នៅក្នុងរយៈពេលប៉ុន្មានថ្ងៃនេះ តម្លៃទីផ្សាររបស់ក្រុមហ៊ុន Tesla គឺមានចំនួនលើសពី 500 ពាន់លានដុលា្លរអាមេរិក ខណៈពេលដែលនាយកប្រតិបត្តិ និងសហស្ថាបនិករបស់ក្រុមហ៊ុននេះ គឺលោក Elon Musk មានទ្រព្យសម្បត្តិផ្ទាល់ខ្លួនរហូតដល់ទៅ 128 ពាន់លានដុល្លារអាមេរិក។ នៅពេលនេះ គាត់ក្លាយជាអ្នកដែលមានទ្រព្យសម្បត្តិមានជាងគេបំផុតចំណាត់ថ្នាក់ទី 2 របស់ពិភពលោក ដែលយកឈ្នះលោក Bill Gates ថែមទៀតផង។ ប៉ុន្តែលោក Musk មិនមានពេលវេលាក្នុងការអបអរសាទរនោះទេ។
នៅក្នុងសន្និសីទឈ្មោះថា European Battery Conference លោក Musk បានប្រកាសអំពីគម្រោងផែនការជាច្រើនរបស់ខ្លួន ដែលមិនត្រឹមតែជួយក្រុមហ៊ុន Tesla ក្នុងការរក្សានូវតម្លៃរបស់ខ្លួន និងចំណាត់ថ្នាក់ប៉ុណ្ណោះទេ ប៉ុន្តែវានឹងធ្វើអោយក្រុមហ៊ុនគូរប្រជែងជាច្រើនខិតខំប្រកួតប្រជែង។ ជាថ្មីម្តងទៀត លោក Musk បានទម្លាយនូវផែនការសម្រាប់រថយន្តរបស់ខ្លួនដែលអាចធ្វើដំណើរបានចម្ងាយដល់ទៅ 621 ម៉ាយ៍។
លោក Musk បាននិយាយថា “យើងមានរថយន្តមួយចំនួនដែលស្ថិតនៅក្នុងការអភិវឌ្ឍ ហើយវាអាចធ្វើដំណើរបានដល់ទៅ 1000 គីឡូម៉ែត្រ (621 ម៉ាយ៍)។” នេះ គឺជាចម្ងាយគោលដៅមួយសម្រាប់រថយន្ត Tesla Semi ជាមួយនឹងមានសមត្ថភាពក្នុងការដឹកបានដល់ទៅ 40 តោន។ យើងគិតថានេះ គឺពិតជាការទាក់ទាញខ្លាំងបំផុតសម្រាប់ក្រុមហ៊ុនដឹកជញ្ជូនជាច្រើន។ រថយន្តដែលមានទំហំធំ ថាមពលថ្មខ្លាំងហើយ អាចធ្វើដំណើរបានឆ្ងាយថែមទៀត។ ពិសេស គឺដឹកបានច្រើនតោនលើសពីការរំពឹងទុក។
សម្រាប់រថយន្ត Tesla Model S ជំនាន់ថ្មីនេះ គឺមានការទម្លាយថាអាចធ្វើដំណើរបានចម្ងាយ 520 ម៉ាយ៍ ហើយលោក Musk បានបន្ថែមថា រថយន្តជាច្រើនទៀតរបស់ក្រុមហ៊ុននេះ អាចធ្វើដំណើរជាធម្មតាគឺចម្ងាយ 430 ម៉ាយ៍។ យ៉ាងណាមិញ នាយកប្រតិបត្តិនេះ បានបញ្ជាក់ថា ក្នុងការផលិតរថយន្តថ្មីមួយគឺមានតម្លៃចាប់ផ្តើមពី $25,000 សម្រាប់ប្រទេសអ៊ឺរ៉ុប។ ប៉ុន្តែវាពិតជាពិបាកមែនទែនសម្រាប់ទីផ្សារមួយចំនួនដែលមានកន្លែងចតតូចៗ ហើយតម្រូវការទីផ្សារសម្រាប់រថយន្តតូចដូចជា Model X ក៏ពិតជាខ្លាំងក្លាផងដែរ៕