Galaxy Note 10 Series ដែលជាកំពូលស្មាតហ្វូនរបស់ក្រុមហ៊ុន Samsung ត្រូវបានក្រុមហ៊ុនប្រកាសសម្ពោធជាផ្លូវការកាលពីថ្ងៃទី 7 ខែសីហាកន្លងទៅនេះនៅទីក្រុងញូវយ៉កសហរដ្ឋអាមេរិក។ ប៉ុន្តែនៅថ្ងៃនេះ ស្របពេលដែលានការប្រកាសលក់ជាសាកលនោះ ក្រុមហ៊ុន Samsung នៅប្រទេសចិន ក៏បានរៀបចំព្រឹត្តិការណ៍មួយ ដោយបាននាំមកស្មាតហ្វូន Note10 និង Note10+ 5G ទៅកាន់ទីផ្សារអាស៊ីដែលមានប្រជាជនច្រើនលើសលប់មួយនេះផងដែរ។
អ្វីដែលគួរឱ្យចាប់អារម្មណ៍នោះ គឺថា ស្មាតហ្វូន Galaxy Note ម៉ូដែលធំ ដែលក្រុមហ៊ុន Samsung ប្រកាសចេញនៅចិននេះ នឹងត្រូវផ្តល់ជូននៅក្នុងប្រភេទ 5G របស់ខ្លួន ខណៈដែលស្មាតហ្វូន Galaxy Note10 តូចជាងនេះ គឺជាស្មាតហ្វូនប្រើប្រាស់ទូទៅមិនមែន 5G នោះទេ។ ស្មាតហ្វូនម៉ូដែលទាំងពីរនេះ ត្រូវបានក្រុមហ៊ុន បញ្ជាក់ថា គឺបំពាក់មកជាមួយនូវបន្ទះឈីប Snapdragon 855 ហើយនឹងមានពណ៌ Aura Glow, Aura White និង Aura Black។
ស្មាតហ្វូន Galaxy Note10 ដែលមានភ្ជាប់មកជាមួយនិងរ៉េមទំហំ 8GB និងមេម៉ូរីទំហំ 256GB គឺចាប់ផ្តើមលក់ជាមួយតម្លៃចាប់ពី CNY 6.599 យ៉េន (934ដុល្លារ) ខណៈពេលដែល Note10 + ប្រភេទ 5G ដែលមានរ៉េមទំហំ 12GB និងទំហំផ្ទុក 256GB ដូចគ្នានោះ គឺមានតម្លៃ 7,999 ដុល្លារ (1132ដុល្លារ)។ ក្រុមហ៊ុន Samsung បានបញ្ជាក់ថា ស្មាតហ្វូន Galaxy Note 10 ទាំងពីរនេះ អតិថិជននៅចិន អាចបញ្ជាទិញបាន នៅលើគេហទំព័រផ្លូវការ របស់ក្រុមហ៊ុន សាំស៊ុង។ ក្រុមហ៊ុនគ្រោងនឹងចេញលក់ជាផ្លូវការនៅត្រឹមថ្ងៃទី 12 ខែកញ្ញាខាងមុខ៕
