សម្រាប់ពេលនេះ ស្មាតហ្វូន 5G ជាច្រើន បានបង្ហាញខ្លួននៅលើទីផ្សារហើយ មើលទៅគឺពិតជាមានតម្លៃថ្លៃមែនទែនសម្រាប់ប្រើប្រាស់។ ទោះជាយ៉ាងណាក៏ដោយ ក៏មានការបង្ហាញថា នឹងមានវត្តមានរបស់ស្មាតហ្វូន 5G ដំបូងបំផុត ដែលមានតម្លៃប្រហាក់ប្រហែលគ្នាជាមួយនិងស្មាតហ្វូន 4G ផងដែរ។ តាមការទម្លាយចេញពីការលក់មុន Pre-Sale ថ្មីនេះ បានបញ្ជាក់ថា ស្មាតហ្វូន iQOO Pro 5G នឹងដាក់លក់នៅក្នុងតម្លៃ 4498 យន់ ($639) ដែលនេះ ជាតម្លៃដែលធូថ្លៃជាង $800។ ខណៈពេលដែលតម្លៃរបស់ស្មាតហ្វូននេះ នៅមិនទាន់បញ្ជាក់ជាផ្លូវការនៅឡើយទេនោះ ក្រុមហ៊ុន Shenzhen Telecom បាននិយាយថា ស្មាតហ្វូន vivo iQOO Pro នឹងក្លាយជាស្មាតហ្វូន 5G ដែលមានតម្លៃថោកបំផុតនៅលើទីផ្សារ។
ស្មាតហ្វូនស៊េរីថ្មី vivo iQOO Pro 5G ត្រូវបានមគេមើលឃើញថា មានភ្ជាប់ជាមួយនឹងអេក្រង់ Waterdrop Screen ហើយនិងប្រើប្រាស់នូវបន្ទះឈីប Snapdragon 855+ SoC ព្រមទាំងមានថាមពលថ្មទំហំធំ 4500 mAh ដែលទ្រទ្រង់នូវបច្ចេកវិទ្យាបញ្ចូលថាមពលថ្មលឿន 44W ultra-fast flash charge ថែមទៀតផង។ បន្ថែមពីនេះទៀតនោះ ស្មាតហ្វូន vivo iQOO Pro 5G នេះ នឹងមានភ្ជាប់ជាមួយនឹងបច្ចេកវិទ្យា Monster compiler enhancement technology ផងដែរ។
តាមការបញ្ជាក់របស់ក្រុមហ៊ុន vivo បានមអោយដឹងថា បច្ចេកវិទ្យានេះ អាចធ្វើការបង្កើននូវល្បឿនលឿនជាងមុនដល់ទៅ 19%ហើយល្បឿននៃការផ្លាស់ប្តូរទៅលើ Apps វាគឺមានការបង្កើនដល់ទៅ 13% ។ លោក Feng Yufei ដែលជាអនុប្រធានរបស់ម៉ាកយីហោ iQOO នេះ បាននិយាយថា iQOO គឺត្រៀមខ្លួនរួចជាស្រចហើយសម្រាប់ការចាប់យកនូវបច្ចេកវិទ្យា 5G នេះ ហើយក្រុមហ៊ុន មិនបញ្ឈប់ទៅលើភាពច្នៃប្រឌិតត្រឹមនេះនោះទេ។ “យើងនឹងធ្វើការបង្កើតនូវប្រព័ន្ធពេញលេញមួយជាមួយនឹងផលិតផលដែលគ្មានដែនកំណត់ និងសេវាកម្មល្អបំផុតសម្រាប់អតិថិជន។” ស្មាតហ្វូននេះ នឹងបង្ហាញខ្លួនជាផ្លូវការនៅថ្ងៃទី 22 ខែសីហាខាងមុខនេះ៕