ស្មាតហ្វូនស៊េរីថ្មី Vivo Nex 3 នេះ ទើបតែបង្ហាញវត្តមានជាផ្លូវការកាលពីម្សិលមិញនេះទេ។ ស្មាតហ្វូននេះ គឺជាម៉ាកយីហោដំបូងបំផុតនៅក្នុងអាស៊ាននេះ ដែលបង្ហាញខ្លួនជាមួយនឹងអេក្រង់ទឹកធ្លាក់ “waterfall screen” នោះ។ សម្រាប់អេក្រង់នេះគឺមានកម្រិតភាពកោងខ្លាំងដែលអាចបង្ហាញនូវរូបភាពដល់គែមរបស់ស្មាតហ្វូននេះថែមទៀត។ នៅថ្ងៃនេះ យើងទទួលបាននូវព័ត៌មានជាច្រើនទៀតអំពីកម្លាំងម៉ាស៊ីនរបស់ស្មាតហ្វូននេះនោះគឺទៅលើពិន្ទុ Benchmark នៅលើ AnTuTu ថែមទៀត។ តាមការបញ្ជាក់នៅក្នុងការធ្វើតេស្ត៍នៅលើ Benchmark នេះ ស្មាតហ្វូននេះ គឺមានពិន្ទុខ្ពស់ដល់ទៅជិត 500,000 ពិន្ទុ។
សម្រាប់ពិន្ទុនេះ គឺជាការបំបែកទៅលើកំណត់ត្រាថ្មី។ ស្មាតហ្វូននេះ គឺមានពិន្ទុលើសខ្ពស់ជាងស្មាតហ្វូន Asus ROG Phone II ម៉ូឌែលចុងងក្រោយបំផុតដែលមានពិន្ទុ 492,000 និងស្មាតហ្វូន Xiaomi Black Shark II មានពិន្ទុ 469,000។ ជាមួយនឹងពិន្ទុសរុបដល់ទៅ 497858 នេះ ស្មាតហ្វូនស៊េរីថ្មី vivo NEX 3 នេះគឺជាស្មាតហ្វូនដ៏ខ្លាំងក្លាបំផុតនៅលើទីផ្សារក្នុងពេលបច្ចុប្បន្ននេះ។ ស្មាតហ្វូននេះមានភ្ជាប់ជាមួយនឹងបន្ទះឈីប Qualcomm Snapdragon 855+ ប៉ុន្តែបន្ទះឈីបនេះ គឺមានសមត្ថភាពខ្លាំងជាងស្មាតហ្វូនផ្សេងទៀតដែលប្រើប្រាស់នូវបន្ទះឈីបដូចគ្នានេះដែរ។
Benchmark គឺជាកម្មវិធីដ៏ល្អឥតខ្ចោះសម្រាប់ធ្វើការប្រៀបធៀបទៅលើកម្លាំងម៉ាស៊ីនរបស់ស្មាតហ្វូន។ មានការកត់សម្គាល់ថា ស្មាតហ្វូននេះ គឺមិនមានការវាស់ជាមួយនឹងលេខនោះទេ។ កន្លងមក មានស្មាតហ្វូនជាច្រើនដែលមានសមត្ថភាពដ៏អស្ចារ្យនៅលើការវាស Benchmark នេះ ប៉ុន្តែវាមិនមានការផ្តោតទៅលើបទពិសោធន៍នៃការប្រើប្រាស់ផ្ទាល់របស់អ្នកប្រើប្រាស់នោះទេ។ ប៉ុន្តែនេះ មិនមែនជាបញ្ហាសម្រាប់ក្រុមហ៊ុន vivo នោះទេ ដោយសារតែស្មាតហ្វូននេះ គឺផ្តល់នូវបទពិសោធន៍សម្រាប់អ្នកប្រើប្រាស់កាន់តែអស្ចារ្យបំផុត៕