ សម្រាប់លក្ខណៈសម្បត្តិលម្អិតជាច្រើនទៀតរបស់ស្មាតហ្វូននេះនៅមិនទាន់ទម្លាយអោយដឹងនៅឡើយទេ៕
