នាពេលបច្ចុប្បន្ននេះ ក្រុមហ៊ុន TSMC គឺបានធ្វើការផលិតទៅលើបន្ទះឈីប 5nm ហើយដំណើរការ 3nm គឺស្ថិតនៅក្នុងការអភិវឌ្ឍផងដែរ។ ក្រុមហ៊ុននេះ ត្រូវបានគេមើលឃើញថា ក៏នឹងបន្តក្នុងការអភិវឌ្ឍទៅលើបច្ចេកវិទ្យា 2nm របស់ខ្លួនថែមទៀតផង។ តាមការបញ្ជាក់នៅក្នុងរបាយការណ៍ថ្មីៗនេះ បានអោយដឹងថា ក្រុមហ៊ុននេះក៏ធ្វើការតែងតាំងនូវបុគ្គលិកជាន់ខ្ពស់ចំនួន 4 នាក់របស់ខ្លួននៅក្នុងរយៈពេលប៉ុន្មានខែនេះផងដែរ។
ការតែងតាំងនេះ គឺដាក់អោយគ្រប់គ្រងទៅលើដំណើរការនៃការផលិតទៅលើបច្ចេកវិទ្យា 2nm ដែលស្ថិតនៅក្នុងការស្រាវជ្រាវ និងការអភិវឌ្ឍនោះ។ កាលពីឆ្នាំមុននេះ ក្រុមហ៊ុននេះ ក៏បានតែងតាំងនូវនាយកគ្រប់គ្រងថ្មី 2 នាក់អោយក្លាយជាអគ្គនាយករងជាន់ខ្ពស់ផងដែរ។ នៅក្នុងពេលនេះ នាយកប្រតិបត្តិជាន់ខ្ពស់ជាច្រើនរូបក៏ឡើងតំណែងផងដែរ។ នៅពេលនេះ នាយកប្រតិបត្តិ 2 នាក់ត្រូវបានតែងតាំងតំណែងថ្មីផងដែរ។ អ្វីដែលគួរអោយចាប់អារម្មណ៍នោះ នាយកប្រតិបត្តិម្នាក់នឹងធ្វើការស្រាវជ្រាវ និងអភិវឌ្ឍទៅលើដំណើរការបច្ចេកវិទ្យា 2nm នេះតែម្តង។
លោក Geoffrey Yeap បានក្លាយជាអគ្គនាយកជាន់ខ្ពស់ក្នុងការគ្រប់គ្រងទៅលើការស្រាវជ្រាវ និងអភិវឌ្ឍទៅលើដំណើរការ 2nm នេះ។ គួរបញ្ជាក់ផងដែរថា ក្រុមហ៊ុន TSMC បានទាមទារនូវតម្រូវការខ្ពស់មែនទែនសម្រាប់បុគ្គលិកផ្នែកគ្រប់គ្រងរបស់ខ្លួន។ អគ្គនាយករងថ្មី 2 នាក់នេះ គឺមានសញ្ញាបត្រដល់ទៅបណ្ឌិតថែមទៀត។ សូមជំរាបថា ទើបតែប៉ុន្មានខែប៉ុណ្ណោះ ក្រុមហ៊ុននេះ ក៏ជ្រើសតាំងក្រុមការងារក្នុងការអភិវឌ្ឍទៅលើបច្ចេកវិទ្យា 2nm ៕