ស្ថាប័ន International Data Corporation ហៅកាត់ថា IDC ទើបតែបានបញ្ចេញរបាយការណ៍លក់ស្មាតហ្វូនសម្រាប់ទីផ្សារប្រទេសជប៉ុន នៅត្រីមាសទី 4 ក្នុងឆ្នាំ 2020 ក៏ដូចជារបាយការណ៍លក់ពេញមួយឆ្នាំ 2020 ផងដែរ។ ក្នុងរបាយការណ៍បានបង្ហាញថា ក្រុមហ៊ុន Apple គឺម៉ាកយីហោស្មាតហ្វូនដ៏មានប្រជាប្រិយភាពបំផុតនៅទីផ្សារប្រទេសជប៉ុន។ ក្រុមហ៊ុនបច្ចេកវិទ្យាយក្ស ដែលមានមូលដ្ឋាននៅទីក្រុង Cupertino របស់អាមេរិក រួមជាមួយម៉ាកយីហោស្មាតហ្វូនក្នុងស្រុកចំនួន 4 រួមនិងក្រុមហ៊ុន Samsung បានដណ្តើមទីផ្សារលក់ភាគច្រើននៅក្នុងប្រទេសមួយនេះ។
ក្នុងរបាយការណ៍របស់ IDC បានអោយដឹងថា ទីផ្សារនាំចេញទូរស័ព្ទស្មាតហ្វូននៅក្នុងទីផ្សារប្រទេសជប៉ុនក្នុងត្រីមាសទី 4 ឆ្នាំ 2020 គឺមានចំនួន 11.432 លានគ្រឿងកើនឡើង 10.6% បើធៀបពីមួយឆ្នាំទៅមួយឆ្នាំ។ ហើយមូលហេតុដែលធ្វើអោយទីផ្សារចេញលក់ក្នុងត្រីមាសចុងក្រោយនាឆ្នាំកន្លងទៅមានការកើនឡើង គឺដោយសារតែការចេញលក់ទូរស័ព្ទ iPhone 12 Series ដែលបំពាក់នូវប្រព័ន្ធសេវា 5G។
ការនាំចេញទូរស័ព្ទ iPhone Series របស់ក្រុមហ៊ុន Apple បានកើនឡើងសរុបដល់ 13,8% បើធៀបពីមួយឆ្នាំទៅមួយឆ្នាំដែលសរុបជាតួលេខមានចំនួន 6.015 លានគ្រឿង និងបានក្តោបក្តាប់ចំណែកទីផ្សារដល់ទៅ 52.6% ក្នុងត្រីមាសកន្លងទៅក្នុងឆ្នាំ 2020។ ចំនែកក្រុមហ៊ុនដែលឈរនៅលេខរៀងបន្ទាប់ពី Apple គឺក្រុមហ៊ុន Sharp ដែលបាននាំចេញស្មាតហ្វូនរបស់ខ្លួនចំនួន 1.414 លានគ្រឿងមានចំនែកទីផ្សារ 12.4%។ ក្រុមហ៊ុន Kyocera ឈរនៅលេខរៀងទីបីដោយបាននាំចេញស្មាតហ្វូនរបស់ខ្លួនចំនួន 801,000 គ្រឿងមានចំនែកទីផ្សារ 7.0% រីឯ Samsung វិញឈរនៅលេខរៀងទីបួនដោយមានចំនែកទីផ្សារ 6.8% ជាមួយការនាំចេញស្មាតហ្វូនបានចំនួន 871,000 គ្រឿង និងចុងក្រោយគឺក្រុមហ៊ុន SONY ដែលទទួលបានចំនែកទីផ្សារសរុប 6.4% ក្នុងត្រីមាសទី 4 ឆ្នាំ 2020 ដោយបាននាំចេញស្មាតហ្វូនចំនួន 732,000 គ្រឿង។
IDC បានបញ្ជាក់ថា ក្នុងរយះពេលពេញមួយឆ្នាំ 2020 ក្រុមហ៊ុន Apple មានទីផ្សារល្អខ្លាំងក្នុងប្រទេសជប៉ុន និងក្លាយជាម៉ាកយីហោទូរស័ព្ទធំជាងគេក្នុងប្រទេសអាស៊ីមួយនេះ។ ក្រុមហ៊ុន Apple បានក្តោបក្តាប់ទីផ្សារស្មាតហ្វូនរបស់ប្រទេសជប៉ុនជិតពាក់កណ្តាលជាមួយនឹងចំនែកទីផ្សារសរុបឡើងដល់ 46.5% សរុបតួលេខនៃការនាំចេញគឺមានចំនួន 15.637 លានគ្រឿងកើនឡើង 8% បើធៀបពីមួយឆ្នាំទៅមួយឆ្នាំ។
ក្រុមហ៊ុនរបស់ប្រទេសជប៉ុនដូចជា Sharp, Fujitsu និង Kyocera មានចំនែកទីផ្សារសរុបគឺ 13.3%, 8.3% និង 7.5% ចំនែក Samsung វិញមានចំនែកទីផ្សារសរុប 8.1% ជាមួយការនាំចេញបានចំនួន 2.711 លានគ្រឿង។ បើសរុបចំនួនជាតួលេខនៃការនាំចេញស្មាតហ្វូនរបស់ក្រុមហ៊ុនជប៉ុនទាំងបីខាងលើនេះវិញ គឺមានចំនួន 4.474 លានគ្រឿង, 2.794 លានគ្រឿង និង 2.5 លានគ្រឿង។ ក្នុងរបាយការណ៍របស់ IDC ដដែលក៏បានចែកចំនាត់ថ្នាក់ទីផ្សាររបស់ក្រុមហ៊ុនស្មាតហ្វូនឈានមុខគេក្នុងទីផ្សារប្រទេសជប៉ុនក្នុងឆ្នាំ 2020 ផងដែរដោយក្នុងគឺ Apple (47.3%), Sharp (12.7%), Fujitsu (8.5%), Samsung (8.2%), និងKyocera (7.2%)៕