នៅក្នុងព័ត៌មានថ្មីនេះ បាននិយាយអំពីស្មាតហ្វូន Samsung Galaxy Z Fold3 ដោយស្មាតហ្វូនដែលអាចបត់បានថ្មីនេះ ត្រូវបានគេបញ្ជាក់ថា គឺមានអេក្រង់ខាងក្រៅដែលមានទំហំតូចជាងមុនបើធៀបទៅនឹងស្មាតហ្វូនជំនាន់មុននេះ។ នៅក្នុងពាក្យចចាមអារ៉ាមជាច្រើន គឺបាននិយាយថា ស្មាតហ្វូនដែលអាចបត់បានរបស់ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ នឹងមានអេក្រង់ទំហំ 5.4 អ៊ីងនៅផ្នែកខាងក្រៅ ហើយវាក៏មានកម្រិតភាពច្បាស់ 2260x816px។
សម្រាប់កម្រិតភាពច្បាស់របស់ស្មាតហ្វូននេះ គឺដូចទៅនឹងម៉ូឌែលជំនាន់មុនផងដែរ គ្រាន់តែអេក្រង់ខាងក្រៅរបស់ស្មាតហ្វូននេះគឺតូចជាងស្មាតហ្វូន Galaxy Z Fold2 ដែលមានទំហំ 6.23 អ៊ីង។ បន្ថែមពីនេះទៀតនោះ ពាក្យចចាមអារ៉ាមនេះ ក៏មានការទម្លាយអំពីទំហំនៃអេក្រង់របស់ស្មាតហ្វូននេះផងដែរនោះ គឺ 7.7 អ៊ីង។ បើធៀបទៅនឹងជំនាន់មុននេះគឺមានទំហំ 7.6 អ៊ីង នៅខាងក្នុង។ ក្រៅពីស្មាតហ្វូន Galaxy Z Fold3 នេះ ក្រុមហ៊ុន Samsung គឺនឹងប្រើប្រាស់នូវអេក្រង់ដែលអាចបត់បានរបស់ស្មាតហ្វូន Z Flip3 ។ ស្មាតហ្វូននេះមានអេក្រង់ខាងក្នុងទំហំ 8.8 អ៊ីង និងអេក្រង់ខាងក្រៅទំហំ 1.9 អ៊ីង ។
នៅក្នុងបញ្ជីនេះ ក៏មានការបង្ហាញនូវស្មាតហ្វូនជាច្រើនរបស់ក្រុមហ៊ុនផលិតស្មាតហ្វូនរបស់ចិនផងដែរ។ ក្រុមហ៊ុន Huawei ត្រូវគេរាយការណ៍ដែរថា គឺធ្វើការនៅលើស្មាតហ្វូន Mate X2 ជាមួយនឹងក្រុមហ៊ុន BOE សម្រាប់អេក្រង់ខាងក្នុងទំហំ (8 អ៊ីង) និងអេក្រង់ខាងក្រៅទំហំ (6.5 អ៊ីង)។ សម្រាប់ក្រុមហ៊ុន vivo និង OPPO វិញ ត្រូវបានគេនិយាយថា គឺនឹងធ្វើការប្រើប្រាស់នូវអេក្រង់របស់ក្រុមហ៊ុនពីរ គឺ Samsung Display និងក្រុមហ៊ុន BOE៕