តាមការបញ្ជាក់នៅក្នុងរបាយការណ៍ជាច្រើននាពេលថ្មីៗនេះ ដែលមានការពាក់ព័ន្ធទៅនឹងប្រទេសអូស្រា្តលីនោះ ក្រុមហ៊ុន Facebook គឺបានឈានដល់កិច្ចព្រមព្រៀងមួយហើយ។ បន្ទាប់ពីការរឹតបន្តឹងទៅលើអ្នកប្រើប្រាស់ជាច្រើន នៅក្នុងប្រទេសអូស្រ្តាលីនោះក្នុងការមើល ឬការចែករំលែកនូវព័ត៌មាននៅលើ Facebook នោះ ការហាមប្រាមនេះ គឺចប់ហើយ។ រដ្ឋាភិបាលរបស់អូស្រា្តលី និង Facebook បានធ្វើការចរចារគ្នា ហើយក៏ឈានដល់លទ្ធផលវិជ្ជមានហើយ។ រដ្ឋាភិបាលរបស់ប្រទេសអូស្រា្តលីក៏អនុម័តទៅលើច្បាប់ប្រព័ន្ធផ្សព្វផ្សាយថ្មីដែលទាមទារអោយវេទិកាឌីជីថលត្រូវបង់ប្រាក់សម្រាប់ព័ត៌មាន។
ក្រុមហ៊ុន Facebook និយាយនៅក្នុងសេចក្តីប្រកាសថ្មីៗនេះថា “បន្ទាប់ពីការពិភាក្សាជាច្រើនរួចមកនោះ យើងពេញចិត្តដែលថា រដ្ឋាភិបាលរបស់ប្រទេសអូស្រា្តលីបានយល់ព្រមក្នុងការផ្លាស់ប្តូរ និងការប្តេជ្ញាចិត្តមួយចំនួនដែលបង្ហាញអំពីការព្រួយបារម្ភរបស់យើង។” រដ្ឋាភិបាលដែលដឹកនាំដោយនាយករដ្ឋមន្ត្រី Scott Morrison ក៏បានធ្វើការកែសម្រួលទៅលើអនុក្រឹត “News Media Negotiation Act” នេះផងដែរ។ នៅក្នុងពេលនេះ បទបញ្ញត្តិនេះក៏ស្ថិតនៅក្នុងសភា ហើយវាក៏នឹងក្លាយជាច្បាប់ហើយ។ ច្បាប់នេះគឺត្រូវបានប្រកាសដោយសភានៅក្នុងខែធ្នូឆ្នាំមុននេះ។
គួរបញ្ជាក់ផងដែរថា ប្រទេសអូស្រា្តលីចង់អោយវេទិកាឌីជីថលបង់ប្រាក់ទៅកាន់សារព័ត៌មានក្នុងស្រុក និងប្រព័ន្ធផ្សព្វផ្សាយជាច្រើន ដើម្បីធ្វើការភ្ជាប់នូវមាតិការបស់ខ្លួនទៅកាន់ News Feeds ឬលទ្ធផលនៅក្នុងការ Search។ អ្នកជំនាញបាននិយាយថា ប្រសិនបើភាគីទាំងពីរមិនអាចឈានដល់កិច្ចព្រមព្រៀងពាណិជ្ជកម្មនេះ រដ្ឋាភិបាលអាចកំណត់ទៅលើតម្លៃចុងក្រោយ។ នេះមានន័យថា ការសម្រេចចិត្តនេះគឺជាការពេញចិត្តទាំងសងខាង៕