យោងតាមប្រភពជាច្រើន ដែលបានបញ្ជាក់កាលពីថ្ងៃទី 16 ខែសីហានេះ បានអោយដឹងថា ស្មាតហ្វូន Flagships ជាច្រើនរបស់ក្រុមហ៊ុនបច្ចេកវិទ្យាយក្ស Samsung Electronics គឺនឹងប្រើប្រាស់នូវថាមពលថ្មរបស់ក្រុមហ៊ុន LG Chem។ នៅក្នុងភាពជាដៃគូរបស់ក្រុមហ៊ុន LG Chem ជាមួយនឹងក្រុមហ៊ុន Samsung ទៅលើស្មាតហ្វូនត្រកូល Galaxy Note 10 នេះគឺជារឿងដែលនឹកស្មានដល់ខណៈពេលដែលក្រុមហ៊ុនបុត្រសម្ព័ន្ធរបស់ LG Group គឺប្រកួតប្រជែងជាមួយនឹងក្រុមហ៊ុន Samsung SDI ដែលជាអង្គភាពបុត្រសម្ព័ន្ធរបស់ក្រុមហ៊ុន Samsung Group ដែលធ្វើការផ្គត់ផ្គង់ថាមពលថ្មសម្រាប់រថយន្តអេឡិចត្រូនិច និងស្មាតហ្វូនទូទាំងពិភពលោកនោះ។
កាលពីពេលមុននេះ ក្រុមហ៊ុន LG Chem ក៏ធ្លាប់ផ្គត់ផ្គង់ទៅលើថាមពលថ្មសម្រាប់ក្រុមហ៊ុន Samsung ផងដែរ ប៉ុន្តែសម្រាប់ស្មាតហ្វូនថ្នាក់ទាប និងថ្នាក់កណ្តាលតែប៉ុណ្ណោះ។ ក្រុមហ៊ុន Samsung SDI និង LG Chem នឹងក្លាយជាអ្នកផ្គត់ផ្គង់ថាមពលថ្មសម្រាប់ស្មាតហ្វូនត្រកូល Galaxy Note 10 ដែលនឹងដាក់លក់ជាផ្លូវការនៅថ្ងៃទី 23 ខែសីហានេះ នៅក្នុងប្រទេសកូរ៉េខាងត្បូង និងសហរដ្ឋអាមេរិកនោះ។ ការសម្រេចចិត្តនេះ បានបង្ហាញថា បច្ចេកវិទ្យាថាមពលថ្មរបស់ក្រុមហ៊ុន LG Chem គឺឈានដល់កម្រិតខ្ពស់ក្នុងការផ្គត់ផ្គង់ទៅលើស្មាតហ្វូនប្រភេទ Flagships នេះ។ នៅមិនទាន់មានការបញ្ជាក់នោះទេថា ហេតុអ្វីបានជាក្រុមហ៊ុន Samsung ជ្រើសរើសយកក្រុមហ៊ុន LG Chem ជាងរើសយកក្រុមហ៊ុន ATL និង Murata Manufacturing ដែលធ្លាប់ជាអ្នកផ្គត់ផ្គង់ទៅលើថាមពលថ្មសម្រាប់ស្មាតហ្វូនកម្រិតខ្ពស់នេះ។
ចាប់តាំងពីឆ្នាំ 2017 មក ក្រុមហ៊ុន Samsung បានប្រកាសឈប់ទិញថាមពលថ្មពីក្រុមហ៊ុន ATL នៅពេលដែលមានបញ្ហាថាមពលថ្មនៅលើស្មាតហ្វូន Galaxy Note 7 នោះ។ ចំណែកក្រុមហ៊ុន Murata គឺផ្តោតទៅលើការគ្រប់គ្រងទៅលើស្ថេរភាព និងប្រតិបត្តិការរបស់ខ្លួនបន្ទាប់ពីខ្លួនទិញយកនូវអាជីវកម្មផលិតថាមពលថ្មរបស់ក្រុមហ៊ុន Sony នៅក្នុងចុងឆ្នាំ 2017។ ទាំងក្រុមមហ៊ុន Samsung និង LG Chem បដិសេធមិនបានបញ្ជាក់ទៅលើរឿងដែលថា ពួកគេសហការគ្នាសម្រាប់ការផលិតថាមពលថ្មនៅលើស្មាតហ្វូន Galaxy Note 10 នេះទេ។
អ្នកនាំពាក្យរបស់ក្រុមហ៊ុន Samsung បាននិយាយថា“ ក្រុមហ៊ុន Samsung មិនបានបញ្ជាក់ពីព័ត៌មានលម្អិតនៃគ្រឿងបន្លាស់ដែលត្រូវបានប្រើនៅក្នុងផលិតផលរបស់ក្រុមហ៊ុន និងអ្នកផ្គត់ផ្គង់របស់ពួកគេទេ”។ ទោះបីជាមានការប្រជែងគ្នារវាង Samsung Group និងក្រុមហ៊ុន LG Group ក៏ដោយនោះ ការសហការរវាងក្រុមហ៊ុនបុត្រសម្ព័ន្ធរបស់ពួកគេ គឺមិនធម្មតានោះទេ៕