ថ្មីៗនេះ ក្រុមហ៊ុន OPPO បានបញ្ចេញនូវវីដេអូផ្សព្វផ្សាយថ្មីមួយក្នុងការប្រកាសចេញនូវមុខងារថ្មីសម្រាប់ស្មាតហ្វូន OPPO Reno 2។ ដូចអ្វីដែលអ្នកបានដឹងហើយនេះគឺជាស្មាតហ្វូនដែលមានកាមេរ៉ា 4 គ្រាប់ ដែលមានការពង្រឹងទៅលើសមត្ថភាពកាមេរ៉ាកាន់តែខ្លាំងក្លាបំផុត។ ស្មាតហ្វូននេះ នឹងទ្រទ្រង់ទៅលើមុខងាររក្សាលំនឹងរូបភាពសម្រាប់ការថតរូបភាព និងការថតវីដេអូ។
កាលបរិច្ឆេទនៃការបង្ហាញវត្តមានរបស់ OPPO Reno 2 នៅមិនទាន់ដឹងនៅឡើយទេ ប៉ុន្តែក្រុមហ៊ុននេះ ក៏ចាប់ផ្តើមបញ្ចេញនូវរូបភាពកាន់តែច្រើន និងវីដេអូកាន់តែច្រើន សម្រាប់ស្មាតហ្វូននេះផងដែរ។ សម្រាប់រូបភាពផ្សព្វផ្សាយនេះ យើងបានដឹងថា ស្មាតហ្វូននេះ នឹងទ្រទ្រង់ទៅលើបច្ចេកវិទ្យា 20x zoom និង ultra-advanced mode សម្រាប់ការថតនៅពេលយប់ និងជាច្រើនទៀត។
ប្រភពខាងលើនេះ បានបញ្ជាក់ថា វីដេអូនេះ គឺបានបង្ហាញពីការទ្រទ្រង់ទៅលើមុខងាររក្សានូវលំនឹងរូបភាព Ultra Steady super image stabilization សម្រាប់ធ្វើការថតវីដេអូ។ នៅក្នុងវីដេអូនេះ ក៏មានការបង្ហាញថា ស្មាតហ្វូនស៊េរីថ្មី OPPO Reno 2 នេះ អាចធ្វើការថតរូបភាព វីដេអូបានយ៉ាងរលូនតែម្តង។ ស្មាតហ្វូនស៊េរីថ្មីនេះ នឹងបង្ហាញខ្លួននៅពេលដ៏ខ្លីនេះហើយ យើងក៏បានដឹងខ្លះមកហើយថា ស្មាតហ្វូននេះ គឺមានអេក្រង់ទំហំ 6.5-inch screen, បន្ទះឈីប Snapdragon 730G ថាមពលថ្មទំហំ 3915mAh កាមេរ៉ាខាងមុខទំហំ 16MP និងកាមេរ៉ាខាងក្រោយ 4 គ្រាប់។ ស្មាតហ្វូននេះមានកាមេរ៉ាទំហំ 48MP lens, 8MP lens, 13MP lens និង 2MP lens ។
យើងនឹងដឹងនូវព័ត៌មានលម្អិតជាច្រើនទៀតរបស់ស្មាតហ្វូននេះ នៅពេលដែលវាបង្ហាញខ្លួន។ គួរបញ្ជាក់ថា ស្មាតហ្វូន OPPO Reno 2 គឺជាស្មាតហ្វូនថ្នាក់កណ្តាលប៉ុន្តែបើក្រឡេកមើលទៅលើលក្ខណៈសម្បត្តិរបស់ស្មាតហ្វូននេះ និងការឌីស្សាញរបស់ស្មាតហ្វូននេះពិតជាអស្ចារ្យមែនទែន៕