ពាក្យចចាមអារ៉ាមថ្មីមួយនិយាយថា Nintendo Switch Pro ដែលទ្រទ្រង់ទៅលើកម្រិតភាពច្បាស់ 4K នឹងបង្ហាញខ្លួននៅចុងឆ្នាំនេះហើយ

Nintendo Switch គឺជាឧបករណ៍ Gaming Console ដ៏ពេញនិយមនៅលើទីផ្សារនៃឧស្សាហ៍កម្មផលិតផលហ្គេម ហើយពេលនេះ លឺថា ក្រុមហ៊ុនបច្ចេកវិទ្យានេះ ក៏បានត្រៀមខ្លួនក្នុងការប្រកាសបង្ហាញនូវ version ថ្មីរបស់ខ្លួន ដែលមានឈ្មោះហៅថា Nintendo Switch Pro ផងដែរ។ នៅពេលនេះ ប្រភពខាងក្នុងរបស់ក្រុមហ៊ុននេះ បានទម្លាយថា ម៉ូឌែលថ្មីនេះនឹងមានការទ្រទ្រង់ទៅលើកម្រិតភាពច្បាស់ 4K ។

វាមានការទម្លាយថា Nintendo Switch Pro នេះនឹងប្រកាសជាផ្លូវការនៅចុងឆ្នាំនេះ។ យ៉ាងណាមិញ ក្រុមហ៊ុននេះនៅមិនទាន់បញ្ជាក់ជាផ្លូវការអំពីកាលបរិច្ឆេទនៃការសម្ភោធន៍ជាផ្លូវការនៅឡើយទេ ឬវត្តមានរបស់ឧបករណ៍ Switch Pro នេះទេ។ ពាក្យចចាមអារ៉ាមជាច្រើនទម្លាយថា Nintendo Switch Pro នេះក៏មានការបែកធ្លាយនៅលើអនឡាញនៅចំពេលដែលមានការប្រកាសបង្ហាញនូវវត្តមានរបស់ Sony PlayStation 5 និង Microsoft Xbox Series X ផងដែរ។ មកដល់ពេលនេះ គឺមានរយៈពេល 4 ឆ្នាំហើយចាប់តាំងពីក្រុមហ៊ុន Nintendo បង្ហាញនូវឧបករណ៍ Switch ហើយមនុស្សជាច្រើនក៏រីករាយមែនទែននៅពេលដែលក្រុមហ៊ុននេះបង្ហាញនូវ version ថ្មីរបស់ឧបករណ៍នេះនៅក្នុងពេលដ៏ខ្លីខាងមុខនេះ។

កាលពី 2 ខែមុននេះ លោក Doug Bower ដែលជាអ្នកដឹកនាំទៅលើ Nintendo នៅក្នុងសហរដ្ឋអាមេរិក ក៏បាននិយាយដែរថា Switch Lite មានទីផ្សារល្អមែនទែននៅទីនេះ ហើយក្រុមហ៊ុនក៏ប្រហែលជាមិនទាន់ធ្វើការនៅលើឧបករណ៍ថ្មីរបស់ខ្លួននៅឡើយទេ។ លោក Nate Drake បាននិយាយថា គាត់ជឿជាក់ថា សម្រាប់ Switch Pro នឹងបង្ហាញខ្លួននៅឆ្នាំនេះ។ សូមជំរាបថា ឧបករណ៍ Nintendo Switch Pro នេះ ត្រូវគេរំពឹងថានឹងមានការ upgrade Tool ទៅលើកម្រិតភាពច្បាស់របស់វាដែលមានឈ្មោះហៅថា DLSS ហើយវាមានការទ្រទ្រង់ទៅលើកម្រិតភាពច្បាស់ 4K ថែមទៀតផង។ ឧបករណ៍ងហ្គេមនេះ ក៏មានការពង្រឹងទៅលើ Portal Mode ហើយវាក៏នឹងមានការ upgrades ជាច្រើនថែមទៀតផងដែរ៕