Huawei ដែលជាក្រុមហ៊ុនផលិតស្មាតហ្វូនដ៏ធំរបស់មហាយក្សចិន គឺបានប្រឈមមុខទៅនឹងស្ថានភាពលំបាកជាច្រើននាពេលកន្លងមក ដោយសារតែរងនូវការរឹតបន្តឹងជាច្រើនដោយសហរដ្ឋអាមេរិក។ ប៉ុន្តែបើទោះបីជាក្រុមហ៊ុននេះ មានស្ថានភាពកាន់តែលំបាកនៅក្នុងទីផ្សារស្មាតហ្វូនក៏ដោយ ក៏ក្រុមហ៊ុននេះត្រៀមខ្លួនក្នុងការប្រកាសចេញនូវស្មាតហ្វូន Flagship ថ្មីៗ របស់ខ្លួនផងដែរ។
ស្មាតហ្វូន Huawei P-series Flagship ត្រូវគេរំពឹងថា នឹងមាន 3 ម៉ូដែលនោះគឺ Huawei P50, P50 Pro និង P50 Pro+ ។ នៅពេលនេះ ស្មាតហ្វូន P50 Pro ក៏បានបែកធ្លាយនៅលើអនឡាញ ហើយវាក៏មានការបង្ហាញអំពីការឌីស្សាញទៅលើស្មាតហ្វូននេះផងដែរ។ មានការបង្ហាញថា ស្មាតហ្វូននេះ គឺមានគែមកោងនៅលើគែមខាងស្តាំនិងគែមខាងឆ្វេងរបស់វា ហើយវាក៏មានគែមកោងនៅផ្នែកខាងក្រោម និងផ្នែកខាងលើរបស់ស្មាតហ្វូននេះផងដែរ។ ស្មាតហ្វូននេះ គឺមានរន្ធ Punch-Hole នៅកណ្តាលអេក្រង់របស់ស្មាតហ្វូននេះផងដែរ។ បើធ្វើការប្រៀបធៀបទៅនឹងស្មាតហ្វូនជំនាន់មុននោះ ការឌីស្សាញទៅលើស្មាតហ្វូន P50 Series នេះ គឺមានលក្ខណៈខុសប្លែកពីមុន ហើយវាបំពាក់នូវកាមេរ៉ាថ្មី និងសមត្ថភាពក្នុងការលេងហ្គេមថែមទៀតផង។
ប្រភពដដែលនេះ បានបន្ថែមថា ស្មាតហ្វូន Huawei P50 ក៏នឹងមានប្រភេទម៉ូដែល ‘Lite’ ផងដែរ ហើយស្មាតហ្វូននេះ ក៏នឹងដំណើរការជាមួយនឹងបន្ទះឈីប HiSilicon Kirin 9000E ថែមទៀតផង។ ស្មាតហ្វូន P50 Pro នឹងក្លាយជាម៉ូឌែលប្រភេទ Standard និងស្មាតហ្វូន P50 Pro+ ដែលជាម៉ូឌែលប្រភេទ Pro នោះ គឺប្រើប្រាស់នូវបន្ទះឈីប Kirin 9000៕