vivo X60 Pro+ បានបង្ហាញវត្តមាននៅលើផេក JD ដែលបញ្ជាក់ថាកំពូលស្មាតហ្វូនជំនាន់ថ្មីនេះនឹងប្រើប្រាស់ឈីប Snapdragon 888 និងមានខ្នងខាងក្រោយស្រោបដោយស្បែក

ក្រុមហ៊ុន vivo បានប្រកាសចេញស្មាតហ្វូនជំនាន់ថ្មីរបស់ខ្លួនម៉ូដែល vivo X60 និង X60 Pro កាលពីចុងឆ្នាំ 2020 ដើមឆ្នាំ 2021។ យ៉ាងណាមិញក្រុមហ៊ុន  vivo ក៏នៅមានកំពូលស្មាតហ្វូនដែលជាបងធំក្នុងគ្រួសារ X60 Series មួយផ្សេងទៀតដែលមិនទាន់បានបង្ហាញវត្តមានផ្លូវការណ៍នៅឡើយនោះគឺ vivo X60 Pro+។ ដោយមួយរយះកន្លងមកនេះក៏មានលេចលឺព័ត៌មានរស៊ើបជាច្រើន ដែលបានចុះផ្សាយនិយាយពីស្មាតហ្វូនបងធំរបស់ vivo មួយនេះ។ ហើយក្នុងពេលនេះនៅលើផេកផ្លូវការណ៍របស់ក្រុមហ៊ុនលក់ទំនិញអនឡាញដ៏ធំរបស់ចិនឈ្មោះថា JD.com ក៏បានធ្វើការចែករំលែកនៅផ្ទាំងរូបភាពមួយចំនួនទាក់ទងនឹងស្មាតហ្វូនកំពូលជំនាន់ថ្មីរបស់ vivo មួយនេះផងដែរ។ 

នៅលើផេករបស់ JD បានបង្ហាញនូវផ្ទាំងរូបភាពចំនួន 3 ដោយរូបទីមួយបង្ហាញពីឡូហ្គោ Qualcomm ដែលបង្ហើបចេញនូវលេខ 8 មួយលេខ ដូចនេះយើងអាចទាយដឹងថាគឺជាកំពូលឈីប Snapdragon 888, រូបបន្ទាប់គឺបង្ហាញពីកាមេរ៉ាមួយគ្រាប់ និងរូបភាពចុងក្រោយបង្ហាញពីផ្ទៃស្បែកខ្នងខាងក្រោយ។ បើតាមរយះរូបភាព render ដែលបានបែកធ្លាយនាពេលកន្លងមកបង្ហាញថា vivo X60 Pro+ មានកាមេរ៉ាក្រោយចំនួន 4 គ្រាប់ និងអំពូល LED Flash មួយខ្សែនៅផ្តេកពីក្រោមលែនកាមេរ៉ា។ ក្នុងរូបភាពនោះក៏បានបង្ហាញនូវពណ៌ចំនួនពីររបស់វាផងដែរគឺជាពណ៌ទឹកក្រូច និងពណ៌ប្រផេះស្រាល។ 

ចំនែកនៅលើបញ្ចីលក់របស់ JD វិញបានបង្ហាញពណ៌ចំនួនពីរដូចគ្នាប៉ុន្តេជាគឺពណ៌ខៀវហៅថា Deep Ocean Blue និងពណ៌ទឹកក្រូចហៅថា Classic Orang។ JD ក៏បានបង្ហើបផងដែរថាសម្រាប់ពណ៌ទាំងពីររបស់ vivo X60 Pro+ នឹងមានជម្រើសពីរម៉ូដែលគឺម៉ូដែលមានរ៉េម 8GB/ អង្គផ្ទុកទិន្នន័យ 128GB និងម៉ូដែលមានរ៉េម 12GB/ អង្គផ្ទុក 256GB។ ប៉ុន្តែទោះជាយ៉ាងណា JD មិនបានបង្ហើបពីតម្លៃរបស់កំពូលស្មាតហ្វូន vivo X60 Pro+ ឡើយ ដោយគ្រាន់តែប្រាប់ថាអតិថិជនអាចកក់លុយមុនខ្ទង់ 50 យន្ត័ សម្រាប់ការជាវស្មាតហ្វូនកំពូលជំនាន់ថ្មីនេះ។ 

នៅលើផេករបស់ JD ក៏បានបង្ហាញពីរូបភាពផ្សេងទៀតដែលប្រាប់ពីបច្ចេកវិទ្យាថ្មីៗបន្ថែមដែលនឹងមានមកជាមួយ vivo X60 Pro+ ក្នុងនោះមានដូចជា ប្រព័ន្ធកាមេរ៉ាថតរូបច្បាស់ល្អនៅពេលរាត្រី (low-light camera), បច្ចេកវិទ្យាសំឡេងកម្រិតខ្ពស់ (High Quality Audio), ប្រតិបត្តិការថ្មី (New OS) និងបច្ចេកវិទ្យាសាកថ្មល្បឿនលឿន (Fast battery Charge)ជាដើម៕