ក្នុងឆ្នាំ 2020 បើទោះបីជាពិភពលោកជូបប្រឈមនឹងការរីករាលដាល់នូវជំងឺដ៏កាចសាហាវ (COVED-19) ដែលធ្វើអោយប៉ះពាល់ដល់អាជីវកម្មជាច្រើនក្នុងនោះក៏មានអាជីវកម្មទូរស័ព្ទចល័តផងក្តី ដែលធ្វើអោយការចរាចរលក់ទូរស័ព្ទស្មាតហ្វូននៅទូទាំងពិភពលោកមានធ្លាក់ចុះបន្តិចបើធៀបនឹងឆ្នាំ 2019។
ទោះជាយ៉ាងណា បើតាមរបាយការណ៍ស្រាវជ្រាវមួយដែលធ្វើឡើងដោយស្ថាប័ន Omdia របស់ចក្រភពអង់គ្លេស បានបង្ហាញពីទូរស័ព្ទស្មាតហ្វន 10 ម៉ូដែល ដែលមានទីផ្សារនាំចេញល្អបំផុតនៅកំឡុងឆ្នាំ 2020។ ក្នុងរបាយការណ៍របស់ Omdia បានសំណៅទៅលើទូរស័ព្ទចំនួន 10 ម៉ូដែលរបស់ក្រុមហ៊ុនល្បីៗចំនួនបីគឺ Apple, Samsung និង Xiaomi។
នៅលើតារាងចំណាត់ថ្នាក់របស់ Omdia បានបង្ហាញថា ទូរស័ព្ទ iPhone 11 បានឈរនៅកំពូលតារាងនៃការនាំចេញបានច្រើនជាងគេក្នុងឆ្នាំ 2020 មានចំនួនដល់ទៅ 64.8 លានគ្រឿង ហើយមួយគ្រឿងមានតម្លៃជាមធ្យមខ្ទង់ $754។ សម្រាស់ទូរស័ព្ទ Apple ដែលឈរនៅលេខរៀងទី2, 3, 7 និងទី 10 គឺ iPhone SE (2020) នាំចេញបានចំនួន 24.2 លានគ្រឿង, iPhone 12 បានចំនួន 23.3 លានគ្រឿង, iPhone 12 Pro Max បានចំនួន 16.8 លានគ្រឿង និង iPhone 12 mini បានចំនួន 14.8 លានគ្រឿង។
សម្រាប់កតា្តតម្លៃជាមធ្យមរបស់ទូរស័ព្ទ iPhone ទាំងបួនស៊េរីគឺ $451, $896, $1,232, និង $796។ ក្នុងរបាយការណ៍ក៏បានបញ្ជាក់ថា iPhone 12 mini មានតួរលេខនាំចេញបានច្រើនជាង iPhone 12 Pro តែមិនបានបង្ហាញតួរលេខនៃការនាំចេញរបស់ iPhone 12 Pro នោះទេ។ ងាកមកស្មាតហ្វូនរបស់ Samsung វិញគឺមានចំនួន 4 ស៊េរីដែលនាំចេញបានច្រើនជាងគេក្នុងនោះរួមមាន Galaxy A51 ឈរនៅលេខរៀងទី 4 បន្ទាប់ពី iPhone 12 ជាមួយចំនួននៃការនាំចេញបាន 23.2 លានគ្រឿង ដោយមួយគ្រឿង មានតម្លៃជាមធ្យមខ្ទង់ $269។
បន្ទាប់មកគឺ Galaxy A21s មានចំនួននាំចេញបាន 19.4 លានគ្រឿង ($192/Unit), Galaxy A01 នាំចេញបានចំនួន 16.9 លានគ្រឿង ($115/Unit) និង Galaxy A11 ឈរនៅលេខរៀងទី 8 បន្ទាប់ពី iPhone 12 Pro Max ដោយនាំចេញបានចំនួន 15.3 លានគ្រឿង ($158/Unit)។ ចុងក្រោយគឺ Redmi 9 Pro របស់ Xiaomi ដែលស្ថិតនៅលេខរៀងទី 9 ជាមួយនឹងចំនួននៃការនាំចេញបាន 15 លានគ្រឿង ដោយតម្លៃជាមធ្យមរបស់ស្មាតហ្វូនមួយនេះគឺខ្ទង់ $161 ក្នុងមួយគ្រឿង៕
