ក្រុមហ៊ុន Apple បានប្រកាសចេញកាស AirPods Max ដែលជាកាសប្រភេទក្តោបត្រចៀកដំបូងបំផុតរបស់ខ្លួនកាលពីដើមខែធ្នូ ឆ្នាំ 2020។ កាសក្តោបត្រចៀកAirPods Max នេះត្រូវបានក្រុមហ៊ុនបំពាក់នូវបច្ចេកវិទ្យា ANC (Active Noise Cancellation) ជាមួយនឹងប្រព័ន្ធសំឡេងលឺខ្លាំងពិរោះរងំបំផុត និងមានថ្មកាន់បានរហូតដល់ 20 ម៉ោង រួមនឹងមុខងារ-បច្ចេកវិទ្យាទំនើបៗជាច្រើនទៀត។
បន្ទាប់ពីប្រកាសចេញលក់លើទីផ្សារមិនបានប៉ុន្មានផង ស្រាប់តែក្រុមការងារ iFixit ដែលជាក្រុមជំនាញខាងដោះមើលគ្រឿងក្នុងផលិតបច្ចេកវិទ្យាថ្មីៗបានធ្វើការដោះមើលគ្រឿងដែលបានដំឡើងនៅក្នុងកាស AirPads Max ស៊េរីថ្មីនេះ។ បើតាមរបាយការណ៍នៃការដោះមើលគ្រឿងក្នុងកាស AirPods Max ក្រុមការងារ iFixit បានផ្តល់ពិន្ទុអោយ 6 លើ 10 ទៅលើភាពងាយស្រួលដោះ និងងាយជុសជុលបំផុត។ ហើយ AirPods Max គឺជាកាសដំបូងបង្អស់ស្ថិតក្នុងស្រឡាយកាស AirPods Series ដែលផ្តល់នូវភាពងាយស្រួលដោះដូរគ្រឿងក្នុងបំផុត។
ក្រុមការងារ iFixit បានបញ្ជាក់ថា ការភ្ជាប់បង្គុំគ្រឿងបន្លាស់ខាងក្នុងរបស់ AirPods Max ត្រូវបានប្រើដោយវ៉ីសជំនួសអោយការប្រើជ័វកាវ ដូច្នេះវាផ្តល់នូវភាពងាយស្រួលក្នុងការដោះចេញ និងដាក់ចូលវិញ។ បន្ថែមពីនេះ សម្រាប់ពូកស្បែកក្តោបត្រចៀកទាំងសងខាងត្រូវបានភ្ជាប់ជាមួយនឹងក្តោបនៃកាសដោយការប្រើមេដែកឆក់ (magnetics) ដែលកាន់តែផ្តល់នូវភាពងាយស្រួលក្នុងការដោះដូរ នៅពេលដែលពូករបស់វាមានសំនើម។ ជាងនេះទៅទៀតសម្រាប់ការគន្លឹះភ្ជាប់ដៃកាសជាមួយនឹងក្តោបរបស់កាស គឺកាន់តែមានភាពស្រួលដោះបំផុត ដោយ iFixit បញ្ជាក់ថា យើងគ្រាន់តែប្រើម្ជុលចាក់ទ្រនាប់ស៊ីមកាតទូរស័ព្ទ ចុចដើម្បីដោះវាចេញដោយមិនចាំបាច់ត្រូវការដោះក្តោបកាសចេញឡើយ។ ប៉ុន្តែ ទោះបីជាយ៉ាងណា Apple មិនមែនធ្វើអោយមានភាពងាយស្រួលទាំងស្រុងក្នុងការដោះដូរគ្រឿងបន្លាស់សម្រាប់ AirPods Max របស់ខ្លួននោះទេ ព្រោះថា Apple បានប្រើប្រាស់នូវប្រភេទវ៉ីសដែលមានទំហំផ្សេងៗគ្នា ជាច្រើន ដូចនេះ យើងត្រូវការដោះដូរទំហំក្បាលវ៉ីសច្រើនដងផងដែរនៅពេលចង់ដោះវា។
ដូចគ្នានេះផងដែរ iFixit បាននិយាយថាការដោះគ្រឿងបន្លាស់របស់ AirPods Max គឺមិនមែនមានភាពងាយស្រួលសម្រាប់អ្នកគ្រប់គ្នានោះទេ ព្រោះថាផ្នែកខាងខ្លះរបស់វានៅមានប្រើជ័រកាវសម្រាប់បិទផ្ជិត បើយើងមិនមានជំនាញ និងមិនបានប្រុងប្រយ័ត្នអាចនឹងបង្ករនៅហានិភ័យបណ្តាអោយបាក់ខូចផងដែរ។ ទោះជាយ៉ាងណាបើធៀបទៅនឹងកាសប្រភេទក្តោបត្រចៀកដែលមានភាពពេញនិយមដូចគ្នា ដូចជា Sony WH-1000XM4 និង Bose NC700 កាស AirPods Max របស់ Apple មានផ្តល់ភាពងាយស្រួលក្នុងការដោះ និងជុសជុលជាង៕