ក្រុមហ៊ុន LG Display ទើបតែបានបង្ហាញនូវគំនិតថ្មីមួយរបស់ខ្លួនសម្រាប់អនាគតនៃព្រឹត្តិការណ៍ CES 2021 ជាមួយនឹងបច្ចេកវិទ្យានាពេលខាងមុខរបស់ខ្លួន ដែលត្រូវគេមើលឃើញនៅលើសេណារីយ៉ូជាច្រើនផងដែរ។ ផ្នែកមួយដែលគួរអោយចាប់អារម្មណ៍ខ្លាំងបំផុតនោះ គឺមានអេក្រង់ទំហំ 55 អ៊ីញ OLED ថ្លា របស់ខ្លួន ដែលស្ថិតនៅលើគែមរបស់គ្រែគេងថែមទៀតផង។
តាមការបញ្ជាក់របស់ TheVerge បានអោយដឹងថា CES 2021 គឺជាព្រឹត្តិការណ៍ដ៏អស្ចារ្យបំផុត ដែលបានផ្តល់ឱកាសអោយក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះ អាចបង្ហាញនូវផលិតផលជាច្រើនរបស់ខ្លួនជាមួយនឹងអេក្រង់ OLED បានផងដែរ។ សម្រាប់អេក្រង់ថ្លានេះ គឺមានកម្រិតភាពថ្លាដល់ទៅ 40% ដែលបច្ចេកវិទ្យាកាលពីពេលមុននេះ គឺមានកម្រិតថ្លាត្រឹមតែ 10% ប៉ុណ្ណោះ។ នៅក្នុងព្រឹត្តិការណ៍បច្ចេកវិទ្យានេះ ក្រុមហ៊ុន LG ក៏បានស្រម៉ៃទៅលើការបង្ហាញនូវអេក្រង់ដែលចេញពីគែមរបស់គែ្រគែងនេះថែមទៀតផង។
ក្រុមហ៊ុននេះ បានបន្ថែមថា នេះគឺជាអេក្រង់ដែលមានមុខងារដូចទៅនឹងទូរទស្សន៍ ដែលអាចបង្ហាញនូវព័ត៌មានជាច្រើនទៀត ឬ ទម្រង់ជាច្រើនទៀត នៃការកម្សាន្តដូចជា វីដេអូ ឬខ្សែភាពយន្ត។ សម្រាប់គែមទូរទស្សន៍ថ្លានេះ គឺមានភ្ជាប់នូវ Speakers ផងដែរ។ បន្ថែមពីនេះទៀតនោះ ក្រុមហ៊ុន LG បានអះអាងថា សម្រាប់គែមនេះ អាចធ្វើការផ្លាស់ទីបានយ៉ាងងាយស្រួលនៅក្នុងគេហដ្ឋានថែមទៀត។
តាមការបញ្ជាក់របស់លោក Jong-sun Park ដែលជាអនុប្រធានជាន់ខ្ពស់របស់ក្រុមហ៊ុន LG Display និងជាប្រធានផ្នែកពាណិជ្ជកម្ម បាននិយាយថា “អេក្រង់ OLED ថ្លា នេះ គឺជាបច្ចេកវិទ្យាមួយដែលអាចប្រើប្រាស់នៅលើកន្លែងជាច្រើនទៀតសម្រាប់ប្រើប្រាស់នៅក្នុងជីវិតប្រចាំថ្ងៃដូចជានៅហាង ផ្សារទំនើប និងការឌីស្សាញនៅផ្នែកខាងក្នុងនៃអាគារ រថយន្តស្វ័យប្រវត្តិ រថភ្លើងក្រោមដី និងអាកាសចរណ៍ជាដើម។”