ក្រុមហ៊ុន Huawei បានប្រកាសចេញនាឡិកាដៃឆ្លាតវៃ Watch 2 ដែលប្រតិបត្តិការដោយ Google Wear OS កាលពីកំឡុងឆ្នាំ 2017 ប៉ុន្តែ ចាប់តាំងពីពេលនោះមកក្រុមហ៊ុនបច្ចេកវិទ្យាយក្សរបស់ចិនមួយនេះ បានផ្តោតតែទៅលើការប្រកាសចេញ និងចេញលក់ម៉ូដែល Watch GT-Series ដែលប្រតិបត្តិការដោយ OS ផ្ទាល់ខ្លួនប៉ុណ្ណោះ។ យ៉ាងណាមិញបើតាមរយះប្រភពបែកធ្លាយនៅលើគណនី Weibo មួយបានបញ្ជាក់ថា Huawei នឹងបញ្ចេញនាឡិកាដៃឆ្លាតវៃជំនាន់ថ្មី Huawei Watch 3 នៅខែឧសភាខាងមុខនេះ (អាចនៅដើមខែ) ប៉ុន្តែ នាឡិកាដៃឆ្លាតវៃជំនាន់ថ្មីនេះមិនប្រតិបត្តិការដោយ Android Wear OS នោះទេ គឺប្រតិបត្តិការដោយ Huawei LiteOS ដូចស៊េរី Watch GT ដែរ។
បើតាមប្រភពបានបញ្ជាក់ច្បាស់ថា Huawei Watch 3 នឹងប្រតិបត្កការដោយ Huawei HarmonyOS ជាមួយនឹងការឌីស្សាញផ្ទៃអ៊ីនធ័រហ្វេស (Watch UI) បែបថ្មី។ បន្ថែមពីនេះ Huawei Watch 3 ក៏នឹងគាំទ្រនូវកម្មវិធីដំឡើងក្រៅ (Third-party App) ដូចម៉ូដែល Watch GT Series ថែមទៀតផង។ Huawei Watch 3 ក៏នឹងមានភ្ជាប់នូវមុខងារឆ្លាតវៃ (AI Features) ដែលនឹងជួយធ្វើអោយអាយុកាលថ្មកាន់ថាមពលបានយូរថ្ងៃដូចនៅលើ Huawei Watch GT Series ផងដែរ (ថ្មរបស់ Watch GT 2 មានសមត្ថភាពកាន់បានជិត 8 ថ្ងៃ)។ ហើយចំពោះផ្ទៃ Watch Interface ដែលបង្ហាញចេញលើកនេះគឺខុសគ្នាពីវីដេអូគំរូ “HarmonyOS watch Demo” ដែលបានបែកធ្លាយកាលពីខែកញ្ញា ឆ្នាំ 2020 ដោយក្នុងនោះយើងឃើញថា Huawei បានប្តូរការឌីស្សាញរូប icon កម្មវិធីថ្មីទាំងស្រុងតែម្តង។
ប្រភពដដែលក៏បានបញ្ជាក់បន្ថែមទៀតថា Huawei Watch 3 នឹងទ្រទ្រង់ស៊ីមកាតប្រភេទ eSIM ដែលខុសពីជំនាន់ Watch 2 ដែលប្រើប្រាស់ nano-SIM។ ហើយ Huawei Watch 3 ក៏នឹងគាំទ្រនូវមុខងារពិសេសរបស់កម្មវិធី WeChat ដែលផ្តល់លទ្ធភាពអោយអ្នកប្រើអាចធ្វើការឆ្លើយតបសារដោយផ្ទាល់នៅលើនាឡិកាដោយការសរសេរ ឬក៏ប្រើប្រាស់សំឡេង។
សូមបញ្ជាក់ថា Huawei នឹងពន្យាពេលក្នុងការប្រកាសចេញកំពូលស្មាតហ្វូនជំនាន់ថ្មី Huawei P50 Series ដែលតាមកាលកំណត់គឺត្រៀមប្រកាសចេញក្នុងខាងឧសភាខាងមុខនេះ ប៉ុន្តែបើតាមប្រភពគឺត្រូវពន្យាពេលរហូតដល់ខែមិថុនា ដូច្នេះ សម្រាប់ព្រឹត្តិការណ៍ដែល Huawei ត្រៀមប្រារព្ធធ្វើឡើងនៅខែក្រោយនេះក្រុមហ៊ុនអាចនឹងប្រកាសចេញនាឡិកាដៃឆ្លាតវៃជំនាន់ថ្មីនេះជំនួសវិញ។ ដូចគ្នានឹងនាឡិកាដៃឆ្លាតវៃ Watch 3 ដែរ ព្រោះលេចលឺដំណឹង ថាកំពូលស្មាតហ្វូន Huawei P50 Series គឺជាស្រឡាយស្មាតហ្វូនដំបូងរបស់ក្រុមហ៊ុនដែលនឹងដំឡើងប្រតិបត្តិការ HarmonyOS ចេញពីប្រអប់មកស្រាប់៕
