ចូលគិតសាកមើលប្រសិនបើអាជីវកម្មមួយមិនមានដំណើរការល្អ និងបន្តធ្លាក់ចុះ ខាតឡុងចុងអស់រយះពេលរាប់ឆ្នាំ ដូច្នេះ តើអាជីវកម្មមួយនោះអាចឈរជើងបានដែរ ឬទេ? មិនខុសទេកន្លងមកមានលេចលឺព័ត៌មានដ៏រស៊ើបជាច្រើនបាននិយាយថា LG Electronics មានគម្រោងក្នុងការលក់ជំនួយផ្នែកទូរស័ព្ទស្មាតហ្វូនរបស់ខ្លួនទៅអោយក្រុមហ៊ុនផ្សេង ឬក៏បិទមុខជំនួយមួយនេះខ្លួនឯងផ្ទាល់តែម្តង ក្រោយពីជំនួយមួយនេះបន្តដាំក្បាលចុះអស់រយះពេញជាច្រើនឆ្នាំ ទោះបីជាក្រុមហ៊ុនខិតខំប្រឹងប្រែរិះរកគ្រប់មធ្យោបាយក្នុងការស្តារឡើងវិញយ៉ាងណាក៏ដោយក៏មិនទទួលបានផ្លែផ្កាគាប់ប្រសើរនោះដែរ។
យោងតាមប្រភពរបាយការណ៍ថ្មីមួយចេញពី The Korea Times របស់ប្រទេសកូរ៉េខាងត្បូងបានបញ្ជាក់ដឹងថា ក្រុមហ៊ុន LG នឹងធ្វើការប្រកាសពីជោគវាសនាសម្រាប់ជំនួយស្មាតហ្វូនរបស់ខ្លួននៅដើមសប្តាហ៍ក្រោយគឺនៅថ្ងៃទី 05 ខែមេសានេះ ក្រោយពីកិច្ចប្រជុំគណៈក្រុមប្រឹក្សាភិបាលក្រុមហ៊ុន LG ស្តីពីការសម្រេចចិត្តចុងក្រោយទៅលើជោគវាសនានៃអាជីវកម្ម LG Mobile Division ថាគួរបន្តនៅ ឬត្រូវបិទបញ្ចប់។ កិច្ចប្រជុំសម្រេចនេះបានធ្វើឡើង ក្រោយពេលមួយសប្តាហ៍បន្ទាប់ពីកិច្ចចរចារលក់អាជីវកម្មស្មាតហ្វូនរបស់ខ្លួនទៅអោយក្រុមហ៊ុនដ៏មានសក្តានុពលមួយទទួលបរាជ័យ។
បើតាមក្រុមមន្ត្រីរបស់ក្រុមហ៊ុន LG Electronics បានអត្ថាធិប្បាយយ៉ាងដូច្នេះថា LG កំពុងពិចារណាលើយុទ្ធសាស្រ្តជាច្រើនដើម្បីធ្វើការសម្រេចលើជោគវាសនាសម្រាប់អាជីវកម្មទូរស័ព្ទចល័ត (Mobile Division) របស់ខ្លួន ដែលក្នុងនោះរួមមានទាំងការលក់ផ្តាច់មុខ ឬបែងចែកភាគហ៊ុន ក៏ដូចជាត្រូវដកខ្លួនចេញពីទីផ្សារស្មាតហ្វូនទាំងស្រុងជាដើម។ លើសពីនេះទៀត បើតាមពាក្យចចាមអារ៉ាមដែលបានប្រកាសលើបណ្តាញសង្គម Twitter កាលពីប៉ុន្មានថ្ងៃមុននេះ បាននិយាយថា បុគ្គលិកបម្រើការនៅក្រុមហ៊ុន LG Mobile នឹងត្រូវផ្លាស់ប្តូរទៅបម្រើការនៅក្នុងក្រុមហ៊ុនគ្រឿងបរិក្ខាប្រើប្រាស់ក្នុងផ្ទះ (Home Appliances Division) វិញ។ ដំណឹងនេះ គឺជាដំណឹងដ៏គួរអោយសោកស្តាយបំផុតសម្រាប់អាជីវកម្មស្មាតហ្វូនរបស់ LG ប៉ុន្តែ ទោះជាយ៉ាងណាយើងទាំងអស់គ្នារងចាំតាមដានព័ត៌មានបន្តទៀតសម្រាប់ជោគវាសនានៃអាជីវកម្ម LG Mobile Division នៅដើមសប្តាហ៍នេះ បន្ទាប់ពីកិច្ចប្រជុំសម្រេចចុងក្រោយរបស់ក្រុមព្រឹក្សាភិបាលរបស់ LG៕