ថ្មីៗនេះក្រុមហ៊ុន Lenovo បានប្រកាសចេញម៉ូនីទ័រអេក្រង់កោងស៊េរីថ្មីរបស់ខ្លួនម៉ូដែល ThinkVision P40W ដែលមានអេក្រង់ទំហំ 39.7 អ៊ីញ។ ជាមួយអេក្រង់កោងរបស់ម៉ូនីទ័រស៊េរីថ្មីនេះត្រូវបានក្រុមហ៊ុន Lenovo បញ្ជាក់ថា មានសមត្ថភាពទ្រទ្រង់កម្រិតរីសូលូហ្ស៊ិនរូបភាព-វីដេអូខ្ពស់ដល់ 5120 x 2160px ខ្នាតបង្ហាញ Wide Ultra-HD (WUHD) នៅលើខ្នាត aspect ratio 21:9 ជាមួយកម្រិត refresh rate 70Hz និងបច្ចេកវិទ្យាលាយពណ៌កម្រិត 98% DCI-P3 Color Gamut។
បន្ថែមពីនេះអេក្រង់របស់ ThinkVision P40W ភ្ជាប់នូវកម្រិតពន្លឺ 300nits និងកម្រិត Contrast IPS 1000:1 ហើយវាក៏មានមុខងារ Blue Light Reduction ដើម្បីជួយកាត់បន្ថយកម្រិតពន្លឺពណ៌ខៀវខ្លាំងចេញពីអេក្រង់ ដើម្បីជួយការពារមិនអោយប៉ះពាល់ភ្នែកឡើយ។ ចំនុចពិសេសនៅលើម៉ូនីទ័រអេក្រង់កោងស៊េរីថ្មីរបស់ Lenovo មួយនេះគឺមានដំឡើងនូវរន្ធភ្ជាប់ខ្សែបណ្តាញ RJ45 Port ដែលអាចផ្លាស់ប្តូរខ្លួនវាទៅជា Network Hub ទ្រទ្រង់នូវមុខងារ Wake-On-LAN, PXE, និង MAC pass-through ថែមទៀតផង។
ក្រុមហ៊ុន Lenovo គឺជាក្រុមហ៊ុនដំបូងគេដែលផលិតចេញនូវម៉ូនីទ័រប្រើប្រាស់នូវបច្ចេកវិទ្យាថ្មីរបស់ក្រុមហ៊ុន Intel គឺ AMT (Active Management Technology) ភ្ជាប់ជាមួយមុខងារ vPro ដែលប្រើនៅលើឧបករណ៍ ThinkPads ដើម្បីផ្តល់នូវសមត្ថភាពគ្រប់គ្រងបន្ថែមកាន់តែសម្បូរបែបនៅលើម៉ូនីទ័រអេក្រង់កោងស៊េរីថ្មីនេះ។ ជាមួយគ្នានេះដែរ ThinkVision P40W មានភ្ជាប់ដំឡើងមកជាមួយរន្ធសម្រាប់សាកថ្មទៅអោយកុំព្យូទ័រយួរដៃប្រភេទ Thunderbolt 4 ទ្រទ្រង់កំលាំងសាកភ្លើងចេញដល់ 100W។ ThinkVision P40W មានរន្ធដោតសម្រាប់តភ្ជាប់ចំនួន 12 រន្ធ ដោយក្នុងនោះរួមបញ្ចូលទាំងរន្ធ Thunderbolt 4 ចំនួនពីរ និង USB-Type-C ចំនួនមួយផងដែរ។
Lenovo ក៏បានភ្ជាប់នូវមុខងារ eKVM Switch នៅលើម៉ូនីទ័រស៊េរីថ្មីនេះផងដែរ ដែលអនុញ្ញាតិអោយអ្នកប្រើប្រាស់មានភាពងាយស្រួលក្នុងគ្រប់គ្រងឧបករណ៍ពីរចេញពីអេក្រង់តែមួយ ហើយជាមួយរន្ធ Thunderbolt 4 គឺអ្នកប្រើប្រាស់អាចធ្វើការបញ្ចូលរូបភាព ឬវីដេអូទៅកាន់អេក្រង់ម៉ូនីទ័រកម្រិត 5K ផងដែរ។ ទោះជាយ៉ាងណា ដោយសារតែ Lenovo ThinkVision P40W គឺជាម៉ូនីទ័រអេក្រង់កោងស្ថិតក្នុងលំដាប់ Premium Monitor ដូច្នេះ តម្លៃរបស់វាក៏រាងថ្លៃគួរសមដែរ ដោយ Lenovo បានប្រកាសចេញលក់ម៉ូនីទ័រអេក្រង់ស៊េរីថ្មីនេះនៅទីផ្សារសហរដ្ឋអាមេរិកក្នុងតម្លៃខ្ទង់ $1,699 ហើយក្រុមហ៊ុននឹងចេញលក់ម៉ូនីទ័រអេក្រង់កោងនេះផ្លូវការណ៍នៅខែមិថុនា ឆ្នាំ 2021៕
