ប្រទេស ចិន គឺជាទីផ្សារស្មាតហ្វូនដ៏ធំបំផុតរបស់ពិភពលោក ហើយទីនេះ ក៏មានក្រុមហ៊ុនផលិតស្មាតហ្វូនជាច្រើននៅទីនេះផងដែរ។ យ៉ាងណាមិញ ទីផ្សារនៅក្នុងប្រទេសចិន គឺមានភាពស្មុគស្មាញមែនទែន ហើយវាក៏មានការប្រកួតប្រជែងខ្លាំងក្លាផងដែរ។ យ៉ាងណាមិញ នៅទីនេះគឺមានអ្នកចាញ់ និងអ្នកឈ្នះផងដែរ។
ក្រុមហ៊ុន Huawei ដែលធ្លាប់ជាក្រុមហ៊ុនដែលឈានមុខគេនៅលើទីផ្សារក៏ចាប់ផ្តើមបាត់បង់នូវចំណែកទីផ្សារស្មាតហ្វូនរបស់ខ្លួននៅក្នុងប្រទេសចិនផងដែរ។ នេះមិនមានអ្វីដែលគួរអោយភ្ញាក់ផ្អើលនោះទេដោយសារតែក្រុមហ៊ុននេះស្ថិតនៅក្នុងបញ្ជីខ្មៅរបស់អាមេរិក និងប្រឈមុខទៅនឹងការហាមឃាត់ជាច្រើនផងដែរ។ ចាប់តាំងពីខែសីហា ឆ្នាំ 2020 មក ចំណែកទីផ្សារស្មាតហ្វូនរបស់ក្រុមហ៊ុន Huawei នៅក្នុងប្រទេសចិន គឺមានការធ្លាក់ចុះ។ នេះគឺដោយសារតែក្រុមហ៊ុននេះ មិនអាចសហការជាមួយនឹងក្រុមហ៊ុន TSMC សម្រាប់បន្ទះឈីប Flagship បាន។
ដូច្នេះ ការលក់ស្មាតហ្វូនរបស់ក្រុមហ៊ុននេះ គឺមានចំនួនកំណត់សម្រាប់ការដាក់លក់នៅលើទីផ្សារផងដែរ។ សម្រាប់ក្រុមហ៊ុន Huawei ការនាំយកនូវសមាសភាគ 5G ដែលមិនមានបច្ចេកវិទ្យារបស់សហរដ្ឋអាមេរិកនោះ ពិតជារឿងដែលពិបាកមែនទែន។ វាបានធ្វើអោយប៉ះពាល់ដល់ក្រុមហ៊ុននេះដោយសារតែស្មាតហ្វូនច្រើនជាង 65% នៅក្នុងប្រទេសចិន នៅក្នុងត្រីមាសទី 4 ឆ្នាំ 2020 នេះគឺជាស្មាតហ្វូនប្រភេទ 5G ។
តាមការបញ្ជាក់នៅក្នុងរបាយការណ៍ជាច្រើនរបស់ Counterpoint Research បញ្ជាក់ថា ក្រុមហ៊ុន Huawei ពេលនេះស្ថិតនៅក្នុងចំណាត់ថ្នាក់លេខ 3 នៅក្នុងទីផ្សារស្មាតហ្វូនរបស់ចិន។ នៅក្នុងបញ្ជីនេះ មិនមានក្រុមហ៊ុន Samsung និង Apple នោះទេ។ ក្រុមហ៊ុន OPPO គឺនាំមុខគេនៅក្នុងទីផ្សារស្មាតហ្វូនរបស់ចិន ជាមួយនឹងចំណែកទីផ្សារចំនួន 21% ដែលមានការកើនឡើងចំនួន 26% បើធៀបទៅនឹងឆ្នាំមុននេះ។ ក្រុមហ៊ុនចំណាត់ថ្នាក់ទី 2 គឺជាក្រុមហ៊ុន vivo ដែលមានចំនែកទីផ្សារចំនួន 20%។ ក្រុមហ៊ុន Huawei, Xiaomi និង Apple គឺជាប់លេខ 3 ដែលមានចំណែកទីផ្សារចំនួន 16% ផងដែរ៕
