ថ្មីៗនេះមានរបាយការណ៍ជាច្រើនដែលបាននឹងកំពុងតែនិយាយពីផលិតផលស៊េរីថ្មីជាច្រើនរបស់ក្រុមហ៊ុន Apple ដែលនឹងមកដល់ក្នុងពេលឆាប់ៗខាងមុខនេះ ហើយក្នុងចំនោមផលិតផលថ្មីទាំងនោះក៏មានម៉ាស៊ីន iMac ស៊េរីឆ្នាំ 2021 ផងដែរ ដែលគ្រប់គ្នាបានរំពឹងថា ម៉ាស៊ីន iMac ជំនាន់ថ្មីនឹងបង្ហាញខ្លួនមកជាមួយនឹងការបំពាក់នូវឈីប ARM-Apple Silicon ផ្ទាល់ខ្លួន ដែលមិនមែនជាឈីបរបស់ក្រុមហ៊ុន Intel ទៀតទេ។
បើយោងតាមរបាយការណ៍ព្យាករណ៍របស់លោក Jon Prosser ដែលជាអ្នកទម្លាយព័ត៌មានដ៏ល្បីល្បាញមួយរូបកាលពីពេលថ្មីនេះ បានបង្ហើបថា ម៉ាស៊ីន Apple iMac ស៊េរីឆ្នាំ 2021 ដែលនឹងមកដល់នៅពេលខាងមុខ នឹងមានរហូតដល់ទៅ 5 ពណ៌ឯណោះ ដែលក្នុងនោះរួមមានពណ៌ទឹកប្រាក់ ប្រផេះ បៃតង ផ្ទៃមេឃ និងផ្កាឈូក។ ដែលពណ៌ទាំងនេះគឺដូចគ្នានឹងពណ៌ដែល Apple បានប្រើនៅលើ iPad Air ជំនាន់ទី 4 ដែលចេញកាលពីឆ្នាំ 2020 ដែរ។ បន្ថែមពីនេះលោក Jon Prosser មានជំនឿជាក់ទៀតថា ជាមួយនឹងជម្រើសពណ៌ជាច្រើនសម្រាប់ iMac 2021 ដែលចេញនាពេលខាងមុខ ក្រុមហ៊ុន Apple គ្រោងនឹងនាំយកជម្រើសពណ៌ដើមជាច្រើនទៀតដែលមាននៅលើ iMac បច្ចុប្បន្នមកវិញផងដែរក្នុងនោះមានដូច Lime, Strawberry, Blueberry, Grape, និង Tangerine ជាដើម។
សម្រាប់ប្រភពព័ត៌មានមួយចំនួនទៀតដែលបានចុះផ្សាយនាពេលកន្លងមកបាននិយាយថា iMac 2021 Series នឹងមានការកែប្រែរចនាបថថ្មីដែលនឹងមានគែមអេក្រង់តូចស្តើងជាងមុន រួមទាំងការបំពាក់នូវឈីបជំនាន់ចុងក្រោយ Apple ផ្ទាល់ ដែលជាការ Upgrade ថ្មីបន្ថែមពីលើបន្ទះឈីប Apple M1។ ទោះជាយ៉ាងណា បើតាមប្រភពព័ត៌មានចុងក្រោយមួយផ្សេងទៀតបាននិយាយថា ម៉ាស៊ីន Apple iMac 2021 អាចនឹងត្រូវចេញលក់ផ្លូវការណ៍នៅជិតដំណាច់ឆ្នាំ 2022 ប៉ុន្តែ Apple នឹងបង្ហាញចេញផ្លូវការណ៍នៅចុងឆ្នាំ 2021 នេះ៕