ថ្មីៗនេះ អ្នកទម្លាយម្នាក់នៅលើ Weibo បានបញ្ចេញនូវព័ត៌មានមួយថា អេក្រង់ដែលអាចបត់បានសម្រាប់ស្មាតហ្វូនរបស់ក្រុមហ៊ុន OPPO និង vivo គឺជិតធ្វើការផលិតទ្រង់ទ្រាយធំហើយ។ ព័ត៌មាននេះ ត្រូវបានចែករំលែកនៅលើ @数码闲聊站 ដែលបានទម្លាយថា អេក្រង់នេះ នឹងមានពីរម៉ូឌែលដែលកំពុងតែធ្វើការផលិតនោះគឺទំហំ 8 អ៊ីង និងមួយទៀតមានទំហំ 7 អ៊ីង។ សម្រាប់អេក្រង់ទាំង 2 នេះ គឺមានទម្រង់នៃការបត់ចូល ហើយវាក៏មានគំរូចុងក្រោយបំផុតផងដែរ។
អ្នកទម្លាយរូបនេះ ធ្លាប់បាននិយាយថា អេក្រង់ទំហំ 7 អ៊ីង នេះ គឺត្រៀមខ្លួនក្នុងការផលិតទ្រង់ទ្រាយធំហើយនៅដើមឆ្នាំនេះគឺនៅក្នុងខែមករា។ ប៉ុន្តែក្រោយមក វាក៏មានការពន្យារពេលរហូតមកទល់ពេលនេះ។ ស្មាតហ្វូនដែលអាចបត់បានរបស់ក្រុមហ៊ុន vivo នេះ គឺនឹងមានត្រចៀកបត់ Hinge យ៉ាងរឹងមាំសម្រាប់ទំហំ 8 អ៊ីង។ អេក្រង់នេះមានការទ្រទ្រង់ទៅលើកម្រិតអេក្រង់ refresh rate ខ្ពស់ ហើយនៅពេលដែលវាបត់គឺមានទំហំ 6.5 អ៊ីង។
ថ្មីៗនេះ ក្រុមហ៊ុន Xiaomi បានបង្ហាញនូវស្មាតហ្វូនដែលអាចបត់បានដំបូងបំផុតរបស់ខ្លួនផងដែរ ដូចនេះយើងរំពឹងថា ក្រុមហ៊ុន vivo និង OPPO ពិតជាប្រកាសបង្ហាញនូវស្មាតហ្វូនដែលអាចបត់បានរបស់ខ្លួននៅក្នុងពេលឆាប់ៗនេះជាមិនខាន។ យ៉ាងណាមិញ កាលបរិច្ឆេទក្នុងការប្រកាសបង្ហាញនូវស្មាតហ្វូនដែលមានអេក្រង់បត់បាននេះនៅមិនទាន់ដឹងនៅឡើយទេ៕