ថ្មីៗនេះ ក្រុមហ៊ុន Huawei បានចុះបញ្ជីនៅក្នុងប៉ាតង់មួយ ដែលមានការបង្ហាញនូវស្មាតហ្វូនមួយ ដែលមានអេក្រង់បន្ថែមមួយទៀតនៅផ្នែកខាងក្រោយរបស់ស្មាតហ្វូននេះ។ អ្នកឌីស្សាញ HoiINDI បានប្រើប្រាស់នូវរូបភាពជាច្រើន សន្លឹកនៃប៉ាតង់នេះក្នុងការបង្កើតនូវរូបភាព 3D កម្រិតខ្ពស់ជាច្រើនសន្លឹករបស់ស្មាតហ្វូននេះ។
បើមើលទៅលើផ្នែកខាងមុខរបស់ស្មាតហ្វូននេះ យើងបានឃើញនូវកាមេរ៉ាដែលមានរន្ធប្រហោងនៅលើអេក្រង់របស់ស្មាតហ្វូននេះ ហើយវាមានគែម កោងថែមទៀត។ នៅផ្នែកខាងក្រោយរបស់ស្មាតហ្វូននេះ គឺមានអេក្រង់មួយទៀតនៅផ្នែកខាងក្រោយផងដែរ។
នៅក្នុងប៉ាតង់នេះ គឺមានការបង្ហាញថា អេក្រង់នេះ អាចបង្ហាញនូវព័ត៌មានជាច្រើនដែលក្នុងនោះ គឺមានម៉ោង កាលបរិច្ឆេទ ការព្យាករណ៍ទៅលើអាកាសធាតុ ថាមពលថ្ម និងសាររំលឹកជាច្រើនទៀត។ អេក្រង់នេះ ក៏អាចថតរូបភាពបានយ៉ាងល្អថែមទៀត។ គួរបញ្ជាក់ផងដែរថា វាមានគំរូរបស់ស្មាតហ្វូន Xiaomi Mi 11 Ultra ដែលមានអេក្រង់បន្ថែមមួយទៀតនិងកាមេរ៉ាខាងមុខមួយគ្រាប់ផងដែរ៕
