Nokia 7.2 បានបង្ហាញរូបរាង និងពណ៌កាន់តែច្បាស់ជាមួយនឹងរូបភាព Renders ថ្មីគឺពិតជាស្រស់ស្អាតប្លែកអារម្មណ៍!

Nokia ដែលជាក្រុមហ៊ុនបច្ចេកវិទ្យាដ៏ធំរបស់ប្រទេសហ្វាំងឡង់ គ្រោងនឹងប្រកាសចេញនូវស្មាតហ្វូនជាច្រើនម៉ូឌែលរបស់ខ្លួននៅក្នុងព្រឹត្តិការណ៍ថ្ងៃទី 5 ខែកញ្ញាខាងមុខនេះហើយ គឺនៅក្នុងព្រឹត្តិការណ៍ IFA 2019 នៅក្នុងទីក្រុងប៊ែកឡាំងប្រទេសអាល្លឺម៉ង់។ ស្មាតហ្វូន Nokia 7.2 នឹងក្លាយជាស្មាតហ្វូនមួយនៅក្នុងចំណោមស្មាតហ្វូនជាច្រើន ហើយយើងក៏ឃើញវត្តមានរបស់ស្មាតហ្វូននេះនៅលើបញ្ជីរបស់ GeekBench ផងដែរ។ 

តាមរូបភាព Renders របស់ NPU ចុងក្រោយបំផុតនោះ បានបង្ហាញថា ស្មាតហ្វូន Nokia 7.2 នេះគឺមានពណ៌បៃតង ខ្មៅ ស្វាយ និងទឹកប្រាក់។ ចេញពីរូបភាព Renders នេះ ភាពខុសគ្នានៃស្មាតហ្វូន Nokia 7.2 និងស្មាតហ្វូនជំនាន់មុនរបស់វានោះ គឺមិនខុសគ្នាច្រើននោះទេ។ 

ស្មាតហ្វូននេះគឺមានការឌីស្សាញផ្នែកខាងមុខដែលមានភ្ជាប់ជាមួយនឹង Waterdrop Notch ជាមួយនឹងឡូហ្គោ Nokia នៅខាងក្រោម។ សម្រាប់ផ្នែកខាងក្រោយវិញនោះ គឺមានភ្ជាប់ជាមួយនឹងការឌីស្សាញកាមេរ៉ាដែលមានស្ទាយ៍ OREO ជាមួយនឹងការបញ្ជាក់គុណភាពពី ZEISS និងប្រព័ន្ធស្កេនក្រយ៉ៅដៃស្ថិតនៅក្រោមកាមេរ៉ា Lens នេះថែមទៀត។ 

នៅក្នុងរបាយការណ៍ជាច្រើនកាលពីពេលមុននេះ បានបង្ហាញថា ស្មាតហ្វូន Nokia 7.2 នឹងមានកាមេរ៉ាគោលទំហំ 48MP Main Sensor, Super Wide-Angle Lens និង Depth Of Field Lens ។ បន្ថែមពីនេះទៀតនោះ ស្មាតហ្វូននេះ នឹងមានថាមពលថ្មដែលមានទំហំ 3500 mAh ជាមួយនឹងបច្ចេកវិទ្យា fast Charge ផងដែរ។ តាមការបញ្ជាក់របស់ Geekbench ស្មាតហ្វូននេះនឹងមានរ៉េមទំហំ 4GB និង 6GB ។ 

សូមជំរាបថា ក្រុមហ៊ុន HMD Global នឹងរៀបចំនូវព្រឹត្តិការណ៍មួយនៅក្នុងទីក្រុងប៊ែកឡាំងនៅថ្ងៃទី 5 ខែកញ្ញានេះដែលក្រុមហ៊ុននេះ នឹងប្រកាសចេញនូវស្មាតហ្វូន និង Feature Phones របស់ខ្លួនផងដែរ។ សម្រាប់ស្មាតហ្វូន គឺអាចនិងមានម៉ូឌែល Nokia 5.2, Nokia 6.2, Nokia 7.2 ខណៈពេលដែល Feature Phones គឺមានម៉ូឌែល Nokia 110 និង 2720៕