កាលពីកំឡុងពាក់កណ្តាលនៃខែមករាដើមឆ្នាំនេះ លោក Manu Kumar Jain ដែលជានាយកប្រតិបត្តិរបស់ក្រុមហ៊ុន Xiaomi នៅក្នុងប្រទេសឥណ្ឌា បានទម្លាយនៅក្នុងសាររបស់ខ្លួនថា ក្រុមហ៊ុន POCO នឹងក្លាយជាម៉ាកយីហោឯករាជ្យឆាប់ៗនេះហើយ។ នៅថ្ងៃនេះរឿងនេះ គឺបានកា្លយជាការពិតដូចសំដីគាត់អញ្ចឹង ដោយក្រុមហ៊ុន POCO បានបញ្ចេញនូវសេចក្តីថ្លែងការណ៍ផ្លូវការមួយថា POCO គឺនឹងក្លាយជាម៉ាកយីហោឯករាជ្យ។
សេចក្តីថ្លែងការណ៍ផ្លូវការនេះ ត្រូវបានបង្ហោះនៅលើ Twitter តាមរយៈគណនី POCO Global ផ្លូវការរបស់ខ្លួន ហើយវាក៏មានការបង្ហាញអំពីភាពជោគជ័យរបស់ក្រុមហ៊ុននេះ ជាមួយនឹងម៉ូឌែលពេញនិយមជាច្រើនរបស់ខ្លួនផងដែរ។ តាមការបញ្ជាក់របស់ក្រុមហ៊ុន POCO នេះ បានអោយដឹងថា ម៉ាកយីហោនេះ បានចូលទៅក្នុងទីផ្សារពិភពលោកច្រើនជាង 35 ប្រទេស នៅក្នុងរយៈពេល 3 ឆ្នាំនេះ។ ទីផ្សារទាំងនេះ គឺនៅក្នុងប្រទេសឥណ្ឌា ចក្រភពអង់គ្លេស អេស្ប៉ាញនិងអ៊ីតាលី។ ក្រុមហ៊ុន POCO ក៏បានបង្ហាញនូវវត្តមានរបស់ស្មាតហ្វូន POCO F1 ដែលមានការនាំចេញច្រើនជាង 2.2 លានគ្រឿងថែមទៀតផង។
ក្រុមហ៊ុន POCO បានទម្លាយទៀតថា ក្រុមហ៊ុនរបស់ខ្លួន បានលក់ស្មាតហ្វូនបានច្រើនជាង 6 លានគ្រឿងទៅលើម៉ាកយីហោ POCO នេះរបស់ពិភពលោក។ តួរលេខនេះ គឺមានការបង្ហាញអំពីចំនួនម៉ាកយីហោស្មាតហ្វូន POCO ជាច្រើនដែលត្រូវបានដាក់លក់ចាប់តាំងពីឆ្នាំ 2018 មក។ ខណៈពេលដែលក្រុមហ៊ុន POCO មិនទាន់បង្ហាញនូវស្មាតហ្វូនទី 2 បន្ទាប់ពីការបង្ហាញស្មាតហ្វូន POCO F1 នៅក្នុងឆ្នាំ 2018 នោះ តួរលេខត្រឹមតែ 6 លានគ្រឿងពិតជាតូចមែនទែន។ ប៉ុន្តែនៅពេលនេះ ម៉ាកយីហោនេះ គឺនៅតែមានការប្រកួតប្រជែងខ្លាំងមែនទែនក្នុងទីផ្សារពេលនេះ៕