ថ្មីៗនេះ ក្រុមហ៊ុន Huawei បានបង្ហាញនូវស្មាតហ្វូនដែលអាចបត់បានម៉ូឌែលចុងក្រោយបំផុតរបស់ខ្លួនគឺ Huawei Mate X2 ។ នៅថ្ងៃនេះ ស្មាតហ្វូននេះ នឹងដាក់លក់ជាផ្លូវការនៅលើហាង Huawei Mall និងnនៅលើហាងអនឡាញ E-commerce ជាច្រើនទៀត។ ស្មាតហ្វូននេះ ត្រូវបានគេមើលឃើញថា មិនមែនមានតម្លៃថោកនោះទេ។ ស្មាតហ្វូន Huawei Mate X2 នេះគឺមាន 2 ម៉ូឌែលនោះគឺ 8GB+256GB មានតម្លៃ 17,999 yuan ($2,785) និងទំហំ 8GB+512GB មានតម្លៃ 18999 yuan ($2,939)។
បើមើលទៅតម្លៃរបស់ស្មាតហ្វូននេះ គឺមិនធម្មតានោះទេ។ តាមការបញ្ជាក់នៅក្នុងរបាយការណ៍ជាច្រើននោះ បានអោយដឹងថា ការលក់ស្មាតហ្វូននេះ គឺចាប់ផ្តើមហើយ។ គួរបញ្ជាក់ផងដែរថា នៅពេលដែលក្រុមហ៊ុន Huawei ប្រកាសចាប់ផ្តើមលក់ភ្លាម គឺអស់ពីស្តុករលីងតែម្តងភ្លាមៗ។ តាមការបញ្ជាក់នៅក្នុងរបាយការណ៍ជាច្រើន គឺអោយដឹងថា ការ Pre-order ទៅលើស្មាតហ្វូន Huawei Mate X2 នៅលើ Huawei Mall គឺច្រើនជាង 3.75 លានគ្រឿង។
តាមការបញ្ជាក់នៅក្នុង Huawei Mall បន្ថែមថា ការលក់នេះ នឹងធ្វើឡើងនៅតាមពេលវេលាកំណត់គឺនៅម៉ោង 10:08 ព្រឹក រៀងរាល់ថ្ងៃចន្ទ ពុធ និងសុក្រ។ លោក Yu Chengdong នាយកប្រតិបត្តិរបស់ក្រុមហ៊ុន Huawei បានលើកឡើងនៅក្នុងសន្និសីទនេះថា “លោកចង់ប្រាប់ទៅកាន់អតិថិជនជាច្រើនថា យើងត្រៀមការផលិតបានគ្រប់ចំនួន ហើយយើងនឹងបង្កើននូវការផលិតរៀងរាល់សប្តាហ៍ និងរៀងរាល់ខែ។ យើងសង្ឃឹមថា អ្នកប្រើប្រាស់ជាច្រើន អាចទិញស្មាតហ្វូននេះ នៅក្នុងតម្លៃមួយដែលសមរម្យបំផុត៕”
