កាលពីពេលថ្មីៗនេះ នៅលើគេហទំព័រ Slashleaks គឺបានធ្វើការចុះផ្សាយទៅលើរូបភាពជាច្រើនរបស់ស្មាតហ្វូន Samsung Galaxy A32 5G ដែលមានមុំផ្សេងៗគ្នា ខណៈពេលដែលយើងអាចមើលឃើញថា ស្មាតហ្វូននេះ មានសម្បកទូរស័ព្ទថ្លាប្រភេទស៊ីលីខនថែមទៀត។ យើងនៅមិនទាន់បានឃើញនូវផ្នែកខាងមុខរបស់ស្មាតហ្វូននេះនៅឡើយទេ ប៉ុន្តែនៅមុននេះរបាយការណ៍មួយបានបង្ហាញថា អេក្រង់របស់ស្មាតហ្វូននេះ គឺជាប្រភេទ Water Drop Notch ផងដែរ។
ប្រភពខាងលើនេះ បន្តបង្ហាញថា កាមេរ៉ាគោលរបស់ស្មាតហ្វូនថ្មីនេះ មានការឌីស្សាញជាទម្រង់បញ្ឈរជាមួយនឹងភ្លើង LED Flash ចំនួន 2 គ្រាប់ថែមទៀតផង។ ស្មាតហ្វូន Samsung Galaxy A32 5G នេះ មានប្រព័ន្ធស្កេនក្រយ៉ៅដៃនៅចំហៀង រន្ធដោត USB-C និងរន្ធដោតកាសស្តាប់ 3.5mm headphone jack។
យោងតាមការបញ្ជាក់នៅក្នុងទិន្នន័យបឋមនោះ បានអោយដឹងថា នឹងក្លាយជាស្មាតហ្វូនមួយ ដែលមានតម្លៃសមរម្យបំផុតរបស់ក្រុមហ៊ុន Samsung ជាមួយនឹងការទ្រទ្រង់នូវបណ្តាញបច្ចេកវិទ្យាជំនាន់ទី 5។ ស្មាតហ្វូននេះ នឹងមានបន្ទះឈីប Qualcomm SoC, 48-megapixel មានរ៉េមទំហំ 4GB និងមានថាមពលថ្មធំផងដែរ។ តាមព័ត៌មានទទួលបានចុងក្រោយនេះ បានបញ្ជាក់ថា ការប្រកាសចេញនូវវត្តមានរបស់ស្មាតហ្វូន Samsung Galaxy A32 5G នេះ គឺនឹងចាប់ផ្តើមឆាប់ៗនេះហើយ៕
