TSMC គឺជាក្រុមហ៊ុនផលិតបន្ទះឈីបធំបំផុតរបស់ពិភពលោក ហើយក្រុមហ៊ុនបច្ចេកវិទ្យារបស់តៃវ៉ាន់នេះ ពិតជាធ្វើបានយ៉ាងល្អមែនទែននៅលើទីផ្សារ។ តាមការបញ្ជាក់នៅក្នុងរបាយការណ៍នាពេលថ្មីៗនេះ ប្រាក់ចំណូលរបស់ក្រុមហ៊ុន TSMC នេះគឺខ្ពស់មែនទែនកាលពីឆ្នាំមុននេះ ដែលមានចំនួន 45 ពាន់លានដុល្លារអាមេរិក។ យ៉ាងណាមិញ ការចំណាយរបស់ក្រុមហ៊ុននេះទៅលើបច្ចេកវិទ្យាកម្រិតខ្ពស់ ការផលិត ការស្រាវជ្រាវ និងការអភិវឌ្ឍក៏មានការកើនឡើងខ្លាំងផងដែរ។
នៅក្នុងរបាយការណ៍មួយចេញពី TSMC មានការបង្ហាញថា ការចំណាយនៅក្នុងឆ្នាំ 2020 នេះ គឺមានចំនួន NT$507.24 ពាន់លាន ($18.174 ពាន់លានដុល្លារអាមេរិក) ដែលមានការកើនឡើងទៅលើការចំណាយច្រើនជាងឆ្នាំ 2019 ចំនួន 10.2% ។ នៅក្នុងរបាយការណ៍ហិរញ្ញវត្ថុសម្រាប់ត្រីមាសទី 4 ឆ្នាំ 2019 ដែលចេញផ្សាយនៅថ្ងៃទី 16 ខែមករាឆ្នាំមុននេះ ការគ្រប់គ្រងរបស់ក្រុមហ៊ុន TSMC អោយដឹងថា ការចំណាយរបស់ក្រុមហ៊ុននៅក្នុងឆ្នាំ 2020 នេះគឺចន្លោះពី 15 ទៅ 16 ពាន់លានដុល្លារអាមេរិក ដែលមានការប្រែប្រួលនៅក្នុងរបាយការណ៍ហិរញ្ញវត្ថុសម្រាប់ត្រីមាសទី 2 ឆ្នាំមុននេះជាមួយនឹងការកើនឡើងទៅដល់ 16 ទៅ 17 ពាន់លានដុល្លារអាមេរិក ហើយការចំណាយចុងក្រោយគឺលើសពី 18.174 ពាន់លានដុល្លារអាមេរិក។
មួយរយៈនេះ TSMC ក៏ធ្វើការពង្រីកទៅលើការផលិតនៃដំណើរការបច្ចេកវិទ្យា 5nm របស់ខ្លួនតាមរយៈការតម្លើងនូវឧបករណ៍សម្រាប់រោងចក្រផលិតបន្ទះឈីប 3nm និងការអភិវឌ្ឍទៅលើការស្រាវជ្រាវ និងការអភិវឌ្ឍសម្រាប់ដំណើរការកម្រិតខ្ពស់ថែមទៀត។ ការចំណាយនៅក្នុងឆ្នាំនេះគឺប្រហែលជាច្រើនជាង 25 ទៅ 28 ពាន់លានដុល្លារអាមេរិក។
របាយការណ៍ជាច្រើនចេញពីតៃវ៉ាន់ បានបន្តអះអាងថា ក្រុមហ៊ុន Intel ក៏បានចុះកិច្ចសន្យាក្នុងការផ្គត់ផ្គង់ជាមួយនឹងក្រុមហ៊ុន TSMC កាលពីឆ្នាំមុននេះ ហើយនឹងធ្វើការផលិតនូវបន្ទះឈីបជាច្រើនសម្រាប់ CPUs ដោយប្រើប្រាស់នូវបច្ចេកវិទ្យា 3nm នៅក្នុងឆមាសទី 2 ឆ្នាំ 2022 នេះ។ តាមការបញ្ជាក់របស់របាយការណ៍នេះ ក្រុមហ៊ុន Intel នឹងក្លាយជាអតិថិជនធំបំផុតទី ២ របស់ក្រុមហ៊ុន TSMC ទៅលើបន្ទះឈីប 3nm នេះ។ ក្រុមហ៊ុន Intel ក៏ចរចារជាមួយនឹងក្រុមហ៊ុន TSMC និង Samsung ក្នុងការពិភាក្សាអំពីលទ្ធភាពក្នុងការលក់បន្ទះឈីបកម្រិតខ្ពស់ទៅកាន់ក្រុមហ៊ុនទាំងពីរនេះផងដែរ៕
