ដោយសារតែមេរោគរាតត្បាតសកល និងតម្លៃថ្លៃរបស់ Galaxy S20 Series ដែលជាស្មាតហ្វូនជំនាន់ថ្មី លក់មិនសូវបានលទ្ធផលល្អនោះទេ។ ដូចនេះ ក្រុមហ៊ុន Samsung ក៏បានបង្ហាញវត្តមានរបស់ស្មាតហ្វូន Galaxy S20 FE នៅក្នុងឆមាសទី 2 របស់ខ្លួនផងដែរ។ ស្មាតហ្វូននេះ គឺមានទីផ្សារល្អ ហើយក្រុមហ៊ុនបច្ចេកវិទ្យាយក្ស Samsung របស់កូរ៉េខាងត្បូងនេះ ក៏បានត្រៀមខ្លួនក្នុងការផលិតនូវស្មាតហ្វូន Galaxy S21 series ចំនួនត្រឹមតែ 6 លានគ្រឿងប៉ុណ្ណោះនៅក្នុងជំហានដំបូងរបស់ខ្លួន។
កាលពីម្សិលមិញនេះ មានការលេចនូវរបាយការណ៍មួយចេញពី The Elec បាននិយាយថា ក្រុមហ៊ុន Samsung បានធ្វើការពន្យារពេលទៅលើការបង្ហាញវត្តមានរបស់ស្មាតហ្វូន Galaxy Z Flip2 ដែលជាជំនាន់ថ្មីរបស់ស្មាតហ្វូន Galaxy Z Flip ។ នេះគឺដោយសារតែក្រុមហ៊ុនមិនចង់បង្អាក់ទៅលើការលក់របស់ស្មាតហ្វូន Galaxy S21 Series នោះទេ។ នៅក្នុងរបាយការណ៍ដូចគ្នានេះ ក៏មានការទម្លាយនូវព័ត៌មានលម្អិតរបស់ស្មាតហ្វូនត្រកូល Galaxy S series ផងដែរ។ ក្រុមហ៊ុន Samsung នឹងចាប់ផ្តើមការផលិតស្មាតហ្វូន Galaxy S21 series នេះ នៅខែក្រោយនេះ ហើយការផលិតដំបូងនេះ គឺមានចំនួនត្រឹមតែ 6 លានគ្រឿងប៉ុណ្ណោះ។ ប្រសិនបើមានតម្រូវការបន្ថែមទៀត ក្រុមហ៊ុននឹងធ្វើការផលិតបន្ថែមទៀតផងដែរ។
ស្មាតហ្វូន Galaxy S21 នឹងមានពណ៌ ប្រផេះ ផ្កាឈូក ស្វាយ និងពណ៌ស។ ហើយស្មាតហ្វូន Galaxy S21+ គឺមាន 3 ពណ៌នោះគឺពណ៌ខ្មៅ ទឹកប្រាក់ និងស្វាយ។ សម្រាប់ស្មាតហ្វូន Galaxy S21 Ultra នេះគឺមាន 2 ពណ៌នោះ គឺពណ៌ខ្មៅ និងពណ៌ទឹកប្រាក់។ ក្រុមហ៊ុន Samsung អាចនឹងបញ្ចេញនូវពណ៌ជាច្រើនទៀតផងដែរ។ របាយការណ៍នេះ បាននិយាយថា ក្រុមហ៊ុន Samsung នឹងធ្វើការផលិតនូវកាសស្តាប់ Galaxy Buds 2 ចំនួន 1.5 លានគ្រឿងផងដែរហើយវាមានលេខកូដ Attic។ កាសស្តាប់នេះនឹងធ្វើការផលិតនៅក្នុងប្រទេសវៀតណាម ហើយវាក៏នឹងបន្តការពង្រីកទៅលើការផលិតនៅក្នុងប្រទេសប្រេស៊ីលផងដែរនៅក្នុងខែកុម្ភៈនេះ៕
